Postquam res Asiae, Priamique evertere gentem
immeritam visum superis, ceciditque superbum
Ilium, et omnis humo fumat Neptunia Troia,
diversa exsilia, et desertas quaerere terras
auguriis agimur divom: classemque sub ipsa
Antandro, et Phrygiae molimur montibus Idae,
incerti quo fata ferant, ubi sistere detur;
contrahimusque viros. Vix prima incoeperat aestas,
et pater Anchises dare fatis vela iubebat.
Litora tum patriae lacrimans portusque relinquo,
et campos, ubi Troia fuit. Feror exsul in altum
cum sociis natoque Penatibus et magnis dis.
Terra procul vastis colitur Mavortia campis,
(Thraces arant) acri quondam regnata Lycurgo;
hospitium antiquum Troiae, sociique Penates,
dum fortuna fuit. Feror hic, et litore curvo
moenia prima loco, fatis ingressus iniquis;
Aeneadasque meo nomen de nomine fingo.
Sacra Dionaeae matri divisque ferebam
auspicibus coeptorum operum, superoque nitentem
caelicolum regi mactabam in litore taurum.
Forte fuit iuxta tumulus, quo cornea summo
virgulta, et densis hastilibus horrida myrtus.
Accessi, viridemque ab humo convellere silvam
conatus, ramis tegerem ut frondentibus aras,
horrendum, et dictu video mirabile monstrum.
Nam quae prima solo ruptis radicibus arbos
vellitur, huic atro linquuntur sanguine guttae,
et terram tabo maculant: mihi frigidus horror
membra quatit, gelidusque coit formidine sanguis.
Rursus et alterius lentum convellere vimen
insequor, et causas penitus tentare latentes:
ater et alterius sequitur de cortice sanguis.
Multa movens animo, Nymphas venerabar agrestes,
Gradivumque patrem, Geticis qui praesidet arvis,
rite secundarent visus omenque levarent.
Tertia sed postquam maiore hastilia nixu
aggredior, genibusque adversae obluctor arenae,
(eloquar an sileam?) gemitus lacrimabilis imo
auditur tumulo, et vox reddita fertur ad aures:
"Quid miserum, Aenea, laceras? Iam parce sepulto,
parce pias scelerare manus. Non me tibi Troia
externum tulit; haud cruor hic de stipite manat.
Heu fuge crudeles terras, fuge litus avarum.
Nam Polydorus ego: hic confixum ferrea texit
telorum seges, et iaculis increvit acutis."
Tum vero ancipiti mentem formidine pressus
obstupui, steteruntque comae, et vox faucibus haesit.
Hunc Polydorum auri quondam cum pondere magno
infelix Priamus furtim mandarat alendum
Threicio regi, cum iam diffideret armis
Dardaniae, cingique urbem obsidione videret.
Ille, ut opes fractae Teucrum, et fortuna recessit,
res Agamemnonias, victriciaque arma secutus,
fas omne abrumpit: Polydorum obtruncat, et auro
vi potitur. Quid non mortalia pectora cogis
auri sacra fames? Postquam pavor ossa reliquit,
delectos populi ad proceres, primumque parentem
monstra deum refero, et quae sit sententia posco.
Omnibus idem animus, scelerata excedere terra,
linquere pollutum hospitium, et dare classibus Austros.
Ergo instauramus Polydoro funus, et ingens
aggeritur tumulo tellus. Stant manibus arae
caeruleis maestae vittis, atraque cupressu:
et circum Iliadae crinem de more solutae.
Inferimus tepido spumantia cymbia lacte,
sanguinis et sacri pateras; animamque sepulcro
condimus, et magna supremum voce ciemus.
Inde, ubi prima fides pelago, placataque venti
dant maria, et lenis crepitans vocat Auster in altum,
deducunt socii naves, et litora complent.
Provehimur portu; terraeque urbesque recedunt.
Sacra mari colitur medio gratissima tellus
Nereidum matri, | et Neptuno | Aegaeo:
quam pius Arcitenens oras et litora circum
errantem, Mycone celsa, Gyaroque revinxit:
immotamque coli dedit, et contemnere ventos.
Huc feror: haec fessos tuto placidissima portu
accipit: egressi veneramur Apollinis urbem.
Rex Anius, rex idem hominum, Phoebique sacerdos,
vittis, et sacra redimitus tempora lauro
occurrit; veterem Anchisen agnoscit amicum.
Iungimus hospitio dextras et tecta subimus.
Templa dei saxo venerabar structa vetusto:
"Da propriam, Thymbraee, domum, da moenia fessis,
et genus, et mansuram urbem: serva altera Troiae
Pergama, reliquias Danaum, atque immitis Achilli.
Quem sequimur? Quove ire iubes? Ubi ponere sedes?
Da pater augurium, atque animis illabere nostris."
Vix ea fatus eram, tremere omnia visa repente,
liminaque, laurusque dei, totusque moveri
mons circum, et mugire adytis cortina reclusis.
Submissi petimus terram, et vox fertur ad aures:
"Dardanidae duri, quae vos a stirpe parentum
prima tulit tellus, eadem vos ubere laeto
accipiet reduces: antiquam exquirite matrem.
Hic domus Aeneae cunctis dominabitur oris,
et nati natorum, et qui nascentur ab illis."
Haec Phoebus: mistoque ingens exorta tumultu
laetitia; et cuncti, quae sint ea moenia, quaerunt;
quo Phoebus vocet errantes, iubeatque reverti.
Tum genitor veterum volvens monimenta virorum:
"Audite, o proceres, -ait-, et spes discite vestras.
Creta Iovis magni medio iacet insula ponto,
mons Idaeus ubi, et gentis cunabula nostrae.
Centum urbes habitant magnas, uberrima regna:
maximus unde pater (si rite audita recordor)
Teucrus Rhoeteas primum est avectus ad oras,
optavitque locum regno. Nondum Ilium et arces
Pergameae steterant: habitabant vallibus imis.
Hinc mater cultrix Cybele, Corybantiaque aera,
Idaeumque nemus: hinc fida silentia sacris:
et iuncti currum dominae subiere leones.
Ergo, agite, et, divom ducunt qua iussa, sequamur:
placemus ventos, et Gnossia regna petamus.
Nec longo distant cursu: modo Iuppiter adsit,
tertia lux classem Cretaeis sistet in oris."
Sic fatus, meritos aris mactavit honores,
taurum Neptuno, taurum tibi, pulcher Apollo,
nigram Hyemi pecudem, Zephyris felicibus albam.
Fama volat pulsum regnis cessisse paternis
Idomenea ducem, desertaque litora Cretae,
hoste vacare domos, sedesque adstare relictas.
Linquimus Ortygiae portus, pelagoque volamus:
bacchatamque iugis Naxon, viridemque Donusam,
Olearon, niveamque Paron, sparsasque per aequor
Cycladas, et crebris legimus freta consita terris.
Nauticus exoritur vario certamine clamor:
hortantur socii Cretam proavosque petamus.
Prosequitur surgens a puppi ventus euntes,
et tandem antiquis Curetum allabimur oris.
Ergo avidus muros optatae molior urbis,
Pergameamque voco: et laetam cognomine gentem
hortor amare focos, arcemque attollere tectis.
Iamque fere sicco subductae litore puppes;
connubiis, arvisque novis operata iuventus;
iura domosque dabam: subito cum tabida membris
corrupto caeli tractu, miserandaque venti
arboribusque satisque lues et lethifer annus.
Linquebant dulces animas, aut aegra trahebant
corpora: tum steriles exurere Syrius agros;
arebant herbae, et victum seges aegra negabat.
Rursus ad oraculum Ortygiae, Phoebumque remenso
hortatur pater ire mari, veniamque precari:
quem fessis finem rebus ferat; unde laborum
tentare auxilium iubeat; quo vertere cursus.
Nox erat, et terris animalia somnus habebat:
effigies sacrae divom, Phrygiique Penates,
quos mecum e Troia, mediisque ex ignibus urbis
extuleram, visi ante oculos adstare iacentis
in somnis, multo manifesti lumine, qua se
plena per insertas fundebat luna fenestras.
Tum sic affari, et curas his demere dictis:
"Quod tibi delato Ortygiam dicturus Apollo est,
hic canit, et tua nos en ultro ad limina mittit.
Nos te, Dardania incensa, tuaque arma secuti,
nos tumidum sub te permensi classibus aequor,
idem venturos tollemus in astra nepotes,
imperiumque urbi dabimus: tu moenia magnis
magna para, longumque fugae ne linque laborem.
Mutandae sedes: non haec tibi litora suasit
Delius, aut Cretae iussit confidere Apollo.
Est locus, Hesperiam Grai cognomine dicunt,
terra antiqua, potens armis, atque ubere glebae:
Oenotrii coluere viri: nunc fama minores
Italiam dixisse, ducis de nomine gentem.
Hae nobis propriae sedes: hinc Dardanus ortus,
Iasiusque pater, genus a quo principe nostrum.
Surge age, et haec laetus longaevo dicta parenti
haud dubitanda refer. Coritum terrasque require
Ausonias: Dictaea negat tibi Iuppiter arva."
Talibus attonitus visis, ac voce deorum,
(nec sopor illud erat; sed coram agnoscere voltus,
velatasque comas, praesentiaque ora videbar:
tum gelidus toto manabat corpore sudor)
corripio e stratis corpus, tendoque supinas
ad caelum cum voce manus, et munera libo
intemerata focis. Perfecto laetus honore
Anchisen facio certum, remque ordine pando.
Agnovit prolem ambiguam, geminosque parentes
seque novo veterum deceptum errore locorum.
Tum memorat: "Nate Iliacis exercite fatis,
sola mihi tales casus Cassandra canebat:
nunc repeto haec generi portendere debita nostro,
et saepe Hesperiam, saepe Itala regna vocare.
Sed quis ad Hesperiae venturos litora Teucros
crederet? Aut quem tum vates Cassandra moveret?
Cedamus Phoebo, et moniti meliora sequamur."
Sic ait: et cuncti dictis paremus ovantes.
Hanc quoque deserimus sedem, paucisque relictis,
vela damus, vastumque cava trabe currimus aequor.
Postquam altum tenuere rates, nec iam amplius ullae
apparent terrae, caelum undique, et undique pontus,
tum mihi caeruleus supra caput astitit imber,
noctem hiememque ferens, et inhorruit unda tenebris.
Continuo venti volvunt mare, magnaque surgunt
aequora: dispersi iactamur gurgite vasto.
Involvere diem nimbi, et nox humida caelum
abstulit: ingeminant abruptis nubibus ignes.
Excutimur cursu, et caecis erramus in undis.
Ipse diem noctemque negat discernere caelo,
nec meminisse viae media Palinurus in unda.
Tres adeo incertos caeca caligine soles
erramus pelago, totidem sine sidere noctes.
Quarto terra die primum se attollere tandem
visa, aperire procul montes, ac volvere fumum.
Vela cadunt: remis insurgimus: haud mora; nautae
adnixi torquent spumas et caerula verrunt.
Servatum ex undis Strophadum me litora primum
accipiunt. Strophades Graio stant nomine dictae
insulae Ionio in magno: quas dira Celaeno
Harpyiaeque colunt aliae, Phineia postquam
clausa domus, mensasque metu liquere priores.
Tristius haud illis monstrum, nec saevior ulla
pestis, et ira deum Stygiis sese extulit undis.
Virginei volucrum voltus, foedissima ventris
proluvies, uncaeque manus, et pallida semper
ora fame.
Huc ubi delati portus intravimus, ecce
laeta boum passim campis armenta videmus,
caprigenumque pecus, nullo custode, per herbam.
Irruimus ferro; et divos ipsumque vocamus
in praedam partemque Iovem: tum litore curvo
exstruimusque toros, dapibusque epulamur opimis.
At subitae horrifico lapsu de montibus adsunt
Harpyiae, et magnis quatiunt clangoribus alas,
diripiuntque dapes, contactuque omnia foedant
immundo: tum vox taetrum dira inter odorem.
Rursum in secessu longo, sub rupe cavata,
arboribus clausi circum atque horrentibus umbris
instruimus mensas, arisque reponimus ignem.
Rursum ex diverso caeli, caecisque latebris
turba sonans praedam pedibus circumvolat uncis;
polluit ore dapes. Sociis tunc arma capessant
edico, et dira bellum cum gente gerendum.
Haud secus ac iussi faciunt, tectosque per herbam
disponunt enses, et scuta latentia condunt.
Ergo, ubi delapsae sonitum per curva dedere
litora, dat signum specula Misenus ab alta
aere cavo: invadunt socii, et nova proelia temptant,
obscenas pelagi ferro foedare volucres.
Sed neque vim plumis ullam, nec volnera tergo
accipiunt; celerique fuga sub sidera lapsae,
semesam praedam, et vestigia foeda relinquunt,
una in praecelsa consedit rupe Celaeno,
infelix vates, rupitque hanc pectore vocem:
"Bellum etiam pro caede boum, stratisque iuvencis,
Laomedontiadae, bellumne inferre paratis?
Et patrio insontes Harpyias pellere regno?
Accipite ergo animis, atque haec mea figite dicta:
quae Phoebo pater omnipotens, mihi Phoebus Apollo
praedixit, vobis furiarum ego maxima pando.
Italiam cursu petitis, ventisque vocatis,
ibitis Italiam, portusque intrare licebit.
Sed non ante datam cingetis moenibus urbem,
quam vos dira fames, nostraeque iniuria caedis
ambesas subigat malis absumere mensas."
Dixit, et in silvam pennis ablata refugit.
At sociis subita gelidus formidine sanguis
diriguit: cecidere animi: nec iam amplius armis,
sed votis precibusque iubent exposcere pacem:
sive deae, seu sint dirae obscaenaeque volucres.
At pater Anchises, passis de litore palmis,
numina magna vocat, meritosque indicit honores:
"Di prohibete minas, di talem avertite casum,
et placidi servate pios." Tum litore funem
diripere, excussosque iubet laxare rudentes.
Tendunt vela Noti: fugimus spumantibus undis,
qua cursum ventusque gubernatorque vocabant.
Iam medio apparet fluctu nemorosa Zacynthos,
Dulichiumque, Sameque et Neritos ardua saxis.
Effugimus scopulos Ithacae, Laërtia regna;
et terram altricem saevi exsecramur Ulixis.
Mox et Leucatae nimbosa cacumina montis,
et formidatus nautis aperitur Apollo.
Hunc petimus fessi, et parvae succedimus urbi:
anchora de prora iacitur, stant litore puppes.
Ergo insperata tandem tellure potiti,
lustramurque Iovi, votisque incendimus aras,
Actiaque Iliacis celebramus litora ludis.
Exercent patrias oleo labente palaestras
nudati socii. iuvat evasisse tot urbes
Argolicas, mediosque fugam tenuisse per hostes.
Interea magnum sol circumvolvitur annum,
et glacialis hiems Aquilonibus asperat undas.
Aere cavo clypeum, magni gestamen Abantis,
postibus adversis figo, et rem carmine signo:
Aeneas haec de Danais victoribus arma.
Linquere tum portus iubeo, et considere transtris.
Certatim socii feriunt mare, et aequora verrunt.
Protinus aerias Phaeacum abscondimus arces,
litoraque Epiri legimus, portuque subimus
Chaonio, et celsam Buthroti abscedimus urbem.
Hic incredibilis rerum fama occupat aures,
Priamiden Helenum Graias regnare per urbes,
coniugio Aeacidae Pyrrhi, sceptrisque potitum;
et patrio Andromachen iterum cessisse marito.
Obstupui: miroque incensum pectus amore
compellare virum, et casus cognoscere tantos.
Progredior portu, classes et litora linquens.
Sollemnes tum forte dapes et tristia dona
ante urbem in luco, falsi Simoentis ad undam,
libabat cineri Andromache, manesque vocabat
Hectoreum ad tumulum; viridi quem cespite inanem,
et geminas, causam lacrimis, sacraverat aras.
Ut me conspexit venientem, et Troia circum
arma amens vidit, magnis exterrita monstris,
diriguit visu in medio; calor ossa reliquit.
Labitur et longo vix tandem tempore fatur:
"Verane te facies, verus mihi nuntius affers,
nate dea? Vivisne? Aut, si lux alma recessit,
Hector ubi est?" dixit, lacrimasque effudit, et omnem
implevit clamore locum. Vix pauca furenti
subicio, et raris turbatus vocibus hisco:
"Vivo equidem, vitamque extrema per omnia duco.
Ne dubita, nam vera vides.
Heu, quis te casus deiectam coniuge tanto
excipit? Aut quae digna satis fortuna revisit?
Hectoris Andromache Pyrrhin connubia servas?"
Deiecit voltum, et demissa voce locuta est:
"O felix una ante alias Priameia virgo,
hostilem ad tumulum Troiae sub moenibus altis
iussa mori: quae sortitus non pertulit ullos,
nec victoris heri tetigit captiva cubile.
Nos, patria incensa, diversa per aequora vectae,
stirpis Achilleae fastus, iuvenemque superbum
servitio enixae tulimus: qui deinde secutus
Ledaeam Hermionen, Lacedaemoniosque Hymenaeos,
me famulam, famuloque Heleno transmisit habendam.
Ast illum, ereptae magno inflammatus amore
coniugis, et scelerum furiis agitatus Orestes,
excipit incautum, patriasque obtruncat ad aras.
Morte Neoptolemi regnorum reddita cessit
pars Heleno, qui Chaonios cognomine campos,
Chaoniamque omnem Troiano a Chaone dixit:
Pergamaque, Iliacamque iugis hanc addidit arcem.
Sed tibi qui cursum venti, quae fata dedere?
Aut quis te ignarum nostris deus appulit oris?
Quid puer Ascanius? Superatne, et vescitur aura?
Quem tibi iam Troia.
Ecquae iam puero est amissae cura parentis?
Ecquid in antiquam virtutem, animosque viriles
et pater Aeneas, et avunculus excitat Hector?"
Talia fundebat lacrimans, longosque ciebat
incassum fletus: cum sese a moenibus heros
Priamides Helenus multis comitantibus affert:
agnoscitque suos, laetusque ad moenia ducit,
et multum lacrimas verba inter singula fundit.
Procedo, et parvam Troiam, simulataque magnis
Pergama, et arentem Xanthi cognomine rivum
agnosco, Scaeaeque amplector limina portae.
Nec non et Teucri socia simul urbe fruuntur.
Illos porticibus rex accipiebat in amplis.
Aulai in medio libabant pocula Bacchi,
impositis auro dapibus, paterasque tenebant.
Iamque dies, alterque dies processit, et aurae
vela vocant, tumidoque inflatur carbasus Austro.
His vatem aggredior dictis, ac talia quaeso:
"Troiugena, interpres divom, qui numina Phoebi,
qui tripodas, Clarii lauros, qui sidera sentis,
et volucrum linguas, et praepetis omnia pennae,
fare age: (namque omnem cursum mihi prospera dixit
religio, et cuncti suaserunt numine divi
Italiam petere, et terras tentare repostas:
sola novum, dictuque nefas Harpyia Celaeno
prodigium canit, et tristes denuntiat iras,
obscaenamque famem) quae prima pericula vito?
Quidve sequens tantos possim superare labores?"
Hic Helenus, caesis primum de more iuvencis,
exorat pacem divom, vittasque resolvit
sacrati capitis; meque ad tua limina, Phoebe,
ipse manu multo suspensum numine ducit:
atque haec deinde canit divino ex ore sacerdos:
"Nate dea (nam te maioribus ire per altum
auspiciis manifesta fides: sic fata deum rex
sortitur, volvitque vices; is vertitur ordo)
pauca tibi e multis, quo tutior hospita lustres
aequora, et Ausonio possis considere portu,
expediam dictis: prohibent nam cetera Parcae
scire Helenum, farique vetat Saturnia Iuno.
Principio Italiam, quam tu iam rere propinquam,
vicinosque, ignare, paras invadere portus,
longa procul longis via dividit invia terris.
Ante et Trinacria lentandus remus in unda,
et salis Ausonii lustrandum navibus aequor,
infernique lacus, Aeaeaeque insula Circes,
quam tuta possis urbem componere terra.
Signa tibi dicam: tu condita mente teneto.
Cum tibi sollicito secreti ad fluminis undam,
litoreis ingens inventa sub ilicibus sus
triginta capitum foetus enixa iacebit,
alba solo recubans, albi circum ubera nati:
is locus urbis erit, requies ea certa laborum.
Nec tu mensarum morsus horresce futuros:
fata viam invenient, aderitque vocatus Apollo.
Has autem terras, Italique hanc litoris oram,
proxima quae nostri perfunditur aequoris aestu,
effuge: cuncta malis habitantur moenia Grais.
Hic et Narycii posuerunt moenia Locri:
et Salentinos obsedit milite campos
Lyctius Idomeneus: hic illa ducis Meliboei
parva Philoctetae subnixa Petilia muro.
Quin, ubi transmissae steterint trans aequora classes,
et positis aris iam vota in litore solves,
purpureo velare comas adopertus amictu;
ne qua inter sanctos ignes in honore deorum
hostilis facies occurrat, et omina turbet.
Hunc socii morem sacrorum, hunc ipse teneto:
hac casti maneant in religione nepotes.
Ast ubi digressum Siculae te admoverit orae
ventus, et angusti rarescent claustra Pelori,
laeva tibi tellus, et longo laeva petantur
aequora circuitu: dextrum fuge litus et undas.
Haec loca vi quondam, et vasta convulsa ruina
(tantum aevi longinqua valet mutare vetustas)
dissiluisse ferunt; cum protinus utraque tellus
una foret: venit medio vi pontus, et undis
Hesperium Siculo latus abscidit; arvaque, et urbes
litore diductas angusti interluit aestu.
Dextrum Scylla latus, laevum implacata Charybdis
obsidet; atque imo barathri ter gurgite vastos
sorbet in abruptum fluctus, rursusque sub auras
erigit alternos, et sidera verberat unda.
At Scyllam caecis cohibet spelunca latebris
ora exsertantem, et naves in saxa trahentem.
Prima hominis facies, et pulchro pectore virgo
pube tenus: postrema inmanis corpore pistris,
delphinum caudas utero commissa luporum.
Praestat Trinacrii metas lustrare Pachyni
cessantem, longos et circumflectere cursus,
quam semel informem vasto vidisse sub antro
Scyllam, et caeruleis canibus resonantia saxa.
Praeterea, si qua est Heleno prudentia, vati
si qua fides, animum si veris implet Apollo;
unum illud tibi, nate dea, praeque omnibus unum
praedicam, et repetens iterumque iterumque monebo:
Iunonis magnae primum prece numen adora:
Iunoni cane vota libens, dominamque potentem
supplicibus supera donis: sic denique victor
Trinacria fines Italos mittere relicta.
Huc ubi delatus Cumaeam accesseris urbem,
divinosque lacus, et Averna sonantia silvis,
insanam vatem aspicies, quae rupe sub ima
fata canit, foliisque notas et nomina mandat.
Quaecumque in foliis descripsit carmina virgo,
digerit in numerum, atque antro seclusa relinquit.
Illa manent immota locis, neque ab ordine cedunt.
Verum eadem verso tenuis cum cardine ventus
impulit, et teneras turbavit ianua frondes;
numquam deinde cavo volitantia prendere saxo,
nec revocare situs, aut iungere carmina curat.
Inconsulti abeunt, sedemque odere Sibyllae.
Hic tibi ne qua morae fuerint dispendia tanti,
(quamvis increpitent socii, et vi cursus in altum
vela vocet, possisque sinus implere secundos)
quin adeas vatem, precibusque oracula poscas:
ipsa canat, vocemque volens, atque ora resolvat.
Illa tibi Italiae populos, venturaque bella,
et quo quemque modo fugiasque ferasque laborem,
expediet, cursusque dabit venerata secundos.
Haec sunt quae nostra liceat te voce moneri.
Vade age, et ingentem factis fer ad aethera Troiam."
Quae postquam vates sic ore effatus amico est,
dona dehinc auro gravia sectoque elephanto
imperat ad naves ferri; stipatque carinis
ingens argentum, Dodonaeosque lebetas,
loricam consertam hamis, auroque trilicem,
et conum insignis galeae, cristasque comantes,
arma Neoptolemi. Sunt et sua dona parenti.
Addit equos, additque duces.
Remigium supplet, socios simul instruit armis.
Interea classem velis aptare iubebat
Anchises, fieret vento ne qua mora ferenti.
Quem Phoebi interpres multo compellat honore:
"Coniugio Anchisa Veneris dignate superbo,
cura deum, bis Pergameis erepte ruinis,
ecce tibi Ausoniae tellus; hanc arripe velis:
et tamen hanc pelago praeterlabare necesse est.
Ausoniae pars illa procul, quam pandit Apollo.
Vade, -ait-, o felix nati pietate. Quid ultra
provehor, et fando surgentes demoror Austros?"
Nec minus Andromache digressu maesta supremo
fert picturatas auri subtegmine vestes,
et Phrygiam Ascanio chlamydem; nec cedit honori:
textilibusque onerat donis, ac talia fatur:
"Accipe et haec, manuum tibi quae monumenta mearum
sint, puer, et longum Andromaches testentur amorem
coniugis Hectoreae: cape dona extrema tuorum,
o mihi sola mei super Astyanactis imago!
Sic oculos, sic ille manus, sic ora ferebat:
et nunc aequali tecum pubesceret aevo."
Hos ego digrediens lacrimis affabar obortis:
"Vivite felices, quibus est fortuna peracta
iam sua: nos alia ex aliis in fata vocamur.
Vobis parta quies; nullum maris aequor arandum,
arva neque Ausoniae semper cedentia retro
quaerenda. Effigiem Xanthi, Troiamque videtis,
quam vestrae fecere manus: melioribus opto
auspiciis, et quae fuerit minus obvia Grais.
Si quando Tybrim, vicinaque Tybridis arva
intraro, gentique meae data moenia cernam,
cognatas urbes olim, populosque propinquos
Epiro, Hesperia, quibus idem Dardanus auctor,
atque idem casus, unam faciemus utramque
Troiam animis: maneat nostros ea cura nepotes."
Provehimur pelago vicina Ceraunia iuxta,
unde iter Italiam, cursusque brevissimus undis.
Sol ruit interea, et montes umbrantur opaci.
Sternimur optatae gremio telluris ad undam,
sortiti remos; passimque in litore sicco
corpora curamus: fessos sopor irrigat artus.
Necdum orbem medium nox horis acta subibat;
haud segnis strato surgit Palinurus, et omnes
explorat ventos, atque auribus aëra captat:
sidera cuncta notat tacito labentia caelo,
Arcturum, pluviasque Hyadas, geminosque Triones,
armatumque auro circumspicit Oriona.
Postquam cuncta videt caelo constare sereno,
dat clarum e puppi signum: nos castra movemus,
tentamusque viam, et velorum pandimus alas.
Iamque rubescebat stellis aurora fugatis,
cum procul obscuros colles, humilemque videmus
Italiam. Italiam primus conclamat Achates:
Italiam laeto socii clamore salutant.
Tum pater Anchises magnum cratera corona
induit, implevitque mero, divosque vocavit
stans celsa in puppi:
"Di maris et terrae, tempestatumque potentes,
ferte viam vento facilem, et spirate secundi."
Crebrescunt optatae aurae, portusque patescit
iam propior, templumque apparet in arce Minervae.
Vela legunt socii, et proras ad litora torquent.
Portus ab Eoo fluctu curvatur in arcum,
obiectae salsa spumant aspergine cautes:
ipse latet: gemino demittunt brachia muro
turriti scopuli: refugitque a litore templum.
Quattuor hic (primum omen) equos in gramine vidi
tondentes campum late, candore nivali.
Et pater Anchises: "Bellum, o terra hospita, portas:
bello armantur equi: bella haec armenta minantur.
Sed tamen idem olim curru succedere sueti
quadrupedes, et frena iugo concordia ferre:
spes est pacis" ait. Tum numina sancta precamur
Palladis armisonae, quae prima accepit ovantes:
et capita ante aras Phrygio velamur amictu:
praecipitisque Heleni, dederat quae maxima, rite
Iunoni Argivae iussos adolemus honores.
Haud mora, continuo perfectis ordine votis,
cornua velatarum obvertimus antemnarum:
Graiugenumque domos suspectaque linquimus arva.
Hinc sinus Herculei (si vera est fama) Tarenti
cernitur: attollit se diva Lacinia contra,
Caulonisque arces, et navifragum Scylaceum.
Tum procul e fluctu Trinacria cernitur Aetna:
et gemitum ingentem pelagi pulsataque saxa
audimus longe, fractasque ad litora voces:
exsultantque vada, atque aestu miscentur arenae.
Et pater Anchises: "Nimirum haec illa Charybdis;
hos Helenus scopulos, haec saxa horrenda canebat.
Eripite, o socii, pariterque insurgite remis."
Haud minus ac iussi faciunt: primusque rudentem
contorsit laevas proram Palinurus ad undas:
laevam cuncta cohors remis ventisque petivit.
Tollimur in caelum curvato gurgite et idem
subducta ad manes imos descendimus unda.
Ter scopuli clamorem inter cava saxa dedere:
ter spumam elisam et rorantia vidimus astra.
Interea fessos ventus cum sole reliquit,
ignarique viae Cyclopum adlabimur oris.
Portus ab accessu ventorum immotus, et ingens
ipse; sed horrificis iuxta tonat Aetna ruinis:
interdumque atram prorumpit ad aethera nubem
turbine fumantem piceo et candente favilla:
attollitque globos flammarum et sidera lambit.
Interdum scopulos avulsaque viscera montis
erigit eructans, liquefactaque saxa sub auras
cum gemitu glomerat, fundoque exaestuat imo.
Fama est, Enceladi semustum fulmine corpus
urgeri mole hac, ingentemque insuper Aetnam
impositam, ruptis flammam exspirare caminis;
et, fessum quotiens motat latus, intremere omnem
murmure Trinacriam, et caelum subtexere fumo.
Noctem illam tecti in silvis immania monstra
perferimus: nec, quae sonitum det causa, videmus.
Nem neque erant astrorum ignes, nec lucidus aethra
siderea polus; obscuro sed nubila caelo;
et lunam in nimbo nox intempesta tenebat.
Postera iamque dies primo surgebat Eoo,
humentemque aurora polo dimoverat umbram;
cum subito e silvis, macie confecta suprema,
ignoti nova forma viri, miserandaque cultu
procedit, supplexque manus ad litora tendit.
Respicimus: dira illuvies, inmissaque barba,
confertum tegmen spinis; at cetera Graius:
et quondam patriis ad Troiam missus in armis.
Isque ubi Dardanios habitus, et Troia vidit
arma procul, paulum aspectu conterritus haesit,
continuitque gradum: mox sese ad litora praeceps
cum fletu precibusque tulit: "Per sidera testor,
per superos, atque hoc caeli spirabile lumen;
tollite me, Teucri; quascumque abducite terras:
hoc sat erit. Scio me Danais e classibus unum,
et bello Iliacos fateor petiisse Penates.
Pro quo, si sceleris tanta est iniuria nostri,
spargite me in fluctus, vastoque immergite ponto.
Si pereo manibus hominum, periisse iuvabit."
Dixerat; et genua amplexus, genibusque volutans
haerebat. Quis sit, fari, quo sanguine cretus,
hortamur, quae deinde agitet fortuna, fateri.
Ipse pater dextram Anchises haud multa moratus
dat iuveni, atque animum praesenti pignore firmat.
Ille haec, deposita tandem formidine fatur:
"Sum patria ex Ithaca, comes infelicis Ulixi,
nomine Achaemenides, Troiam genitore Adamasto
pauper (mansissetque utinam fortuna!) profectus.
Hic me, dum trepidi crudelia limina linquunt,
immemores socii vasto Cyclopis in antro
deseruere. Domus sanie dapibusque cruentis
intus opaca, ingens: ipse arduus, altaque pulsat
sidera (di talem terris avertite pestem)
nec visu facilis, nec dictu affabilis ulli:
visceribus miserorum, et sanguine vescitur atro.
Vidi egomet, duo de numero cum corpora nostro
prensa manu magna medio resupinus in antro
frangeret ad saxum, sanieque aspersa natarent
limina: vidi atro cum membra fluentia tabo
manderet, et trepidi tremerent sub dentibus artus.
Haud impune quidem, nec talia passus Ulixes,
oblitusque sui est Ithacus discrimine tanto.
Nam simul expletus dapibus, vinoque sepultus
cervicem inflexam posuit, iacuitque per antrum
immensum, saniem eructans, ac frusta cruento
per somnum commixta mero; nos magna precati
numina, sortitique vices, una undique circum
fundimur, et telo lumen terebramus acuto
ingens, quod torva solum sub fronte latebat,
Argolici clypei, aut Phoebeae lampadis instar;
et tandem laeti sociorum ulciscimur umbras.
Sed fugite, o miseri, fugite, atque ab litore funem
rumpite.
Nam qualis quantusque cavo Polyphemus in antro
lanigeras claudit pecudes, atque ubera pressat,
centum alii curva haec habitant ad litora vulgo
infandi Cyclopes, et altis montibus errant.
Tertia iam lunae se cornua lumine complent,
cum vitam in silvis, inter deserta ferarum
lustra domosque traho; vastosque ab rupe Cyclopas
prospicio, sonitumque pedum, vocemque tremisco.
Victum infelicem baccas, lapidosaque corna
dant rami, et vulsis pascunt radicibus herbae.
Omnia collustrans, hanc primum ad litora classem
conspexi venientem; huic me, quaecumque fuisset,
addixi. Satis est gentem effugisse nefandam.
Vos animam hanc potius quocumque absumite leto."
Vix ea fatus erat, summo cum monte videmus
ipsum inter pecudes vasta se mole moventem
pastorem Polyphemum, et litora nota petentem:
monstrum horrendum, informe, ingens, cui lumen ademptum;
trunca manum pinus regit, et vestigia firmat.
Lanigerae comitantur oves: ea sola voluptas;
solamenque mali de collo fistula pendet.
Postquam altos tetigit fluctus, et ad aequora venit,
luminis effossi fluidum lavit inde cruorem,
dentibus infrendens gemitu; graditurque per aequor
iam medium, nec dum fluctus latera ardua tinxit.
Nos procul inde fugam trepidi celerare, recepto
supplice, sic merito, tacitique incidere funem;
verrimus et proni certantibus aequora remis.
Sensit, et ad sonitum vocis vestigia torsit.
Verum ubi nulla datur dextram affectare potestas,
nec potis Ionios fluctus aequare sequendo,
clamorem immensum tollit, quo pontus et omnes
intremuere undae, penitusque exterrita tellus
Italiae, curvisque immugiit Aetna cavernis.
At genus e silvis Cyclopum, et montibus altis
excitum ruit ad portus, et litora complent.
Cernimus astantes nequiquam lumine torvo
Aetnaeos fratres, caelo capita alta ferentes,
concilium horrendum: quales cum vertice celso
aeriae quercus, aut coniferae cyparissi
constiterant, silva alta Iovis, lucusve Dianae.
Praecipites metus acer agit quocumque rudentes
excutere, et ventis intendere vela secundis.
Contra iussa monent Heleni, Scyllam, atque Charybdin
inter utramque viam, leti discrimine parvo,
ni teneant cursus; certum est dare lintea retro.
Ecce autem Boreas angusta a sede Pelori
missus adest: vivo praetervehor ostia saxo
Pantagiae, Megarosque sinus, Thapsumque iacentem.
Talia monstrabat relegens errata retrorsum
litora Achaemenides, comes infelicis Ulixi.
Sicanio praetenta sinu iacet insula, contra
Plemmyrium undosum; nomen dixere priores
Ortygiam. Alpheum fama est huc Elidis amnem
occultas egisse vias subter mare; qui nunc
ore, Arethusa, tuo Siculis confunditur undis.
Numina magna loci iussi veneramur; et inde
exsupero praepingue solum stagnantis Elori.
Hinc altas cautes, proiectaque saxa Pachyni
radimus; et fatis numquam concessa moveri
apparet Camarina procul, campique Geloi,
immanisque Gela, fluvii cognomine dicta.
Arduus inde Agragas ostentat maxima longe
moenia, magnanimum quondam generator equorum.
Teque datis linquo ventis, palmosa Selinus:
et vada dura lego saxis Lilybaeia caecis.
Hinc Drepani me portus, et illaetabilis ora
accipit. Hic pelagi tot tempestatibus actus,
heu, genitorem, omnis curae casusque levamen,
amitto Anchisen: hic me, pater optime, fessum
deseris, heu tantis nequiquam erepte periclis!
Nec vates Helenus, cum multa horrenda moneret,
hos mihi praedixit luctus, non dira Celaeno.
Hic labor extremus, longarum haec meta viarum.
Hinc me digressum vestris deus appulit oris."
Sic pater Aeneas intentis omnibus unus
fata renarrabat divom, cursusque docebat.
Conticuit tandem, factoque hic fine quievit.
Pōstquām rēs Ăsĭaē, Prĭămīque ēvērtĕrĕ gēntēm
īmmĕrĭtām vīsūm sŭpĕrīs, cĕcĭdītquĕ sŭpērbūm
Īlĭum, ĕt ōmnĭs hŭmō fūmāt Nēptūnĭă Troīă,
dīvērsa ēxsĭlĭa, ēt dēsērtās quaērĕrĕ tērrās
aūgŭrĭīs ăgĭmūr dīvōm: clāssēmquĕ sŭb īpsā
Āntāndro, ēt Phrўgĭaē mōlīmūr mōntĭbŭs Īdaē,
īncērtī quō fātă fĕrānt, ŭbĭ sīstĕrĕ dētūr;
cōntrăhĭmūsquĕ vĭrōs. Vīx prīma īncoēpĕrăt aēstās,
ēt pătĕr Ānchīsēs dărĕ fātīs vēlă iŭbēbāt.
Lītŏră tūm pătrĭaē lăcrĭmāns pōrtūsquĕ rĕlīnquō,
ēt cāmpōs, ŭbĭ Troīă fŭīt. Fĕrŏr ēxsŭl ĭn āltūm
cūm sŏcĭīs nātōquĕ Pĕnātĭbŭs ēt māgnīs dīs.
Tērră prŏcūl vāstīs cŏlĭtūr Māvōrtĭă cāmpīs,
(Thrācĕs ărānt) ăcrī quōndām rēgnātă Lўcūrgō;
hōspĭtĭum āntīquūm Troīaē, sŏcĭīquĕ Pĕnātēs,
dūm fōrtūnă fŭīt. Fĕrŏr hīc, ēt lītŏrĕ cūrvō
moēnĭă prīmă lŏcō, fātīs īngrēssŭs ĭnīquīs;
Aēnĕădāsquĕ mĕō nōmēn dē nōmĭnĕ fīngō.
Sācrā Diōnaēaē mātrī dīvīsquĕ fĕrēbām
aūspĭcĭbūs coēptōrum ŏpĕrūm, sŭpĕrōquĕ nĭtēntēm
caēlĭcŏlūm rēgī māctābam īn lītŏrĕ taūrūm.
Fōrtĕ fŭīt iūxtā tŭmŭlūs, quō cōrnĕă sūmmō
vīrgūlta, ēt dēnsīs hāstīlĭbŭs hōrrĭdă mŷrtūs.
Āccēssī, vĭrĭdēmque ăb hŭmō cōnvēllĕrĕ sīlvām
cōnātūs, rāmīs tĕgĕrem ūt frōndēntĭbŭs ārās,
hōrrēndum, ēt dīctū vĭdĕō mīrābĭlĕ mōnstrūm.
Nām quaē prīmă sŏlō rūptīs rādīcĭbŭs ārbōs
vēllĭtŭr, huīc ātrō līnquūntūr sānguĭnĕ gūttaē,
ēt tērrām tābō măcŭlānt: mĭhĭ frīgĭdŭs hōrrōr
mēmbră quătīt, gĕlĭdūsquĕ cŏīt fōrmīdĭnĕ sānguīs.
Rūrsŭs ĕt āltĕrĭūs lēntūm cōnvēllĕrĕ vīmēn
īnsĕquŏr, ēt caūsās pĕnĭtūs tēntārĕ lătēntēs:
ātĕr ĕt āltĕrĭūs sĕquĭtūr dē cōrtĭcĕ sānguīs.
Mūltă mŏvēns ănĭmō, Nŷmphās vĕnĕrābăr ăgrēstēs,
Grādīvūmquĕ pătrēm, Gĕtĭcīs quī praēsĭdĕt ārvīs,
rītĕ sĕcūndārēnt vīsūs ōmēnquĕ lĕvārēnt.
Tērtĭă sēd pōstquām māiōre hāstīlĭă nīxū
āggrĕdĭōr, gĕnĭbūsque ādvērsae ōblūctŏr ărēnaē,
(ēlŏquăr ān sĭlĕām?) gĕmĭtūs lăcrĭmābĭlĭs īmō
aūdītūr tŭmŭlo, ēt vōx rēddĭtă fērtŭr ăd aūrēs:
"Quīd mĭsĕrum, Aēnēā, lăcĕrās? Iām pārcĕ sĕpūltō,
pārcĕ pĭās scĕlĕrārĕ mănūs. Nōn mē tĭbĭ Troīă
ēxtērnūm tŭlĭt; haūd crŭŏr hīc dē stīpĭtĕ mānāt.
Heū fŭgĕ crūdēlēs tērrās, fŭgĕ lītŭs ăvārūm.
Nām Pŏlўdōrŭs ĕgo: hīc cōnfīxūm fērrĕă tēxīt
tēlōrūm sĕgĕs, ēt iăcŭlīs īncrēvĭt ăcūtīs."
Tūm vēro āncĭpĭtī mēntēm fōrmīdĭnĕ prēssūs
ōbstŭpŭī, stĕtĕrūntquĕ cŏmae, ēt vōx faūcĭbŭs haēsīt.
Hūnc Pŏlўdōrum aūrī quōndām cūm pōndĕrĕ māgnō
īnfēlīx Prĭămūs fūrtīm māndārăt ălēndūm
Thrēĭcĭō rēgī, cūm iām dīffīdĕrĕt ārmīs
Dārdănĭaē, cīngīque ūrbem ōbsĭdĭōnĕ vĭdērēt.
Īlle, ŭt ŏpēs frāctaē Teūcrum, ēt fōrtūnă rĕcēssīt,
rēs Ăgămēmnŏnĭās, vīctrīcĭăque ārmă sĕcūtūs,
fās ōmne ābrūmpīt: Pŏlўdōrum ōbtrūncăt, ĕt aūrō
vī pŏtĭtūr. Quīd nōn mōrtālĭă pēctŏră cōgīs
aūrī sācră fămēs? Pōstquām păvŏr ōssă rĕlīquīt,
dēlēctōs pŏpŭli ād prŏcĕrēs, prīmūmquĕ părēntēm
mōnstră dĕūm rĕfĕro, ēt quaē sīt sēntēntĭă pōscō.
Ōmnĭbŭs īdem ănĭmūs, scĕlĕrāta ēxcēdĕrĕ tērrā,
līnquĕrĕ pōllūtum hōspĭtĭum, ēt dărĕ clāssĭbŭs Aūstrōs.
Ērgo īnstaūrāmūs Pŏlўdōrō fūnŭs, ĕt īngēns
āggĕrĭtūr tŭmŭlō tēllūs. Stānt mānĭbŭs āraē
caērŭlĕīs maēstaē vīttīs, ātrāquĕ cŭprēssū:
ēt cīrcum Īlĭădaē crīnēm dē mōrĕ sŏlūtaē.
Īnfĕrĭmūs tĕpĭdō spūmāntĭă cŷmbĭă lāctĕ,
sānguĭnĭs ēt sācrī pătĕrās; ănĭmāmquĕ sĕpūlcrō
cōndĭmŭs, ēt māgnā sūprēmūm vōcĕ cĭēmūs.
Īnde, ŭbĭ prīmă fĭdēs pĕlăgō, plācātăquĕ vēntī
dānt mărĭa, ēt lēnīs crĕpĭtāns vŏcăt Aūstĕr ĭn āltūm,
dēdūcūnt sŏcĭī nāvēs, ēt lītŏră cōmplēnt.
Prōvĕhĭmūr pōrtū; tērraēque ūrbēsquĕ rĕcēdūnt.
Sācră mărī cŏlĭtūr mĕdĭō grātīssĭmă tēllūs
Nērĕĭdūm mātrī, | ēt Nēptūnō | Aēgaēō:
quām pĭŭs Ārcĭtĕnēns ōrās ēt lītŏră cīrcūm
ērrāntēm, Mўcŏnē cēlsā, Gўărōquĕ rĕvīnxīt:
īmmōtāmquĕ cŏlī dĕdĭt, ēt cōntēmnĕrĕ vēntōs.
Hūc fĕrŏr: haēc fēssōs tūtō plăcĭdīssĭmă pōrtū
āccĭpĭt: ēgrēssī vĕnĕrāmŭr Ăpōllĭnĭs ūrbēm.
Rēx Ănĭūs, rēx īdem hŏmĭnūm, Phoēbīquĕ săcērdōs,
vīttīs, ēt sācrā rĕdĭmītūs tēmpŏră laūrō
ōccūrrīt; vĕtĕrem Ānchīsēn āgnōscĭt ămīcūm.
Iūngĭmŭs hōspĭtĭō dēxtrās ēt tēctă sŭbīmūs.
Tēmplă dĕī sāxō vĕnĕrābār strūctă vĕtūstō:
"Dā prŏprĭām, Thŷmbraēĕ, dŏmūm, dā moēnĭă fēssīs,
ēt gĕnŭs, ēt mānsūram ūrbēm: sērva āltĕră Troīaē
Pērgămă, rēlĭquĭās Dănăum, ātque īmmītĭs Ăchīllī.
Quēm sĕquĭmūr? Quōve īrĕ iŭbēs? Ŭbĭ pōnĕrĕ sēdēs?
Dā pătĕr aūgŭrĭum, ātque ănĭmīs īllābĕrĕ nōstrīs."
Vīx ĕă fātŭs ĕrām, trĕmĕre ōmnĭă vīsă rĕpēntĕ,
līmĭnăquē, laūrūsquĕ dĕī, tōtūsquĕ mŏvērī
mōns cīrcum, ēt mūgīre ădўtīs cōrtīnă rĕclūsīs.
Sūbmīssī pĕtĭmūs tērram, ēt vōx fērtŭr ăd aūrēs:
"Dārdănĭdaē dūrī, quaē vōs ā stīrpĕ părēntūm
prīmă tŭlīt tēllūs, ĕădēm vōs ūbĕrĕ laētō
āccĭpĭēt rĕdŭcēs: āntīquam ēxquīrĭtĕ mātrēm.
Hīc dŏmŭs Aēnēaē cūnctīs dŏmĭnābĭtŭr ōrīs,
ēt nātī nātōrum, ēt quī nāscēntŭr ăb īllīs."
Haēc Phoēbūs: mīstōque īngēns ēxōrtă tŭmūltū
laētĭtĭa; ēt cūnctī, quaē sīnt ĕă moēnĭă, quaērūnt;
quō Phoēbūs vŏcĕt ērrāntēs, iŭbĕātquĕ rĕvērtī.
Tūm gĕnĭtōr vĕtĕrūm vōlvēns mŏnĭmēntă vĭrōrūm:
"Aūdīte, ō prŏcĕrēs, -ăĭt-, ēt spēs dīscĭtĕ vēstrās.
Crētă Iŏvīs māgnī mĕdĭō iăcĕt īnsŭlă pōntō,
mōns Īdaēŭs ŭbi, ēt gēntīs cūnābŭlă nōstraē.
Cēntum ūrbēs hăbĭtānt māgnās, ūbērrĭmă rēgnă:
māxĭmŭs ūndĕ pătēr (sī rīte aūdītă rĕcōrdōr)
Teūcrūs Rhoētēās prīmum ēst āvēctŭs ăd ōrās,
ōptāvītquĕ lŏcūm rēgnō. Nōndum Īlĭum ĕt ārcēs
Pērgămĕaē stĕtĕrānt: hăbĭtābānt vāllĭbŭs īmīs.
Hīnc mātēr cūltrīx Cўbĕlē, Cŏrўbāntĭăque aēră,
Īdaēūmquĕ nĕmūs: hīnc fīdă sĭlēntĭă sācrīs:
ēt iūnctī cūrrūm dŏmĭnaē sŭbĭērĕ lĕōnēs.
Ērgo, ăgĭte, ēt, dīvōm dūcūnt quā iūssă, sĕquāmūr:
plācēmūs vēntōs, ēt Gnōssĭă rēgnă pĕtāmūs.
Nēc lōngō dīstānt cūrsū: mŏdŏ Iūppĭtĕr ādsīt,
tērtĭă lūx clāssēm Crētaēīs sīstĕt ĭn ōrīs."
Sīc fātūs, mĕrĭtōs ārīs māctāvĭt hŏnōrēs,
taūrūm Nēptūnō, taūrūm tĭbĭ, pūlchĕr Ăpōllō,
nīgram Hўĕmī pĕcŭdēm, Zĕphўrīs fēlīcĭbŭs ālbām.
Fāmă vŏlāt pūlsūm rēgnīs cēssīssĕ pătērnīs
Īdŏmĕnēă dŭcēm, dēsērtăquĕ lītŏră Crētaē,
hōstĕ văcārĕ dŏmōs, sēdēsque ādstārĕ rĕlīctās.
Līnquĭmŭs Ōrtўgĭaē pōrtūs, pĕlăgōquĕ vŏlāmūs:
bācchātāmquĕ iŭgīs Nāxōn, vĭrĭdēmquĕ Dŏnūsām,
Ōlĕărōn, nĭvĕāmquĕ Părōn, spārsāsquĕ pĕr aēquōr
Cŷclădăs, ēt crēbrīs lĕgĭmūs frĕtă cōnsĭtă tērrīs.
Naūtĭcŭs ēxŏrĭtūr vărĭō cērtāmĭnĕ clāmōr:
hōrtāntūr sŏcĭī Crētām prŏăvōsquĕ pĕtāmūs.
Prōsĕquĭtūr sūrgēns ā pūppī vēntŭs ĕūntēs,
ēt tāndem āntīquīs Cūrētum āllābĭmŭr ōrīs.
Ērgo ăvĭdūs mūrōs ōptātaē mōlĭŏr ūrbīs,
Pērgămĕāmquĕ vŏco: ēt laētām cōgnōmĭnĕ gēntēm
hōrtŏr ămārĕ fŏcōs, ārcēmque āttōllĕrĕ tēctīs.
Iāmquĕ fĕrē sīccō sūbdūctaē lītŏrĕ pūppēs;
cōnnŭbĭīs, ārvīsquĕ nŏvīs ŏpĕrātă iŭvēntūs;
iūră dŏmōsquĕ dăbām: sŭbĭtō cūm tābĭdă mēmbrīs
cōrrūptō caēlī trāctū, mĭsĕrāndăquĕ vēntī
ārbŏrĭbūsquĕ sătīsquĕ lŭēs ēt lēthĭfĕr ānnūs.
Līnquēbānt dūlcēs ănĭmās, aūt aēgră trăhēbānt
cōrpŏră: tūm stĕrĭlēs ēxūrĕrĕ Sŷrĭŭs āgrōs;
ārēbānt hērbae, ēt vīctūm sĕgĕs aēgră nĕgābāt.
Rūrsŭs ăd ōrăcŭlum Ōrtўgĭaē, Phoēbūmquĕ rĕmēnsō
hōrtātūr pătĕr īrĕ mărī, vĕnĭāmquĕ prĕcārī:
quēm fēssīs fīnēm rēbūs fĕrăt; ūndĕ lăbōrūm
tēntāre aūxĭlĭūm iŭbĕāt; quō vērtĕrĕ cūrsūs.
Nōx ĕrăt, ēt tērrīs ănĭmālĭă sōmnŭs hăbēbāt:
ēffĭgĭēs sācraē dīvōm, Phrўgĭīquĕ Pĕnātēs,
quōs mēcum ē Troīā, mĕdĭīsque ēx īgnĭbŭs ūrbīs
ēxtŭlĕrām, vīsi ānte ŏcŭlōs ādstārĕ iăcēntīs
īn sōmnīs, mūltō mănĭfēstī lūmĭnĕ, quā sē
plēnă pĕr īnsērtās fūndēbāt lūnă fĕnēstrās.
Tūm sīc āffāri, ēt cūrās hīs dēmĕrĕ dīctīs:
"Quōd tĭbĭ dēlāto Ōrtўgĭām dīctūrŭs Ăpōllo ēst,
hīc cănĭt, ēt tŭă nōs ēn ūltro ād līmĭnă mīttīt.
Nōs tē, Dārdănĭa īncēnsā, tŭăque ārmă sĕcūtī,
nōs tŭmĭdūm sūb tē pērmēnsī clāssĭbŭs aēquōr,
īdēm vēntūrōs tōllēmŭs ĭn āstră nĕpōtēs,
īmpĕrĭūmque ūrbī dăbĭmūs: tū moēnĭă māgnīs
māgnă părā, lōngūmquĕ fŭgaē nē līnquĕ lăbōrēm.
Mūtāndaē sēdēs: nōn haēc tĭbĭ lītŏră suāsīt
Dēlĭŭs, aūt Crētaē iūssīt cōnfīdĕre Ăpōllŏ.
Ēst lŏcŭs, Hēspĕrĭām Grāī cōgnōmĭnĕ dīcūnt,
tērra āntīquă, pŏtēns ārmīs, ātque ūbĕrĕ glēbaē:
Oēnŏtrĭī cŏlŭērĕ vĭrī: nūnc fāmă mĭnōrēs
Ītălĭām dīxīssĕ, dŭcīs dē nōmĭnĕ gēntēm.
Haē nōbīs prŏprĭaē sēdēs: hīnc Dārdănŭs ōrtūs,
Īăsĭūsquĕ pătēr, gĕnŭs ā quō prīncĭpĕ nōstrūm.
Sūrge ăge, ĕt haēc laētūs lōngaēvō dīctă părēntī
haūd dŭbĭtāndă rĕfēr. Cŏrĭtūm tērrāsquĕ rĕquīrĕ
Aūsŏnĭās: Dīctaēă nĕgāt tĭbĭ Iūppĭtĕr ārvă."
Tālĭbŭs āttŏnĭtūs vīsīs, āc vōcĕ dĕōrūm,
(nēc sŏpŏr īllŭd ĕrāt; sēd cōram āgnōscĕrĕ vōltūs,
vēlātāsquĕ cŏmās, praēsēntĭăque ōră vĭdēbār:
tūm gĕlĭdūs tōtō mānābāt cōrpŏrĕ sūdōr)
cōrrĭpĭo ē strātīs cōrpūs, tēndōquĕ sŭpīnās
ād caēlūm cūm vōcĕ mănūs, ēt mūnĕră lībō
īntĕmĕrātă fŏcīs. Pērfēctō laētŭs hŏnōrĕ
Ānchīsēn făcĭō cērtūm, rēmque ōrdĭnĕ pāndō.
Āgnōvīt prōlem āmbĭgŭām, gĕmĭnōsquĕ părēntēs
sēquĕ nŏvō vĕtĕrūm dēcēptum ērrōrĕ lŏcōrūm.
Tūm mĕmŏrāt: "Nāte Īlĭăcīs ēxērcĭtĕ fātīs,
sōlă mĭhī tālēs cāsūs Cāssāndră cănēbāt:
nūnc rĕpĕto haēc gĕnĕrī pōrtēndĕrĕ dēbĭtă nōstrō,
ēt saēpe Hēspĕrĭām, saēpe Ītălă rēgnă vŏcārĕ.
Sēd quĭs ăd Hēspĕrĭaē vēntūrōs lītŏră Teūcrōs
crēdĕrĕt? Aūt quēm tūm vātēs Cāssāndră mŏvērēt?
Cēdāmūs Phoēbo, ēt mŏnĭtī mĕlĭōră sĕquāmūr."
Sīc ăĭt: ēt cūnctī dīctīs pārēmŭs ŏvāntēs.
Hānc quŏquĕ dēsĕrĭmūs sēdēm, paūcīsquĕ rĕlīctīs,
vēlă dămūs, vāstūmquĕ căvā trăbĕ cūrrĭmŭs aēquōr.
Pōstquam āltūm tĕnŭērĕ rătēs, nēc iam āmplĭŭs ūllaē
āppārēnt tērraē, caēlum ūndĭque, ĕt ūndĭquĕ pōntūs,
tūm mĭhĭ caērŭlĕūs sūprā căpŭt āstĭtĭt īmbēr,
nōctem hĭĕmēmquĕ fĕrēns, ĕt ĭnhōrrŭĭt ūndă tĕnēbrīs.
Cōntĭnŭō vēntī vōlvūnt mărĕ, māgnăquĕ sūrgūnt
aēquŏră: dīspērsī iāctāmūr gūrgĭtĕ vāstō.
Īnvōlvērĕ dĭēm nīmbi, ēt nōx hūmĭdă caēlūm
ābstŭlĭt: īngĕmĭnānt ābrūptīs nūbĭbŭs īgnēs.
Ēxcŭtĭmūr cūrsu, ēt caēcīs ērrāmŭs ĭn ūndīs.
Īpsĕ dĭēm nōctēmquĕ nĕgāt dīscērnĕrĕ caēlō,
nēc mĕmĭnīssĕ vĭaē mĕdĭā Pălĭnūrŭs ĭn ūndā.
Trēs ădĕo īncērtōs caēcā cālīgĭnĕ sōlēs
ērrāmūs pĕlăgō, tŏtĭdēm sĭnĕ sīdĕrĕ nōctēs.
Quārtō tērră dĭē prīmūm se āttōllĕrĕ tāndēm
vīsa, ăpĕrīrĕ prŏcūl mōntēs, āc vōlvĕrĕ fūmūm.
Vēlă cădūnt: rēmīs īnsūrgĭmŭs: haūd mŏră; naūtaē
ādnīxī tōrquēnt spūmās ēt caērŭlă vērrūnt.
Sērvātum ēx ūndīs Strŏphădūm mē lītŏră prīmūm
āccĭpĭūnt. Strŏphădēs Grāiō stānt nōmĭnĕ dīctaē
īnsūlae Īŏnĭo īn māgnō: quās dīră Cĕlaēnō
Hārpyīaēquĕ cŏlūnt ălĭaē, Phīnēĭă pōstquām
claūsă dŏmūs, mēnsāsquĕ mĕtū līquērĕ prĭōrēs.
Trīstĭŭs haūd īllīs mōnstrūm, nēc saēvĭŏr ūllă
pēstĭs, ĕt īră dĕūm Stўgĭīs sēse ēxtŭlĭt ūndīs.
Vīrgĭnĕī vŏlŭcrūm vōltūs, foēdīssĭmă vēntrīs
prōlŭvĭēs, ūncaēquĕ mănūs, ēt pāllĭdă sēmpēr
ōră fămē.
Hūc ŭbĭ dēlātī pōrtūs īntrāvĭmŭs, ēccĕ
laētă bŏūm pāssīm cāmpīs ārmēntă vĭdēmūs,
cāprĭgĕnūmquĕ pĕcūs, nūllō cūstōdĕ, pĕr hērbām.
Īrrŭĭmūs fērro; ēt dīvōs īpsūmquĕ vŏcāmūs
īn praēdām pārtēmquĕ Iŏvēm: tūm lītŏrĕ cūrvō
ēxstrŭĭmūsquĕ tŏrōs, dăpĭbūsque ĕpŭlāmŭr ŏpīmīs.
Āt sŭbĭtae hōrrĭfĭcō lāpsū dē mōntĭbŭs ādsūnt
Hārpўĭae, ēt māgnīs quătĭūnt clāngōrĭbŭs ālās,
dīrĭpĭūntquĕ dăpēs, cōntāctūque ōmnĭă foēdānt
īmmūndō: tūm vōx taētrūm dīra īntĕr ŏdōrēm.
Rūrsum īn sēcēssū lōngō, sūb rūpĕ căvātā,
ārbŏrĭbūs claūsī cīrcum ātque hōrrēntĭbŭs ūmbrīs
īnstrŭĭmūs mēnsās, ārīsquĕ rĕpōnĭmŭs īgnēm.
Rūrsum ēx dīvērsō caēlī, caēcīsquĕ lătēbrīs
tūrbă sŏnāns praēdām pĕdĭbūs cīrcūmvŏlăt ūncīs;
pōllŭĭt ōrĕ dăpēs. Sŏcĭīs tūnc ārmă căpēssānt
ēdīco, ēt dīrā bēllūm cūm gēntĕ gĕrēndūm.
Haūd sĕcŭs āc iūssī făcĭūnt, tēctōsquĕ pĕr hērbām
dīspōnūnt ēnsēs, ēt scūtă lătēntĭă cōndūnt.
Ērgo, ŭbĭ dēlāpsaē sŏnĭtūm pēr cūrvă dĕdērĕ
lītŏră, dāt sīgnūm spĕcŭlā Mīsēnŭs ăb āltā
aērĕ căvo: īnvādūnt sŏcĭi, ēt nŏvă proēlĭă tēmptānt,
ōbscēnās pĕlăgī fērrō foēdārĕ vŏlūcrēs.
Sēd nĕquĕ vīm plūmīs ūllām, nēc vōlnĕră tērgō
āccĭpĭūnt; cĕlĕrīquĕ fŭgā sūb sīdĕră lāpsaē,
sēmēsām praēdam, ēt vēstīgĭă foēdă rĕlīnquūnt,
ūna īn praēcēlsā cōnsēdīt rūpĕ Cĕlaēnō,
īnfēlīx vātēs, rūpītque hānc pēctŏrĕ vōcēm:
"Bēllum ĕtĭām prō caēdĕ bŏūm, strātīsquĕ iŭvēncīs,
Lāŏmĕdōntĭădaē, bēllūmne īnfērrĕ părātīs?
Ēt pătrĭo īnsōntēs Hārpyīās pēllĕrĕ rēgnō?
Āccĭpĭte ērgo ănĭmīs, ātque haēc mĕă fīgĭtĕ dīctă:
quaē Phoēbō pătĕr ōmnĭpŏtēns, mĭhĭ Phoēbŭs Ăpōllŏ
praēdīxīt, vōbīs fŭrĭārum ĕgŏ māxĭmă pāndō.
Ītălĭām cūrsū pĕtĭtīs, vēntīsquĕ vŏcātīs,
ībĭtĭs Ītălĭām, pōrtūsque īntrārĕ lĭcēbīt.
Sēd nōn āntĕ dătām cīngētīs moēnĭbŭs ūrbēm,
quām vōs dīră fămēs, nōstraēque īniūrĭă caēdīs
āmbēsās sŭbĭgāt mālīs ābsūmĕrĕ mēnsās."
Dīxĭt, ĕt īn sīlvām pēnnīs āblātă rĕfūgīt.
Āt sŏcĭīs sŭbĭtā gĕlĭdūs fōrmīdĭnĕ sānguīs
dīrĭgŭīt: cĕcĭdēre ănĭmī: nēc iam āmplĭŭs ārmīs,
sēd vōtīs prĕcĭbūsquĕ iŭbēnt ēxpōscĕrĕ pācēm:
sīvĕ dĕaē, seū sīnt dīrae ōbscaēnaēquĕ vŏlūcrēs.
Āt pătĕr Ānchīsēs, pāssīs dē lītŏrĕ pālmīs,
nūmĭnă māgnă vŏcāt, mĕrĭtōsque īndīcĭt hŏnōrēs:
"Dī prŏhĭbētĕ mĭnās, dī tālem āvērtĭtĕ cāsūm,
ēt plăcĭdī sērvātĕ pĭōs." Tūm lītŏrĕ fūnēm
dīrĭpĕre, ēxcūssōsquĕ iŭbēt lāxārĕ rŭdēntēs.
Tēndūnt vēlă Nŏtī: fŭgĭmūs spūmāntĭbŭs ūndīs,
quā cūrsūm vēntūsquĕ gŭbērnātōrquĕ vŏcābānt.
Iām mĕdĭo āppārēt flūctū nĕmŏrōsă Zăcŷnthōs,
Dūlĭchĭūmquĕ, Sămēque ēt Nērĭtŏs ārdŭă sāxīs.
Ēffŭgĭmūs scŏpŭlōs Ĭthăcaē, Lāērtĭă rēgnă;
ēt tērram āltrīcēm saēvi ēxsēcrāmŭr Ŭlīxīs.
Mōx ēt Leūcātaē nīmbōsă căcūmĭnă mōntīs,
ēt fōrmīdātūs naūtīs ăpĕrītŭr Ăpōllŏ.
Hūnc pĕtĭmūs fēssi, ēt pārvaē sūccēdĭmŭs ūrbī:
ānchŏră dē prōrā iăcĭtūr, stānt lītŏrĕ pūppēs.
Ērgo īnspērātā tāndēm tēllūrĕ pŏtītī,
lūstrāmūrquĕ Iŏvī, vōtīsque īncēndĭmŭs ārās,
Āctĭăque Īlĭăcīs cĕlĕbrāmūs lītŏră lūdīs.
Ēxērcēnt pătrĭās ŏlĕō lābēntĕ pălaēstrās
nūdātī sŏcĭī. iŭvăt ēvāsīssĕ tŏt ūrbēs
Ārgŏlĭcās, mĕdĭōsquĕ fŭgām tĕnŭīssĕ pĕr hōstēs.
Īntĕrĕā māgnūm sōl cīrcūmvōlvĭtŭr ānnūm,
ēt glăcĭālĭs hĭēms Ăquĭlōnĭbŭs āspĕrăt ūndās.
Aērĕ căvō clўpĕūm, māgnī gēstāmĕn Ăbāntīs,
pōstĭbŭs ādvērsīs fīgo, ēt rēm cārmĭnĕ sīgnō:
Aēnēās haēc dē Dănăīs vīctōrĭbŭs ārmă.
Līnquĕrĕ tūm pōrtūs iŭbĕo, ēt cōnsīdĕrĕ trānstrīs.
Cērtātīm sŏcĭī fĕrĭūnt măre, ĕt aēquŏră vērrūnt.
Prōtĭnŭs aērīās Phaēācum ābscōndĭmŭs ārcēs,
lītŏrăque Ēpīrī lĕgĭmūs, pōrtūquĕ sŭbīmūs
Chāŏnĭo, ēt cēlsām Būthrōti ābscēdĭmŭs ūrbēm.
Hīc īncrēdĭbĭlīs rērūm fāma ōccŭpăt aūrēs,
Prīămĭdēn Hĕlĕnūm Grāiās rēgnārĕ pĕr ūrbēs,
cōniŭgĭo Aēăcĭdaē Pŷrrhī, scēptrīsquĕ pŏtītūm;
ēt pătrĭo Āndrŏmăchēn ĭtĕrūm cēssīssĕ mărītō.
Ōbstŭpŭī: mīrōque īncēnsūm pēctŭs ămōrĕ
cōmpēllārĕ vĭrum, ēt cāsūs cōgnōscĕrĕ tāntōs.
Prōgrĕdĭōr pōrtū, clāssēs ēt lītŏră līnquēns.
Sōllēmnēs tūm fōrtĕ dăpēs ēt trīstĭă dōnă
ānte ūrbem īn lūcō, fālsī Sĭmŏēntĭs ăd ūndām,
lībābāt cĭnĕri Āndrŏmăchē, mānēsquĕ vŏcābāt
Hēctŏrĕum ād tŭmŭlūm; vĭrĭdī quēm cēspĭte ĭnānēm,
ēt gĕmĭnās, caūsām lăcrĭmīs, sācrāvĕrăt ārās.
Ūt mē cōnspēxīt vĕnĭēntem, ēt Trōĭă cīrcūm
ārma āmēns vīdīt, māgnīs ēxtērrĭtă mōnstrīs,
dīrĭgŭīt vīsu īn mĕdĭō; călŏr ōssă rĕlīquīt.
Lābĭtŭr ēt lōngō vīx tāndēm tēmpŏrĕ fātūr:
"Vērănĕ tē făcĭēs, vērūs mĭhĭ nūntĭŭs āffērs,
nātĕ dĕā? Vīvīsne? Aūt, sī lūx ālmă rĕcēssīt,
Hēctŏr ŭbi ēst?" dīxīt, lăcrĭmāsque ēffūdĭt, ĕt ōmnēm
īmplēvīt clāmōrĕ lŏcūm. Vīx paūcă fŭrēntī
sūbĭcĭo, ēt rārīs tūrbātūs vōcĭbŭs hīscō:
"Vīvo ĕquĭdēm, vītāmque ēxtrēmă pĕr ōmnĭă dūcō.
Nē dŭbĭtā, nām vēră vĭdēs.
Heū, quīs tē cāsūs dēiēctām cōniŭgĕ tāntō
ēxcĭpĭt? Aūt quaē dīgnă sătīs fōrtūnă rĕvīsīt?
Hēctŏrĭs Āndrŏmăchē Pŷrrhīn cōnnūbĭă sērvās?"
Dēĭĕcīt vōltum, ēt dēmīssā vōcĕ lŏcūta ēst:
"Ō fēlīx ūna ānte ălĭās Prĭămēĭă vīrgŏ,
hōstīlem ād tŭmŭlūm Troīaē sūb moēnĭbŭs āltīs
iūssă mŏrī: quaē sōrtītūs nōn pērtŭlĭt ūllōs,
nēc vīctōrĭs hĕrī tĕtĭgīt cāptīvă cŭbīlĕ.
Nōs, pătrĭa īncēnsā, dīvērsă pĕr aēquŏră vēctaē,
stīrpĭs Ăchīllēaē fāstūs, iŭvĕnēmquĕ sŭpērbūm
sērvĭtĭo ēnīxaē tŭlĭmūs: quī deīndĕ sĕcūtūs
Lēdaēam Hērmiōnēn, Lăcĕdaēmŏnĭōsque Hўmĕnaēōs,
mē fămŭlām, fămŭlōque Hĕlĕnō trānsmīsĭt hăbēndām.
Āst īllum, ērēptaē māgno īnflāmmātŭs ămōrĕ
cōniŭgĭs, ēt scĕlĕrūm fŭrĭīs ăgĭtātŭs Ŏrēstēs,
ēxcĭpĭt īncaūtūm, pătrĭāsque ōbtrūncăt ăd ārās.
Mōrtĕ Nĕōptŏlĕmī rēgnōrūm rēddĭtă cēssīt
pārs Hĕlĕnō, quī Chāŏnĭōs cōgnōmĭnĕ cāmpōs,
Chāŏnĭāmque ōmnēm Trōiāno ā Chāŏnĕ dīxīt:
Pērgămăque, Īlĭăcāmquĕ iŭgīs hānc āddĭdĭt ārcēm.
Sēd tĭbĭ quī cūrsūm vēntī, quaē fātă dĕdērĕ?
Aūt quīs te īgnārūm nōstrīs dĕŭs āppŭlĭt ōrīs?
Quīd pŭĕr Āscănĭūs? Sŭpĕrātne, ēt vēscĭtŭr aūrā?
Quēm tĭbĭ iām Trōiā.
Ēcquaē iām pŭĕro ēst āmīssaē cūră părēntīs?
Ēcquĭd ĭn āntīquām vīrtūtem, ănĭmōsquĕ vĭrīlēs
ēt pătĕr Aēnēās, ĕt ăvūncŭlŭs ēxcĭtăt Hēctōr?"
Tālĭă fūndēbāt lăcrĭmāns, lōngōsquĕ cĭēbāt
īncāssūm flētūs: cūm sēse ā moēnĭbŭs hērōs
Prīămĭdēs Hĕlĕnūs mūltīs cŏmĭtāntĭbŭs āffērt:
āgnōscītquĕ sŭōs, laētūsque ād moēnĭă dūcīt,
ēt mūltūm lăcrĭmās vērba īntēr sīngŭlă fūndīt.
Prōcēdo, ēt pārvām Troīām, sĭmŭlātăquĕ māgnīs
Pērgăma, ĕt ārēntēm Xānthī cōgnōmĭnĕ rīvūm
āgnōscō, Scaēaēque āmplēctōr līmĭnă pōrtaē.
Nēc nōn ēt Teūcrī sŏcĭā sĭmŭl ūrbĕ frŭūntūr.
Īllōs pōrtĭcĭbūs rēx āccĭpĭēbăt ĭn āmplīs.
Aūlāi īn mĕdĭō lībābānt pōcŭlă Bācchī,
īmpŏsĭtīs aūrō dăpĭbūs, pătĕrāsquĕ tĕnēbānt.
Iāmquĕ dĭēs, āltērquĕ dĭēs prōcēssĭt, ĕt aūraē
vēlă vŏcānt, tŭmĭdōque īnflātūr cārbăsŭs Aūstrō.
Hīs vātem āggrĕdĭōr dīctīs, āc tālĭă quaēsō:
"Trōiŭgĕna, īntērprēs dīvōm, quī nūmĭnă Phoēbī,
quī trĭpŏdās, Clărĭī laūrōs, quī sīdĕră sēntīs,
ēt vŏlŭcrūm līnguās, ēt praēpĕtĭs ōmnĭă pēnnaē,
fāre ăgĕ: (nāmque ōmnēm cūrsūm mĭhĭ prōspĕră dīxīt
rēlĭgĭo, ēt cūnctī sŭăsērūnt nūmĭnĕ dīvī
Ītălĭām pĕtĕre, ēt tērrās tēntārĕ rĕpōstās:
sōlă nŏvūm, dīctūquĕ nĕfās Hārpyīă Cĕlaēnō
prōdĭgĭūm cănĭt, ēt trīstēs dēnūntĭăt īrās,
ōbscaēnāmquĕ fămēm) quaē prīmă pĕrīcŭlă vītō?
Quīdvĕ sĕquēns tāntōs pōssīm sŭpĕrārĕ lăbōrēs?"
Hīc Hĕlĕnūs, caēsīs prīmūm dē mōrĕ iŭvēncīs,
ēxōrāt pācēm dīvōm, vīttāsquĕ rĕsōlvīt
sācrātī căpĭtīs; mēque ād tŭă līmĭnă, Phoēbē,
īpsĕ mănū mūltō sūspēnsūm nūmĭnĕ dūcīt:
ātque haēc deīndĕ cănīt dīvīno ēx ōrĕ săcērdōs:
"Nātĕ dĕā (nām tē māiōrĭbŭs īrĕ pĕr āltūm
aūspĭcĭīs mănĭfēstă fĭdēs: sīc fātă dĕūm rēx
sōrtītūr, vōlvītquĕ vĭcēs; īs vērtĭtŭr ōrdŏ)
paūcă tĭbi ē mūltīs, quō tūtĭŏr hōspĭtă lūstrēs
aēquŏra, ĕt Aūsŏnĭō pōssīs cōnsīdĕrĕ pōrtū,
ēxpĕdĭām dīctīs: prŏhĭbēnt nām cētĕră Pārcaē
scīre Hĕlĕnūm, fārīquĕ vĕtāt Sātūrnĭă Iūnō.
Prīncĭpĭo Ītălĭām, quām tū iām rērĕ prŏpīnquām,
vīcīnōsque, īgnārĕ, părās īnvādĕrĕ pōrtūs,
lōngă prŏcūl lōngīs vĭă dīvĭdĭt īnvĭă tērrīs.
Ānte ēt Trīnăcrĭā lēntāndūs rēmŭs ĭn ūndā,
ēt sălĭs Aūsŏnĭī lūstrāndūm nāvĭbŭs aēquōr,
īnfērnīquĕ lăcūs, Aēaēaēque īnsŭlă Cīrcēs,
quām tūtā pōssīs ūrbēm cōmpōnĕrĕ tērrā.
Sīgnă tĭbī dīcām: tū cōndĭtă mēntĕ tĕnētō.
Cūm tĭbĭ sōllĭcĭtō sēcrēti ād flūmĭnĭs ūndām,
lītŏrĕīs īngēns īnvēntă sŭb īlĭcĭbūs sūs
trīgīntā căpĭtūm foētūs ēnīxă iăcēbīt,
ālbă sŏlō rĕcŭbāns, ālbī cīrcum ūbĕră nātī:
īs lŏcŭs ūrbĭs ĕrīt, rĕquĭēs ĕă cērtă lăbōrūm.
Nēc tū mēnsārūm mōrsūs hōrrēscĕ fŭtūrōs:
fātă vĭam īnvĕnĭēnt, ădĕrītquĕ vŏcātŭs Ăpōllŏ.
Hās aūtēm tērrās, Ĭtălīque hānc lītŏrĭs ōrām,
prōxĭmă quaē nōstrī pērfūndĭtŭr aēquŏrĭs aēstū,
ēffŭgĕ: cūnctă mălīs hăbĭtāntūr moēnĭă Grāīs.
Hīc ēt Nārўcĭī pŏsŭērūnt moēnĭă Lōcrī:
ēt Sālēntīnōs ōbsēdīt mīlĭtĕ cāmpōs
Lŷctĭŭs Īdŏmĕneūs: hīc īllă dŭcīs Mĕlĭboēī
pārvă Phĭlōctētaē sūbnīxă Pĕtīlĭă mūrō.
Quīn, ŭbĭ trānsmīssaē stĕtĕrīnt trāns aēquŏră clāssēs,
ēt pŏsĭtīs ārīs iām vōta īn lītŏrĕ sōlvēs,
pūrpŭrĕō vēlārĕ cŏmās ădŏpērtŭs ămīctū;
nē qua īntēr sānctōs īgnēs ĭn hŏnōrĕ dĕōrūm
hōstīlīs făcĭēs ōccūrrăt, ĕt ōmĭnă tūrbēt.
Hūnc sŏcĭī mōrēm sācrōrum, hūnc īpsĕ tĕnētō:
hāc cāstī mănĕānt īn rēlĭgĭōnĕ nĕpōtēs.
Āst ŭbĭ dīgrēssūm Sĭcŭlaē te ādmōvĕrĭt ōraē
vēntŭs, ĕt āngūstī rārēscēnt claūstră Pĕlōrī,
laēvă tĭbī tēllūs, ēt lōngō laēvă pĕtāntūr
aēquŏră cīrcŭĭtū: dēxtrūm fŭgĕ lītŭs ĕt ūndās.
Haēc lŏcă vī quōndam, ēt vāstā cōnvūlsă rŭīnā
(tāntum aēvī lōngīnquă vălēt mūtārĕ vĕtūstās)
dīssīlvīssĕ fĕrūnt; cūm prōtĭnŭs ūtrăquĕ tēllūs
ūnă fŏrēt: vēnīt mĕdĭō vī pōntŭs, ĕt ūndīs
Hēspĕrĭūm Sĭcŭlō lătŭs ābscĭdĭt; ārvăque, ĕt ūrbēs
lītŏrĕ dīdūctās āngūsti īntērlŭĭt aēstū.
Dēxtrūm Scŷllă lătūs, laēvum īmplācātă Chărŷbdīs
ōbsĭdĕt; ātque īmō bărăthrī tēr gūrgĭtĕ vāstōs
sōrbĕt ĭn ābrūptūm flūctūs, rūrsūsquĕ sŭb aūrās
ērĭgĭt āltērnōs, ēt sīdĕră vērbĕrăt ūndā.
Āt Scŷllām caēcīs cŏhĭbēt spēlūncă lătēbrīs
ōra ēxsērtāntem, ēt nāvēs īn sāxă trăhēntēm.
Prīma hŏmĭnīs făcĭēs, ēt pūlchrō pēctŏrĕ vīrgŏ
pūbĕ tĕnūs: pōstrēma īnmānīs cōrpŏrĕ pīstrīs,
dēlphīnūm caūdās ŭtĕrō cōmmīssă lŭpōrūm.
Praēstāt Trīnăcrĭī mētās lūstrārĕ Păchŷnī
cēssāntēm, lōngōs ēt cīrcūmflēctĕrĕ cūrsūs,
quām sĕmĕl īnfōrmēm vāstō vīdīssĕ sŭb āntrō
Scŷllam, ēt caērŭlĕīs cănĭbūs rĕsŏnāntĭă sāxă.
Praētĕrĕā, sī qua ēst Hĕlĕnō prūdēntĭă, vātī
sī quā fīdĕs, ănīmūm sī vĕrĭs īmplĕt Ăpōllŏ;
ūnum īllūd tĭbĭ, nātĕ dĕā, praēque ōmnĭbŭs ūnūm
praēdīcam, ēt rĕpĕtēns ĭtĕrūmque ĭtĕrūmquĕ mŏnēbŏ:
Iūnōnīs māgnaē prīmūm prĕcĕ nūmĕn ădōră:
Iūnōnī cănĕ vōtă lĭbēns, dŏmĭnāmquĕ pŏtēntēm
sūpplĭcĭbūs sŭpĕrā dōnīs: sīc dēnĭquĕ vīctōr
Trīnăcrĭā fīnēs Ĭtălōs mīttērĕ rĕlīctā.
Hūc ŭbĭ dēlātūs Cūmaēam āccēssĕrĭs ūrbēm,
dīvīnōsquĕ lăcūs, ĕt Ăvērnă sŏnāntĭă sīlvīs,
īnsānām vātem āspĭcĭēs, quaē rūpĕ sŭb īmā
fātă cănīt, fŏlĭīsquĕ nŏtās ēt nōmĭnă māndāt.
Quaēcūmque īn fŏlĭīs dēscrīpsīt cārmĭnă vīrgŏ,
dīgĕrĭt īn nŭmĕrum, ātque āntrō sēclūsă rĕlīnquīt.
Īllă mănēnt īmmōtă lŏcīs, nĕque ăb ōrdĭnĕ cēdūnt.
Vērum ĕădēm vērsō tĕnŭīs cūm cārdĭnĕ vēntūs
īmpŭlĭt, ēt tĕnĕrās tūrbāvīt iānŭă frōndēs;
nūmquām deīndĕ căvō vŏlĭtāntĭă prēndĕrĕ sāxō,
nēc rĕvŏcārĕ sĭtūs, aūt iūngĕrĕ cārmĭnă cūrāt.
Īncōnsūlti ăbĕūnt, sēdēmque ōdērĕ Sĭbŷllaē.
Hīc tĭbĭ nē quă mŏraē fŭĕrīnt dīspēndĭă tāntī,
(quāmvīs īncrĕpĭtēnt sŏcĭi, ēt vī cūrsŭs ĭn āltūm
vēlă vŏcēt, pōssīsquĕ sĭnūs īmplērĕ sĕcūndōs)
quīn ădĕās vātēm, prĕcĭbūsque ōrācŭlă pōscās:
īpsă cănāt, vōcēmquĕ vŏlēns, ātque ōră rĕsōlvāt.
Īllă tĭbi Ītălĭaē pŏpŭlōs, vēntūrăquĕ bēllă,
ēt quō quēmquĕ mŏdō fŭgĭāsquĕ fĕrāsquĕ lăbōrēm,
ēxpĕdĭēt, cūrsūsquĕ dăbīt vĕnĕrātă sĕcūndōs.
Haēc sūnt quaē nōstrā lĭcĕāt tē vōcĕ mŏnērī.
Vāde ăge, ĕt īngēntēm fāctīs fĕr ăd aēthĕră Troīām."
Quaē pōstquām vātēs sīc ōre ēffātŭs ămīco ēst,
dōnă dĕhīnc aūrō grăvĭā sēctōque ĕlĕphāntō
īmpĕrăt ād nāvēs fērrī; stīpātquĕ cărīnīs
īngēns ārgēntūm, Dōdōnaēōsquĕ lĕbētās,
lōrīcām cōnsērtam hāmīs, aūrōquĕ trĭlīcēm,
ēt cōnum īnsīgnīs gălĕaē, crīstāsquĕ cŏmāntēs,
ārmă Nĕōptŏlĕmī. Sūnt ēt sŭă dōnă părēntī.
Āddĭt ĕquōs, āddītquĕ dŭcēs.
Rēmĭgĭūm sūpplēt, sŏcĭōs sĭmŭl īnstrŭĭt ārmīs.
Īntĕrĕā clāssēm vēlīs āptārĕ iŭbēbāt
Anchises, fieret vento ne qua mora ferenti.
Quēm Phoēbi īntērprēs mūltō cōmpēllăt hŏnōrĕ:
"Coniugio Anchisa Veneris dignate superbo,
cūră dĕūm, bīs Pērgămĕīs ērēptĕ rŭīnīs,
ēccĕ tĭbi Aūsŏnĭaē tēllūs; hānc ārrĭpĕ vēlīs:
ēt tămĕn hānc pĕlăgō praētērlābārĕ nĕcēsse ēst.
Aūsŏnĭaē pārs īllă prŏcūl, quām pāndĭt Ăpōllŏ.
Vāde, -ăĭt-, ō fēlīx nātī pĭĕtātĕ. Quĭd ūltrā
prōvĕhŏr, ēt fāndō sūrgēntēs dēmŏrŏr Aūstrōs?"
Nēc mĭnŭs Āndrŏmăchē dīgrēssū maēstă sŭprēmō
fērt pīctūrātās aūrī sūbtēgmĭnĕ vēstēs,
ēt Phrўgĭam Āscănĭō chlămўdēm; nēc cēdĭt hŏnōrī:
tēxtĭlĭbūsque ŏnĕrāt dōnīs, āc tālĭă fātūr:
"Āccĭpe ĕt haēc, mānvūm tĭbĭ quaē mŏnŭmēntă mĕārūm
sīnt, pŭĕr, ēt lōngum Āndrŏmăchēs tēstēntŭr ămōrēm
cōniŭgĭs Hēctŏrĕaē: căpĕ dōna ēxtrēmă tŭōrūm,
ō mĭhĭ sōlă mĕī sŭpĕr Āstўănāctĭs ĭmāgŏ!
Sīc ŏcŭlōs, sīc īllĕ mănūs, sīc ōră fĕrēbāt:
ēt nūnc aēquālī tēcūm pūbēscĕrĕt aēvō."
Hōs ĕgŏ dīgrĕdĭēns lăcrĭmīs āffābăr ŏbōrtīs:
"Vīvĭtĕ fēlīcēs, quĭbŭs ēst fōrtūnă pĕrāctă
iām sŭă: nōs ălĭa ēx ălĭīs īn fātă vŏcāmūr.
Vōbīs pārtă quĭēs; nūllūm mărĭs aēquŏr ărāndūm,
ārvă nĕque Aūsŏnĭaē sēmpēr cēdēntĭă rētrō
quaērēnda. Ēffĭgĭēm Xānthī, Troīāmquĕ vĭdētīs,
quām vēstraē fēcērĕ mănūs: mĕlĭōrĭbŭs ōptō
aūspĭcĭīs, ēt quaē fŭĕrīt mĭnŭs ōbvĭă Grāīs.
Sī quāndō Tŷbrīm, vīcīnăquĕ Tŷbrĭdĭs ārvă
īntrārō, gēntīquĕ mĕaē dătă moēnĭă cērnām,
cōgnātās ūrbēs ōlīm, pŏpŭlōsquĕ prŏpīnquōs
Ēpīro, Hēspĕrĭā, quĭbŭs īdēm Dārdănŭs aūctōr,
ātque īdēm cāsūs, ūnām făcĭēmŭs ŭtrāmquĕ
Troīam ănĭmīs: mănĕāt nōstrōs ĕă cūră nĕpōtēs."
Prōvĕhĭmūr pĕlăgō vīcīnă Cĕraūnĭă iūxtā,
ūnde ĭtĕr Ītălĭām, cūrsūsquĕ brĕvīssĭmŭs ūndīs.
Sōl rŭĭt īntĕrĕa, ēt mōntēs ūmbrāntŭr ŏpācī.
Stērnĭmŭr ōptātaē grĕmĭō tēllūrĭs ăd ūndām,
sōrtītī rēmōs; pāssīmque īn lītŏrĕ sīccō
cōrpŏră cūrāmūs: fēssōs sŏpŏr īrrĭgăt ārtūs.
Nēcdum ōrbēm mĕdĭūm nōx hōrīs āctă sŭbībāt;
haūd sēgnīs strātō sūrgīt Pălĭnūrŭs, ĕt ōmnēs
ēxplōrāt vēntōs, ātque aūrĭbŭs āĕrā cāptāt:
sīdĕră cūnctă nŏtāt tăcĭtō lābēntĭă caēlō,
Ārctūrūm, plŭvĭāsque Hўădās, gĕmĭnōsquĕ Trĭōnēs,
ārmātūmque aūrō cīrcūmspĭcĭt Ōrīōnă.
Pōstquām cūnctă vĭdēt caēlō cōnstārĕ sĕrēnō,
dāt clārum ē pūppī sīgnūm: nōs cāstră mŏvēmūs,
tēntāmūsquĕ vĭam, ēt vēlōrūm pāndĭmŭs ālās.
Iāmquĕ rŭbēscēbāt stēllīs aūrōră fŭgātīs,
cūm prŏcŭl ōbscūrōs cōllēs, hŭmĭlēmquĕ vĭdēmūs
Ītălĭam. Ītălĭām prīmūs cōnclāmăt Ăchātēs:
Ītălĭām laētō sŏcĭī clāmōrĕ sălūtānt.
Tūm pătĕr Ānchīsēs māgnūm crātēră cŏrōnā
īndŭĭt, īmplēvītquĕ mĕrō, dīvōsquĕ vŏcāvīt
stāns cēlsa īn pūppī:
"Dī mărĭs ēt tērraē, tēmpēstātūmquĕ pŏtēntēs,
fērtĕ vĭām vēntō făcĭlem, ēt spīrātĕ sĕcūndī."
Crēbrēscūnt ōptātae aūraē, pōrtūsquĕ pătēscīt
iām prŏpĭōr, tēmplūmque āppārĕt ĭn ārcĕ Mĭnērvaē.
Vēlă lĕgūnt sŏcĭi, ēt prōrās ād lītŏră tōrquēnt.
Pōrtŭs ăb Ēōō flūctū cūrvātŭr ĭn ārcūm,
ōbiēctaē sālsā spūmānt āspērgĭnĕ caūtēs:
īpsĕ lătēt: gĕmĭnō dēmīttūnt brāchĭă mūrō
tūrrītī scŏpŭlī: rĕfŭgītque ā lītŏrĕ tēmplūm.
Quāttŭŏr hīc (prīmum ōmĕn) ĕquōs īn grāmĭnĕ vīdī
tōndēntēs cāmpūm lātē, cāndōrĕ nĭvālī.
Ēt pătĕr Ānchīsēs: "Bēllum, ō tērra hōspĭtă, pōrtās:
bēllo ārmāntŭr ĕquī: bēlla haēc ārmēntă mĭnāntūr.
Sēd tămĕn īdem ōlīm cūrrū sūccēdĕrĕ suētī
quādrŭpĕdēs, ēt frēnă iŭgō cōncōrdĭă fērrĕ:
spēs ēst pācĭs" ăīt. Tūm nūmĭnă sānctă prĕcāmūr
Pāllădĭs ārmĭsŏnaē, quaē prīma āccēpĭt ŏvāntēs:
ēt căpĭta ānte ārās Phrўgĭō vēlāmŭr ămīctū:
praēcĭpĭtīsque Hĕlĕnī, dĕdĕrāt quaē māxĭmă, rītĕ
Iūnōni Ārgīvaē iūssōs ădŏlēmŭs hŏnōrēs.
Haūd mŏră, cōntĭnŭō pērfēctīs ōrdĭnĕ vōtīs,
cōrnŭă vēlātārum ōbvērtĭmŭs āntēmnārūm:
Grāiŭgĕnūmquĕ dŏmōs sūspēctăquĕ līnquĭmŭs ārvă.
Hīnc sĭnŭs Hērcŭlĕī (sī vēra ēst fāmă) Tărēntī
cērnĭtŭr: āttōllīt sē dīvă Lăcīnĭă cōntrā,
Caūlōnīsque ārcēs, ēt nāvĭfrăgūm Scўlăcēūm.
Tūm prŏcŭl ē flūctū Trīnācrĭă cērnĭtŭr Aētnă:
ēt gĕmĭtum īngēntēm pĕlăgī pūlsātăquĕ sāxă
aūdīmūs lōngē, frāctāsque ād lītŏră vōcēs:
ēxsūltāntquĕ văda, ātque aēstū mīscēntŭr ărēnaē.
Ēt pătĕr Ānchīsēs: "Nīmīrum haēc īllă Chărŷbdīs;
hōs Hĕlĕnūs scŏpŭlōs, haēc sāxa hōrrēndă cănēbāt.
Ērĭpĭte, ō sŏcĭī, părĭtērque īnsūrgĭtĕ rēmīs."
Haūd mĭnŭs āc iūssī făcĭūnt: prīmūsquĕ rŭdēntēm
cōntōrsīt laēvās prōrām Pălĭnūrŭs ăd ūndās:
laēvām cūnctă cŏhōrs rēmīs vēntīsquĕ pĕtīvīt.
Tōllĭmŭr īn caēlūm cūrvātō gūrgĭte ĕt īdēm
sūbdūcta ād mānēs īmōs dēscēndĭmŭs ūndā.
Tēr scŏpŭlī clāmōrem īntēr căvă sāxă dĕdērĕ:
tēr spūmam ēlīsam ēt rōrāntĭă vīdĭmŭs āstră.
Īntĕrĕā fēssōs vēntūs cūm sōlĕ rĕlīquīt,
īgnārīquĕ vĭaē Cŷclōpum ādlābĭmŭr ōrīs.
Pōrtŭs ăb āccēssū vēntōrum īmmōtŭs, ĕt īngēns
īpsĕ; sĕd hōrrĭfĭcīs iūxtā tŏnăt Aētnă rŭīnīs:
īntērdūmque ātrām prōrūmpĭt ăd aēthĕră nūbēm
tūrbĭnĕ fūmāntēm pĭcĕo ēt cāndēntĕ făvīllā:
āttōllītquĕ glŏbōs flāmmārum ēt sīdĕră lāmbīt.
Īntērdūm scŏpŭlōs āvūlsăquĕ vīscĕră mōntīs
ērĭgĭt ērūctāns, lĭquĕfāctăquĕ sāxă sŭb aūrās
cūm gĕmĭtū glŏmĕrāt, fūndōque ēxaēstŭăt īmō.
Fāma ēst, Ēncĕlădī sēmūstūm fūlmĭnĕ cōrpūs
ūrgērī mōle hāc, īngēntēmque īnsŭpĕr Aētnām
īmpŏsĭtām, rūptīs flāmmam ēxspīrārĕ cămīnīs;
ēt, fēssūm quŏtĭēns mōtāt lătŭs, īntrĕmĕre ōmnēm
mūrmŭrĕ Trīnăcrĭam, ēt caēlūm sūbtēxĕrĕ fūmō.
Nōctem īllām tēcti īn sīlvīs īmmānĭă mōnstră
pērfĕrĭmūs: nēc, quaē sŏnĭtūm dēt caūsă, vĭdēmūs.
Nēm nĕque ĕrānt āstrōrum īgnēs, nēc lūcĭdŭs aēthrā
sīdĕrĕā pŏlŭs; ōbscūrō sēd nūbĭlă caēlō;
ēt lūnam īn nīmbō nōx īntēmpēstă tĕnēbāt.
Pōstĕră iāmquĕ dĭēs prīmō sūrgēbăt Ĕōō,
hūmēntēmque aūrōră pŏlō dīmōvĕrăt ūmbrām;
cūm sŭbĭto ē sīlvīs, măcĭē cōnfēctă sŭprēmā,
īgnōtī nŏvă fōrmă vĭrī, mĭsĕrāndăquĕ cūltū
prōcēdīt, sūpplēxquĕ mănūs ād lītŏră tēndīt.
Rēspĭcĭmūs: dīra īllŭvĭēs, īnmīssăquĕ bārbă,
cōnfērtūm tēgmēn spīnīs; āt cētĕră Grāiūs:
ēt quōndām pătrĭīs ād Troīām mīssŭs ĭn ārmīs.
Īsque ŭbĭ Dārdănĭōs hăbĭtūs, ēt Trōĭă vīdīt
ārmă prŏcūl, paūlum āspēctū cōntērrĭtŭs haēsīt,
cōntĭnŭītquĕ grădūm: mōx sēse ād lītŏră praēcēps
cūm flētū prĕcĭbūsquĕ tŭlīt: "Pēr sīdĕră tēstōr,
pēr sŭpĕrōs, ātque hōc caēlī spīrābĭlĕ lūmēn;
tōllĭtĕ mē, Teūcrī; quāscūmque ābdūcĭtĕ tērrās:
hōc săt ĕrīt. Scĭŏ mē Dănăīs ē clāssĭbŭs ūnūm,
ēt bēllo Īlĭăcōs fătĕōr pĕtĭīssĕ Pĕnātēs.
Prō quō, sī scĕlĕrīs tānta ēst īniūrĭă nōstrī,
spārgĭtĕ me īn flūctūs, vāstōque īmmērgĭtĕ pōntō.
Sī pĕrĕō mănĭbūs hŏmĭnūm, pĕrĭīssĕ iŭvābīt."
Dīxĕrăt; ēt gĕnŭa āmplēxūs, gĕnĭbūsquĕ vŏlūtāns
haērēbāt. Quīs sīt, fārī, quō sānguĭnĕ crētūs,
hōrtāmūr, quaē deīnde ăgĭtēt fōrtūnă, fătērī.
Īpsĕ pătēr dēxtram Ānchīsēs haūd mūltă mŏrātūs
dāt iŭvĕni, ātque ănĭmūm praēsēntī pīgnŏrĕ fīrmāt.
Īlle haēc, dēpŏsĭtā tāndēm fōrmīdĭnĕ fātūr:
"Sūm pătrĭa ēx Ĭthăcā, cŏmĕs īnfēlīcĭs Ŭlīxī,
nōmĭne Ăchaēmĕnĭdēs, Troīām gĕnĭtōre Ădămāstō
paūpēr (mānsīssētque ŭtĭnām fōrtūnă!) prŏfēctūs.
Hīc mē, dūm trĕpĭdī crūdēlĭă līmĭnă līnquūnt,
īmmĕmŏrēs sŏcĭī vāstō Cŷclōpĭs ĭn āntrō
dēsĕrŭērĕ. Dŏmūs sănĭē dăpĭbūsquĕ crŭēntīs
īntŭs ŏpāca, īngēns: īpse ārdŭŭs, āltăquĕ pūlsāt
sīdĕră (dī tālēm tērrīs āvērtĭtĕ pēstēm)
nēc vīsū făcĭlīs, nēc dīctu āffābĭlĭs ūllī:
vīscĕrĭbūs mĭsĕrōrum, ēt sānguĭnĕ vēscĭtŭr ātrō.
Vīdi ĕgŏmēt, dŭŏ dē nŭmĕrō cūm cōrpŏră nōstrō
prēnsă mănū māgnā mĕdĭō rĕsŭpīnŭs ĭn āntrō
frāngĕrĕt ād sāxūm, sănĭēque āspērsă nătārēnt
līmĭnă: vīdi ātrō cūm mēmbră flŭēntĭă tābō
māndĕrĕt, ēt trĕpĭdī trĕmĕrēnt sūb dēntĭbŭs ārtūs.
Haūd īmpūnĕ quĭdēm, nēc tālĭă pāssŭs Ŭlīxēs,
ōblītūsquĕ sŭi ēst Ĭthăcūs dīscrīmĭnĕ tāntō.
Nām sĭmŭl ēxplētūs dăpĭbūs, vīnōquĕ sĕpūltūs
cērvīcem īnflēxām pŏsŭīt, iăcŭītquĕ pĕr āntrūm
īmmēnsūm, sănĭem ērūctāns, āc frūstă crŭēntō
pēr sōmnūm cōmmīxtă mĕrō; nōs māgnă prĕcātī
nūmĭnă, sōrtītīquĕ vĭcēs, ūna ūndĭquĕ cīrcūm
fūndĭmŭr, ēt tēlō lūmēn tĕrĕbrāmŭs ăcūtō
īngēns, quōd tōrvā sōlūm sūb frōntĕ lătēbāt,
Ārgŏlĭcī clўpĕi, aūt Phoēbēaē lāmpădĭs īnstār;
ēt tāndēm laētī sŏcĭōrum ūlcīscĭmŭr ūmbrās.
Sēd fŭgĭte, ō mĭsĕrī, fŭgĭte, ātque āb lītŏrĕ fūnēm
rūmpĭtĕ.
Nām quālīs quāntūsquĕ căvō Pŏlўphēmŭs ĭn āntrō
lānĭgĕrās claūdīt pĕcŭdēs, ātque ūbĕră prēssāt,
cēntum ălĭī cūrva haēc hăbĭtānt ād lītŏră vūlgō
īnfāndī Cŷclōpĕs, ĕt āltīs mōntĭbŭs ērrānt.
Tērtĭă iām lūnaē sē cōrnŭă lūmĭnĕ cōmplēnt,
cūm vītam īn sīlvīs, īntēr dēsērtă fĕrārūm
lūstră dŏmōsquĕ trăhō; vāstōsque āb rūpĕ Cўclōpās
prōspĭcĭō, sŏnĭtūmquĕ pĕdūm, vōcēmquĕ trĕmīscō.
Vīctum īnfēlīcēm bāccās, lăpĭdōsăquĕ cōrnă
dānt rāmi, ēt vūlsīs pāscūnt rādīcĭbŭs hērbaē.
Ōmnĭă cōllūstrāns, hānc prīmum ād lītŏră clāssēm
cōnspēxī vĕnĭēntem; huīc mē, quaēcūmquĕ fŭīssēt,
āddīxī. Sătĭs ēst gēntem ēffūgīssĕ nĕfāndām.
Vōs ănĭmam hānc pŏtĭūs quōcūmque ābsūmĭtĕ lētō."
Vīx ĕă fātŭs ĕrāt, sūmmō cūm mōntĕ vĭdēmūs
īpsum īntēr pĕcŭdēs vāstā sē mōlĕ mŏvēntēm
pāstōrēm Pŏlўphēmum, ēt lītŏră nōtă pĕtēntēm:
mōnstrum hōrrēndum, īnfōrme, īngēns, cuī lūmĕn ădēmptūm;
trūncă mănūm pīnūs rĕgĭt, ēt vēstīgĭă fīrmāt.
Lānĭgĕraē cŏmĭtāntŭr ŏvēs: ĕă sōlă vŏlūptās;
sōlāmēnquĕ mălī dē cōllō fīstŭlă pēndēt.
Pōstquam āltōs tĕtĭgīt flūctūs, ĕt ăd aēquŏră vēnīt,
lūmĭnĭs ēffōssī flŭĭdūm lăvĭt īndĕ crŭōrēm,
dēntĭbŭs īnfrēndēns gĕmĭtū; grădĭtūrquĕ pĕr aēquōr
iām mĕdĭūm, nēc dūm flūctūs lătĕra ārdŭă tīnxīt.
Nōs prŏcŭl īndĕ fŭgām trĕpĭdī cĕlĕrārĕ, rĕcēptō
sūpplĭcĕ, sīc mĕrĭtō, tăcĭtīque īncīdĕrĕ fūnēm;
vērrĭmŭs ēt prōnī cērtāntĭbŭs aēquŏră rēmīs.
Sēnsĭt, ĕt ād sŏnĭtūm vōcīs vēstīgĭă tōrsīt.
Vērum ŭbĭ nūllă dătūr dēxtram āffēctārĕ pŏtēstās,
nēc pŏtĭs Īŏnĭōs flūctūs aēquārĕ sĕquēndō,
clāmōrem īmmēnsūm tōllīt, quō pōntŭs ĕt ōmnēs
īntrĕmŭēre ūndaē, pĕnĭtūsque ēxtērrĭtă tēllūs
Ītălĭaē, cūrvīsque īmmūgĭĭt Aētnă căvērnīs.
Āt gĕnŭs ē sīlvīs Cŷclōpum, ēt mōntĭbŭs āltīs
ēxcītūm rŭĭt ād pōrtūs, ēt lītŏră cōmplēnt.
Cērnĭmŭs āstāntēs nēquīquām lūmĭnĕ tōrvō
Aētnaēōs frātrēs, caēlō căpĭta āltă fĕrēntēs,
cōncĭlĭum hōrrēndūm: quālēs cūm vērtĭcĕ cēlsō
aērīaē quērcūs, aūt cōnĭfĕraē cўpărīssī
cōnstĭtĕrānt, sīlva āltă Iŏvīs, lūcūsvĕ Dĭānaē.
Praēcĭpĭtēs mĕtŭs ācĕr ăgīt quōcūmquĕ rŭdēntēs
ēxcŭtĕre, ēt vēntīs īntēndĕrĕ vēlă sĕcūndīs.
Cōntrā iūssă mŏnēnt Hĕlĕnī, Scŷllam, ātquĕ Chărŷbdīn
īntĕr ŭtrāmquĕ vĭām, lētī dīscrīmĭnĕ pārvō,
nī tĕnĕānt cūrsūs; cērtum ēst dărĕ līntĕă rētrō.
Ēcce aūtēm Bŏrĕās āngūsta ā sēdĕ Pĕlōrī
mīssŭs ădēst: vīvō praētērvĕhŏr ōstĭă sāxō
Pāntăgĭaē, Mĕgărōsquĕ sĭnūs, Thāpsūmquĕ iăcēntēm.
Tālĭă mōnstrābāt rĕlĕgēns ērrātă rĕtrōrsūm
lītŏra Ăchaēmĕnĭdēs, cŏmĕs īnfēlīcĭs Ŭlīxī.
Sīcănĭō praētēntă sĭnū iăcĕt īnsŭlă, cōntrā
Plēmmўrĭum ūndōsūm; nōmēn dīxērĕ prĭōrēs
Ōrtўgĭam. Ālphēūm fāma ēst hūc Ēlĭdĭs āmnēm
ōccūltās ēgīssĕ vĭās sūbtēr mărĕ; quī nūnc
ōre, Ărĕthūsă, tŭō Sĭcŭlīs cōnfūndĭtŭr ūndīs.
Nūmĭnă māgnă lŏcī iūssī vĕnĕrāmŭr; ĕt īndĕ
ēxsŭpĕrō praēpīnguĕ sŏlūm stāgnāntĭs Ĕlōrī.
Hīnc āltās caūtēs, prōiēctăquĕ sāxă Păchŷnī
rādĭmŭs; ēt fātīs nūmquām cōncēssă mŏvērī
āppārēt Cămărīnă prŏcūl, cāmpīquĕ Gĕlōī,
īmmānīsquĕ Gĕlā, flŭvĭī cōgnōmĭnĕ dīctă.
Ārdŭŭs īnde Ăgrăgās ōstēntāt māxĭmă lōngē
moēnĭă, māgnănĭmūm quōndām gĕnĕrātŏr ĕquōrūm.
Tēquĕ dătīs līnquō vēntīs, pālmōsă Sĕlīnūs:
ēt vădă dūră lĕgō sāxīs Lĭlўbaēĭă caēcīs.
Hīnc Drĕpănī mē pōrtŭs, ĕt īllaētābĭlĭs ōră
āccĭpĭt. Hīc pĕlăgī tōt tēmpēstātĭbŭs āctūs,
heū, gĕnĭtōrem, ōmnīs cūraē cāsūsquĕ lĕvāmēn,
āmītto Ānchīsēn: hīc mē, pătĕr ōptĭmĕ, fēssūm
dēsĕrĭs, heū tāntīs nēquīquam ērēptĕ pĕrīclīs!
Nēc vătĕs Hēlēnūs, cūm mūlta hōrrēndă mŏnērēt,
hōs mĭhĭ praēdīxīt lūctūs, nōn dīră Cĕlaēnō.
Hīc lăbŏr ēxtrēmūs, lōngārum haēc mētă vĭārūm.
Hīnc mē dīgrēssūm vēstrīs dĕŭs āppŭlĭt ōrīs."
Sīc pătĕr Aēnēās īntēntīs ōmnĭbŭs ūnūs
fātă rĕnārrābāt dīvōm, cūrsūsquĕ dŏcēbāt.
Cōntĭcŭīt tāndēm, fāctōque hīc fīnĕ quĭēvīt.