0

Conticuere omnes, intentique ora tenebant.

Inde toro pater Aeneas sic orsus ab alto:

"Infandum regina iubes renovare dolorem,

Troianas ut opes, et lamentabile regnum

eruerint Danai, quaeque ipse miserrima vidi,

et quorum pars magna fui. Quis talia fando

Myrmidonum, Dolopumve, aut duri miles Ulixi

temperet a lacrimis? Et iam nox humida caelo

praecipitat; suadentque cadentia sidera somnos.

Sed si tantus amor casus cognoscere nostros,

et breviter Troiae supremum audire laborem,

quamquam animus meminisse horret, luctuque refugit,

incipiam. Fracti bello, fatisque repulsi

ductores Danaum, tot iam labentibus annis,

instar montis equum, divina Palladis arte,

aedificant; sectaque intexunt abiete costas.

Votum pro reditu simulant: ea fama vagatur.

Huc delecta virum sortiti corpora, furtim

includunt caeco lateri: penitusque cavernas

ingentes, uterumque armato milite complent.

Est in conspectu Tenedos, notissima fama

insula, dives opum, Priami dum regna manebant;

nunc tantum sinus, et statio male fida carinis.

Huc se provecti deserto in litore condunt.

Nos abiisse rati, et vento petiisse Mycenas.

Ergo omnis longo solvit se Teucria luctu:

panduntur portae: iuvat ire, et Dorica castra

desertosque videre locos, litusque relictum.

Hic Dolopum manus, hic saevus tendebat Achilles:

classibus hic locus, hic acies certare solebant.

Pars stupet innuptae donum exitiale Minervae,

et molem mirantur equi: primusque Thymoetes

duci intra muros hortatur, et arce locari;

sive dolo, seu iam Troiae sic fata ferebant.

At Capys, et quorum melior sententia menti,

aut pelago Danaum insidias, suspectaque dona

praecipitare iubent, subiectisque urere flammis;

aut terebrare cavas uteri, et tentare latebras.

Scinditur incertum studia in contraria vulgus.

Primus ibi ante omnes, magna comitante caterva,

Laocoon ardens summa decurrit ab arce:

et procul: "O miseri, quae tanta insania, cives?

Creditis avectos hostes? Aut ulla putatis

dona carere dolis Danaum? Sic notus Ulixes?

Aut hoc inclusi ligno occultantur Achivi;

aut haec in nostros fabricata est machina muros,

inspectura domos, venturaque desuper urbi;

aut aliquis latet error. Equo ne credite Teucri.

Quidquid id est, timeo Danaos et dona ferentes."

Sic fatus, validis ingentem viribus hastam

in latus, inque feri curvam compagibus alvum

contorsit. Stetit illa tremens: uteroque recusso,

insonuere cavae, gemitumque dedere cavernae.

Et, si fata deum, si mens non laeva fuisset,

impulerat ferro Argolicas foedare latebras:

Troiaque nunc stares, Priamique arx alta maneres.

Ecce manus iuvenem interea post terga revinctum

pastores magno ad regem clamore trahebant

Dardanidae, qui se ignotum venientibus ultro,

hoc ipsum ut strueret, Troiamque aperiret Achivis,

obtulerat, fidens animi, atque in utrumque paratus,

seu versare dolos, seu certae occumbere morti.

Undique visendi studio Troiana iuventus

circumfusa ruit, certatque illudere capto.

Accipe nunc Danaum insidias, et crimine ab uno

disce omnes.

Namque ut conspectu in medio turbatus inermis

constitit, atque oculis Phrygia agmina circumspexit:

"Heu quae nunc tellus, inquit, quae me aequora possunt

accipere? Aut quid iam misero mihi denique restat?

Cui neque apud Danaos usquam locus: insuper ipsi

Dardanidae infensi poenas cum sanguine poscunt."

Quo gemitu conversi animi, compressus et omnis

impetus: hortamur fari; quo sanguine cretus,

quidve ferat, memoret; quae sit fiducia capto.

Ille haec, deposita tandem formidine, fatur.

"Cuncta equidem tibi, rex, fuerint quaecumque, fatebor

vera, inquit: neque me Argolica de gente negabo:

hoc primum: nec, si miserum fortuna Sinonem

finxit, vanum etiam, mendacemque improba finget.

Fando aliquid si forte tuas pervenit ad aures

Belidae nomen Palamedis, et inclyta fama

gloria; (quem falsa sub proditione Pelasgi

insontem, infando indicio, quia bella vetabat,

demisere neci, nunc cassum lumine lugent)

illi me comitem, et consanguinitate propinquum

pauper in arma pater primis huc misit ab annis.

Dum stabat regno incolumis, regnumque vigebat

consiliis, et nos aliquod nomenque decusque

gessimus. Invidia postquam pellacis Ulixi

(haud ignota loquor) superis concessit ab oris,

afflictus vitam in tenebris luctuque trahebam,

et casum insontis mecum indignabar amici.

Nec tacui demens; et me, sors si qua tulisset,

si patrios umquam remeassem victor ad Argos,

promisi ultorem, et verbis odia aspera movi.

Hinc mihi prima mali labes: hinc semper Ulixes

criminibus terrere novis: hinc spargere voces

in vulgum ambiguas, et quaerere conscius arma.

Nec requievit enim, donec Calchante ministro.

Sed quid ego haec autem nequiquam ingrata revolvo?

Quidve moror? Si omnes uno ordine habetis Achivos,

idque audire sat est: iamdudum sumite poenas.

Hoc Ithacus velit, et magno mercentur Atridae."

Tum vero ardemus scitari et quaerere causas

ignari scelerum tantorum artisque Pelasgae.

Prosequitur pavitans, et scito pectore fatur.

"Saepe fugam Danai Troia cupiere relicta

moliri, et longo fessi discedere bello:

fecissentque utinam! Saepe illos aspera ponti

interclusit hiems, et terruit Auster euntes.

Praecipue cum iam hic trabibus contextus acernis

staret equus, toto sonuerunt aethere nimbi.

Suspensi Eurypylum scitatum oracula Phoebi

mittimus: isque adytis haec tristia dicta reportat:

"Sanguine placastis ventos, et virgine caesa,

cum primum Iliacas Danai venistis ad oras:

sanguine quaerendi reditus, animaque litandum

Argolica." Vulgi quae vox ut venit ad aures,

obstupuere animi, gelidusque per ima cucurrit

ossa tremor: cui fata parent, quem poscat Apollo.

Hic Ithacus vatem magno Calchanta tumultu

protrahit in medios: quae sint ea numina divom

flagitat: et mihi iam multi crudele canebant

artificis scelus, et taciti ventura videbant.

Bis quinos silet ille dies, tectusque recusat

prodere voce sua quemquam, aut opponere morti.

Vix tandem magnis Ithaci clamoribus actus

composito rumpit vocem, et me destinat arae.

Assensere omnes, et quae sibi quisque timebat,

unius in miseri exitium conversa tulere.

Iamque dies infanda aderat: mihi sacra parari,

et falsae fruges, et circum tempora vittae.

Eripui (fateor) leto me, et vincula rupi:

limosoque lacu per noctem obscurus in ulva

delitui, dum vela darent, si forte dedissent.

Nec mihi iam patriam antiquam spes ulla videndi,

nec dulces natos exoptatumque parentem:

quos illi fors ad poenas ob nostra reposcent

effugia, et culpam hanc miserorum morte piabunt.

Quod te per superos, et conscia numina veri,

per, si qua est, quae restat adhuc mortalibus usquam

intemerata fides, oro, miserere laborum

tantorum, miserere animi non digna ferentis."

His lacrimis vitam damus, et miserescimus ultro.

Ipse viro primus manicas, atque arta levari

vincla iubet Priamus, dictisque ita fatur amicis:

"Quisquis es, amissos hinc iam obliviscere Graios:

noster eris, mihique haec edissere vera roganti.

Quo molem hanc immanis equi statuere? Quis auctor?

Quidve petunt? Quae religio? Aut quae machina belli?"

Dixerat. Ille dolis instructus, et arte Pelasga

sustulit exutas vinclis ad sidera palmas:

"Vos aeterni ignes, et non violabile vestrum

testor numen, - ait -: vos arae, ensesque nefandi,

quos fugi, vittaeque deum, quas hostia gessi:

fas mihi Graiorum sacrata resolvere iura:

fas odisse viros, atque omnia ferre sub auras,

si qua tegunt: teneor patria nec legibus ullis.

Tu modo promissis maneas, servataque serves

Troia fidem, si vera feram, si magna rependam.

Omnis spes Danaum, et coepti fiducia belli

Palladis auxiliis semper stetit: impius ex quo

Tydides sed enim, scelerumque inventor Ulixes,

fatale aggressi sacrato avellere templo

Palladium, caesis summae custodibus arcis,

corripuere sacram effigiem, manibusque cruentis

virgineas ausi Divae contingere vittas:

ex illo fluere, ac retro sublapsa referri

spes Danaum: fractae vires. adversa deae mens.

Nec dubiis ea signa dedit Tritonia monstris.

Vix potitum castris simulacrum, arsere coruscae

luminibus flammae arrectis: salsusque per artus

sudor iit: terque ipsa solo (mirabile dictu)

emicuit, parmamque ferens hastamque trementem.

Extemplo temptanda fuga canit aequora Calchas;

nec posse Argolicis exscindi Pergama telis,

omnia ni repetant Argis, numenque reducant.

Quod pelago, et curvis secum advexere carinis.

Et nunc, quod patrias vento petiere Mycenas,

arma deosque parant comites, pelagoque remenso

improvisi aderunt. Ita digerit omnia Calchas.

Hanc pro Palladio moniti, pro numine laeso

effigiem statuere, nefas quae triste piaret.

Hanc tamen immensam Calchas attollere molem

roboribus textis, caeloque educere iussit,

ne recipi portis, aut duci in moenia possit,

neu populum antiqua sub religione tueri.

Nam si vestra manus violasset dona Minervae,

tum magnum exitium (quod di prius omen in ipsum

convertant) Priami imperio, Phrygibusque futurum:

sin manibus vestris vestram ascendisset in urbem,

ultro Asiam magno Pelopeia ad moenia bello

venturam, et nostros ea fata manere nepotes."

Talibus insidiis, periurique arte Sinonis

credita res; captique dolis, lacrimisque coacti,

quos neque Tydides, nec Larissaeus Achilles,

non anni domuere decem, non mille carinae.

Hic aliud maius miseris, multoque tremendum

obicitur magis, atque improvida pectora turbat.

Laocoon, ductus Neptuno forte sacerdos,

solemnes taurum ingentem mactabat ad aras.

Ecce autem gemini a Tenedo tranquilla per alta

(horresco referens) immensis orbibus angues

incumbunt pelago, pariterque ad litora tendunt:

pectora quorum inter fluctus arrecta, iubaeque

sanguineae exsuperant undas: pars cetera pontum

pone legit, sinuatque immensa volumine terga.

Fit sonitus spumante salo: iamque arva tenebant,

ardentesque oculos suffecti sanguine, et igni,

sibila lambebant linguis vibrantibus ora.

Diffugimus visu exsangues: illi agmine certo

Laocoonta petunt, et primum parva duorum

corpora natorum serpens amplexus uterque

implicat, et miseros morsu depascitur artus.

Post ipsum auxilio subeuntem, ac tela ferentem

corripiunt, spirisque ligant ingentibus; et iam

bis medium amplexi, bis collo squamea circum

terga dati, superant capite et cervicibus altis.

Ille simul manibus tendit divellere nodos

perfusus sanie vittas, atroque veneno:

clamores simul horrendos ad sidera tollit:

quales mugitus, fugit cum saucius aras

taurus, et incertam excussit cervice securim.

At gemini lapsu delubra ad summa dracones

effugiunt, saevaeque petunt Tritonidis arcem,

sub pedibusque deae, clypeique sub orbe teguntur.

Tum vero tremefacta novus per pectora cunctis

insinuat pavor, et scelus expendisse merentem

Laocoonta ferunt, sacrum qui cuspide robur

laeserit, et tergo sceleratam intorserit hastam.

Ducendum ad sedes simulacrum, orandaque divae

numina conclamant.

Dividimus muros, et moenia pandimus urbis.

Accingunt omnes operi, pedibusque rotarum

subiciunt lapsus, et stupea vincula collo

intendunt: scandit fatalis machina muros

feta armis: circum pueri innuptaeque puellae

sacra canunt, funemque manu contingere gaudent.

Illa subit, mediaeque minans illabitur urbi.

O patria, o divom domus Ilium, et inclita bello

moenia Dardanidum! Quater ipso in limine portae

substitit, atque utero sonitum quater arma dedere.

Instamus tamen immemores, caecique furore,

et monstrum infelix sacrata sistimus arce.

Tunc etiam fatis aperit Cassandra futuris

ora, dei iussu, non umquam credita Teucris.

Nos delubra deum miseri, quibus ultimus esset

ille dies, festa velamus fronde per urbem.

Vertitur interea caelum, et ruit Oceano nox

involvens umbra magna terramque polumque

Myrmidonumque dolos. Fusi per moenia Teucri

conticuere: sopor fessos complectitur artus.

Et iam Argiva phalanx instructis navibus ibat

et Tenedo, tacitae per amica silentia Lunae,

litora nota petens: flammas cum regia puppis

extulerat; fatisque deum defensus iniquis

inclusos utero Danaos, et pinea furtim

laxat claustra Sinon. Illos patefactus ad auras

reddit equus: laetique cavo se robore promunt

Tisandrus, Sthenelusque duces, et dirus Ulixes,

demissum lapsi per funem, Athamasque Thoasque,

Pelidesque Neoptolemus, primusque Machaon,

et Menelaus et ipse doli fabricator Epeus.

Invadunt urbem somno vinoque sepultam.

Caeduntur vigiles; portisque patentibus omnes

accipiunt socios, atque agmina conscia iungunt.

Tempus erat quo prima quies mortalibus aegris

incipit, et dono divom gratissima serpit.

In somnis ecce ante oculos maestissimus Hector

visus adesse mihi, largosque effundere fletus,

raptatus bigis, ut quondam, aterque cruento

pulvere, perque pedes traiectus lora tumentes.

Hei mihi, qualis erat! Quantum mutatus ab illo

Hectore, qui redit exuvias indutus Achillis,

vel Danaum Phrygios iaculatus puppibus ignes!

Squalentem barbam, et concretos sanguine crines,

volneraque illa gerens, quae circum plurima muros

accepit patrios. Ultro flens ipse videbar

compellare virum, et maestas expromere voces:

"O lux Dardaniae, spes o fidissima Teucrum,

quae tantae tenuere morae? Quibus Hector ab oris

exspectare venis? Ut te post multa tuorum

funera, post varios hominumque urbisque labores

defessi aspicimus? Quae causa indigna serenos

foedavit voltus? Aut cur haec volnera cerno?"

Ille nihil, nec me quaerentem vana moratur:

sed graviter gemitus imo de pectore ducens:

"Heu fuge, nate dea, teque his, ait, eripe flammis.

Hostis habet muros, ruit alto a culmine Troia.

Sat patriae Priamoque datum: si Pergama dextra

defendi possent, etiam hac defensa fuissent.

Sacra suosque tibi commendat Troia Penates.

Hos cape fatorum comites, his moenia quaere;

magna pererrato statues quae denique ponto."

Sic ait, et manibus vittas, Vestamque potentem,

aeternumque adytis effert penetralibus ignem.

Diverso interea miscentur moenia luctu:

et magis atque magis (quamquam secreta parentis

Anchisae domus, arboribusque obtecta recessit)

clarescunt sonitus, armorumque ingruit horror.

Excutior somno, et summi fastigia tecti

ascensu supero, atque arrectis auribus asto.

In segetem veluti cum flamma furentibus Austris

incidit, aut rapidus montano flumine torrens

sternit agros, sternit sata laeta boumque labores,

praecipitesque trahit silvas: stupet inscius alto

accipiens sonitum saxi de vertice pastor.

Tum vero manifesta fides, Danaumque patescunt

insidiae. Iam Deiphobi dedit ampla ruinam

Volcano superante domus: iam proximus ardet

Ucalegon: Sigea igni freta lata relucent.

Exoritur clamorque virum clangorque tubarum.

Arma amens capio, nec sat rationis in armis:

sed glomerare manum bello, et concurrere in arcem

cum sociis ardent animi: furor iraque mentem

praecipitant, pulchrumque mori succurrit in armis.

Ecce autem telis Panthus elapsus Achivum,

Panthus Othryades, arcis Phoebique sacerdos,

sacra manu victosque deos parvumque nepotem

ipse trahit, cursuque amens ad litora tendit.

"Quo res summa loco, Panthu? Quam prendimus arcem?"

Vix ea fatus eram, gemitu cum talia reddit:

"Venit summa dies et ineluctabile tempus

Dardaniae: fuimus Troes, fuit Ilium et ingens

gloria Teucrorum: ferus omnia Iuppiter Argos

transtulit: incensa Danai dominantur in urbe.

Arduus armatos mediis in moenibus adstans

fundit equus; victorque Sinon incendia miscet

insultans. Portis alii bipatentibus adsunt,

milia quot magnis numquam venere Mycenis.

Obsedere alii telis angusta viarum

oppositi: stat ferri acies mucrone corusco

stricta, parata neci: vix primi proelia temptant

portarum vigiles, et caeco Marte resistunt."

Talibus Othryadae dictis et numine divom

in flammas et in arma feror, quo tristis Erinnys,

quo fremitus vocat et sublatus ad aethera clamor.

Addunt se socios Ripheus et maximus armis

Iphitus, oblati per lunam, Hypanisque, Dymasque,

et lateri agglomerant nostro; iuvenisque Choraebus

Mygdonides, illis qui ad Troiam forte diebus

venerat, insano Cassandrae accensus amore:

et gener auxilium Priamo Phrygibusque ferebat.

Infelix, qui non sponte praecepta furentis

audierat.

Quos ubi confertos audere in proelia vidi,

incipio super his: "Iuvenes, fortissima frustra

pectora (si vobis audentem extrema cupido est

certa sequi, quae sit rebus fortuna, videtis:

excessere omnes, adytis arisque relictis,

di, quibus imperium hoc steterat) succurritis urbi

incensae: moriamur, et in media arma ruamus:

una salus victis nullam sperare salutem."

Sic animis iuvenum furor additus. Inde, lupi ceu

raptores atra in nebula, quos improba ventris

exegit caecos rabies, catulique relicti

faucibus exspectant siccis; per tela, per hostes

vadimus haud dubiam in mortem, mediaeque tenemus

urbis iter. Nox atra cava circumvolat umbra.

Quis cladem illius noctis, quis funera fando

explicet? Aut possit lacrimis aequare labores?

Urbs antiqua ruit multos dominata per annos:

plurima perque vias sternuntur inertia passim

corpora, perque domos et religiosa deorum

limina; nec soli poenas dant sanguine Teucri:

quondam etiam victis redit in praecordia virtus

victoresque cadunt Danai. Crudelis ubique

luctus, ubique pavor, et plurima mortis imago.

Primus se Danaum, magna comitante caterva,

Androgeos offert nobis, socia agmina credens

inscius, atque ultro verbis compellat amicis:

"Festinate, viri: nam quae tam sera moratur

segnities? alii rapiunt incensa, feruntque

Pergama: vos celsis nunc primum navibus itis?"

Dixit, et extemplo (neque enim responsa dabantur

fida satis) sensit medios dilapsus in hostes.

Obstupuit, retroque pedem cum voce repressit.

Improvisum aspris veluti qui sentibus anguem

pressit humi nitens, trepidusque repente refugit

attollentem iras, et caerula colla tumentem:

haud secus Androgeos visu tremefactus abibat.

Inruimus, densis et circumfundimur armis:

ignarosque loci passim, et formidine captos

sternimus. Aspirat primo fortuna labori.

Atque hic exsultans successu animisque Choraebus,

"O socii, qua prima, - inquit -, fortuna salutis

monstrat iter, quaque ostendit se dextra, sequamur.

Mutemus clypeos, Danaumque insignia nobis

aptemus: dolus, an virtus, quis in hoste requirat?

Arma dabunt ipsi." Sic fatus, deinde comantem

Androgei galeam, clypeique insigne decorum

induitur, laterique Argivum accommodat ensem.

Hoc Ripheus, hoc ipse Dymas, omnisque iuventus

laeta facit: spoliis se quisque recentibus armat.

Vadimus immixti Danais haud numine nostro,

multaque per caecam congressi proelia noctem

conserimus; multos Danaum demittimus Orco.

Diffugiunt alii ad naves, et litora cursu

fida petunt: pars ingentem formidine turpi

scandunt rursus equum, et nota conduntur in alvo.

Heu nihil invitis fas quemquam fidere divis!

Ecce trahebatur passis Priameia virgo

crinibus a templo Cassandra, adytisque Minervae,

ad caelum tendens ardentia lumina frustra:

lumina: nam teneras arcebant vincula palmas.

Non tulit hanc speciem furiata mente Choraebus,

et sese medium iniecit moriturus in agmen.

Consequimur cuncti, et densis incurrimus armis.

Hic primum ex alto delubri culmine telis

nostrorum obruimur, oriturque miserrima caedes

armorum facie, et Graiarum errore iubarum.

Tum Danai gemitu, atque ereptae virginis ira

undique collecti invadunt: acerrimus Aiax,

et gemini Atridae, Dolopumque exercitus omnis.

Aversi rupto ceu quondam turbine venti

confligunt Zephyrusque, Notusque et laetus Eois

Eurus equis: stridunt silvae, saevitque tridenti

Spumeus, atque imo Nereus ciet aequora fundo.

Illi etiam, siquos obscura nocte per umbram

fudimus insidiis, totaque agitavimus urbe,

apparent: primi clypeos, mentitaque tela

agnoscunt, atque ora sono discordia signant.

Ilicet obruimur numero: primusque Choraebus

Penelei dextra, divae armipotentis ad aram,

procumbit: cadit et Ripheus, iustissimus unus

qui fuit in Teucris, et servantissimus aequi.

Dis aliter visum. Pereunt Hypanisque Dymasque

conixi a sociis: nec te tua plurima, Panthu,

labentem pietas, nec Apollinis infula texit.

Iliaci cineres, et flamma extrema meorum,

testor, in occasu vestro nec tela, nec ullas

vitavisse vices Danaum: et si fata fuissent

ut caderem, meruisse manu. Divellimur inde

Iphitus et Pelias mecum: quorum Iphitus aevo

iam gravior, Pelias et volnere tardus Ulixi,

protinus ad sedes Priami clamore vocati.

Hic vero ingentem pugnam, ceu cetera nusquam

bella forent, nulli tota morerentur in urbe:

sic Martem indomitum, Danaosque ad tecta ruentes

cernimus, obsessumque acta testudine limen.

Haerent parietibus scalae; postesque sub ipsos

nituntur gradibus, clypeosque ad tela sinistris

protecti obiciunt, prensant fastigia dextris.

Dardanidae contra turres, ac tecta domorum

culmina convellunt: his se, quando ultima cernunt,

extremam iam in morte parant defendere telis:

auratasque trabes, veterum decora alta parentum,

devolvunt. Alii strictis mucronibus imas

obsedere fores: has servant agmine denso.

Instaurati animi regis succurrere tectis,

auxilioque levare viros, vimque addere victis.

Limen erat, caecaeque fores, et pervius usus

tectorum inter se Priami, postesque relicti

a tergo; infelix qua se, dum regna manebant,

saepius Andromache ferre incomitata solebat

ad soceros, et avo puerum Astyanacta trahebat.

Evado ad summi fastigia culminis, unde

tela manu miseri iactabant irrita Teucri.

Turrem in praecipiti stantem, summisque sub astra

eductam tectis, unde omnis Troia videri,

et Danaum solitae naves, et Achaica castra

aggressi ferro circum, qua summa labantes

iuncturas tabulata dabant, convellimus altis

sedibus, impulimusque: ea lapsa repente ruinam

cum sonitu trahit, et Danaum super agmina late

incidit. Ast alii subeunt: nec saxa, neque ullum

telorum interea cessat genus.

Vestibulum ante ipsum, primoque in limine Pyrrhus

exultat telis, et luce coruscat ahena.

Qualis ubi in lucem coluber mala gramina pastus,

frigida sub terra tumidum quem bruma tegebat,

nunc positis novus exuviis, nitidusque iuventa,

lubrica convolvit sublato pectore terga,

arduus ad solem, et linguis micat ore trisulcis.

Una ingens Periphas, et equorum agitator Achillis

armiger Automedon: una omnis Scythia pubes

succedunt recto, et flammas ad culmina iactant.

Ipse inter primos correpta dura bipenni

limina perrumpit, postesque a cardine vellit

aeratos: iamque excisa trabe, firma cavavit

robora, et ingentem lato dedit ore fenestram.

Apparet domus intus, et atria longa patescunt,

apparent Priami, et veterum penetralia regum:

armatosque vident stantes in limine primo.

At domus interior gemitu miseroque tumultu

miscetur: penitusque cavae plangoribus aedes

foemineis ululant: ferit aurea sidera clamor.

Tum pavidae tectis matres ingentibus errant,

amplexaeque tenent postes, atque oscula figunt.

Instat vi patria Pyrrhus: nec claustra, nec ipsi

custodes sufferre valent: labat ariete crebro

ianua, et emoti procumbunt cardine postes.

Fit via vi: rumpunt aditus, primosque trucidant

immissi Danai; et late loca milite complent.

Non sic aggeribus ruptis cum spumeus amnis

exiit, oppositasque evicit gurgite moles,

fertur in arva furens cumulo, camposque per omnes

cum stabulis armenta trahit. Vidi ipse furentem

caede Neoptolemum, geminosque in limine Atridas.

Vidi Hecubam centumque nurus Priamumque per aras

sanguine foedantem, quos ipse sacraverat, ignes.

Quinquaginta illi thalami, spes tanta nepotum,

barbarico postes auro, spoliisque superbi

procubuere: tenent Danai qua desinit ignis.

Forsitan et Priami fuerint quae fata requiras.

Urbis ubi captae casum, convulsaque vidit

limina tectorum, et medium in penetralibus hostem,

arma diu senior desueta trementibus aevo

circumdat nequiquam humeris, et inutile ferrum

cingitur, ac densos fertur moriturus in hostes.

Aedibus in mediis, nudoque sub aetheris axe

ingens ara fuit; iuxtaque veterrima laurus

incumbens arae, atque umbra complexa Penates.

Hic Hecuba, et natae nequiquam altaria circum,

praecipites atra ceu tempestate columbae,

condensae, et divom amplexae simulacra tenebant.

Ipsum autem sumptis Priamum iuvenilibus armis

ut vidit: "Quae mens tam dira, miserrime coniunx,

impulit his cingi telis? Aut quo ruis?", inquit.

"Non tali auxilio, nec defensoribus istis

tempus eget; non, si ipse meus nunc afforet Hector.

Huc tamen concede: haec ara tuebitur omnes;

aut moriere simul." Sic ore effata, recepit

ad sese, et sacra longaevum in sede locavit.

Ecce autem elapsus Pyrrhi de caede Polytes,

unus natorum Priami, per tela, per hostes

porticibus longis fugit, et vacua atria lustrat

saucius: illum ardens infesto volnere Pyrrhus

insequitur: iam iamque manu tenet, et premit hasta.

Ut tandem ante oculos evasit et ora parentum

concidit, ac multo vitam cum sanguine fudit.

Hic Priamus, quamquam in media iam morte tenetur,

non tamen abstinuit, nec voci iraeque pepercit:

"At tibi pro scelere, - exclamat -, pro talibus ausis

di (si qua est caelo pietas, quae talia curet)

persolvant grates dignas, et praemia reddant

debita: qui nati coram me cernere letum

fecisti, et patrios foedasti funere voltus.

At non ille, satum quo te mentiris, Achilles

talis in hoste fuit Priamo: sed iura fidemque

supplicis erubuit, corpusque exsangue sepulcro

reddidit Hectoreum, meque in mea regna remisit."

Sic fatus senior, telumque imbelle sine ictu

coniecit, rauco quod protinus aere repulsum,

et summo clypei nequicquam umbone pependit.

Cui Pyrrhus: "Referes ergo haec, et nuntius ibis

Pelidae genitori: illi mea tristia facta,

degeneremque Neoptolemum narrare memento.

Nunc morere." Haec dicens altaria ad ipsa trementem

traxit, et in multo lapsantem sanguine nati;

implicuitque comam laeva, dextraque coruscum

extulit, ac lateri capulo tenus abdidit ensem.

Haec finis Priami fatorum: hic exitus illum

sorte tulit, Troiam incensam, et prolapsa videntem

Pergama, tot quondam populis terrisque superbum

regnatorem Asiae. Iacet ingens litore truncus,

avulsumque humeris caput, et sine nomine corpus.

At me tum primum saevus circumstetit horror:

obstupui: subiit cari genitoris imago,

ut regem aequaevum crudeli volnere vidi

vitam exhalantem: subiit deserta Creusa,

et direpta domus, et parvi casus Iuli.

Respicio, et, quae sit me circum copia, lustro.

Deseruere omnes defessi, et corpora saltu

ad terram misere, aut ignibus aegra dedere.

Iamque adeo super unus eram; cum limina Vestae

servantem, et tacitam secreta in sede latentem

Tyndarida aspicio: dant clara incendia lucem

erranti, passimque oculos per cuncta ferenti.

Illa sibi infestos eversa ob Pergama Teucros,

et poenas Danaum, et deserti coniugis iras

praemetuens, Troiae, et patriae communis Erinnys,

abdiderat sese, atque aris invisa sedebat.

Exarsere ignes animo: subit ira, cadentem

ulcisci patriam, et sceleratas sumere poenas.

"Scilicet haec Spartam incolumis, patriasque Mycenas

aspiciet; partoque ibit regina triumpho?

Coniugiumque domumque, patres natosque videbit

Iliadum turba, et Phrygiis comitata ministris?

Occiderit ferro Priamus? Troia arserit igni?

Dardanium totiens fudarit sanguine litus?

Non ita: namque etsi nullum memorabile nomen

foeminea in poena est, nec habet victoria laudem:

extinxisse nefas tamen, et sumpsisse merentis

laudabor poenas; animumque explesse iuvabit

ultricis flammae, et cineres satiasse meorum."

Talia iactabam, et furiata mente ferebar:

cum mihi se, non ante oculis tam clara, videndam

obtulit, et pura per noctem in luce refulsit

alma parens, confessa deam, qualisque videri

caelicolis, et quanta solet: dextraque prehensum

continuit; roseoque haec insuper addidit ore:

"Nate, quis indomitas tantus dolor excitat iras?

Quid furis? Aut quonam nostri tibi cura recessit?

Non prius aspicies, ubi fessum aetate parentem

liqueris Anchisen? Superet coniunxne Creusa,

Ascaniusque puer? Quos omnes undique Graiae

circum errant acies, et, ni mea cura resistat,

iam flammae tulerint, inimicus et hauserit ensis.

Non tibi Tyndaridis facies invisa Lacaenae,

culpatusve Paris, verum inclementia divom

has evertit opes, sternitque a culmine Troiam.

Aspice (namque omnem, quae nunc obducta tuenti

mortales hebetat visus tibi, et humida circum

caligat, nubem eripiam: tu ne qua parentis

iussa time, neu praeceptis parere recusa)

hic, ubi disiectas moles, avulsaque saxis

saxa vides, mistoque undantem pulvere fumum,

Neptunus muros, magnoque emota tridenti

fundamenta quatit, totamque a sedibus urbem

eruit: hic Iuno Scaeas saevissima portas

prima tenet, sociumque furens a navibus agmen

ferro accincta vocat.

Iam summas arces Tritonia (respice) Pallas

insedit, nimbo effulgens, et Gorgone saeva.

Ipse pater Danais animos, viresque secundas

sufficit: ipse deos in Dardana suscitat arma.

Eripe, nate, fugam, finemque impone labori.

Nusquam abero, et tutum patrio te limine sistam."

Dixerat, et spissis noctis se condidit umbris.

Apparent dirae facies, inimicaque Troiae

numina magna deum.

Tum vero omne mihi visum considere in ignes

Ilium, et ex imo verti Neptunia Troia.

Ac veluti summis antiquam in montibus ornum

cum ferro accisam, crebrisque bipennibus instant

eruere agricolae certatim; illa usque minatur,

et tremefacta comam concusso vertice nutat:

volneribus donec paulatim evicta supremum

congemuit, traxitque iugis avulsa ruinam.

Descendo, ac, ducente deo, flammam inter et hostes

expedior: dant tela locum, flammaeque recedunt.

Ast ubi iam patriae perventum ad limina sedis,

antiquasque domos, genitor, quem tollere in altos

optabam primum montes, primumque petebam,

abnegat excisa vitam producere Troia,

exsiliumque pati. "Vos o, quibus integer aevi

sanguis, - ait -, solidaeque suo stant robore vires,

vos agitate fugam.

Me si caelicolae voluissent ducere vitam,

has mihi servassent sedes: satis una superque

vidimus excidia, et captae superavimus urbi.

Sic o, sic positum affati discedite corpus.

Ipse manu mortem inveniam: miserebitur hostis,

exuviasque petet: facilis iactura sepulcri est.

Iam pridem invisus divis, et inutilis annos

demoror, ex quo me divom pater, atque hominum rex

fulminis afflavit ventis, et contigit igni."

Talia perstabat memorans, fixusque manebat.

Nos contra effusi lacrimis, coniunxque Creusa,

Ascaniusque, omnisque domus, ne vertere secum

cuncta pater, fatoque urgenti incumbere vellet.

Abnegat, incoeptoque et sedibus haeret in isdem.

Rursus in arma feror, mortemque miserrimus opto.

Nam quod consilium, aut quae iam fortuna dabatur?

"Mene efferre pedem, genitor, te posse relicto

sperasti? Tantumque nefas patrio excidit ore?

Si nihil ex tanta superis placet urbe relinqui,

et sedet hoc animo, perituraeque addere Troiae

teque tuosque iuvat, pate isti ianua leto.

Iamque aderit multo Priami de sanguine Pyrrhus,

natum ante ora patris, patrem qui obtruncat ad aras.

Hoc erat, alma parens, quod me per tela, per ignes

eripis? Ut mediis hostem in penetralibus, utque

Ascaniumque patremque meum, iuxtaque Creusam

alterum in alterius mactatos sanguine cernam?

Arma viri, ferte arma, vocat lux ultima victos:

reddite me Danais, sinite instaurata revisam

proelia: numquam omnes hodie moriemur inulti."

Hic ferro accingor rursus, clypeoque sinistram

insertabam aptans, meque extra tecta ferebam.

Ecce autem complexa pedes in limine coniunx

haerebat, parvumque patri tendebat Iulum.

"Si periturus abis, et nos rape in omnia tecum:

sin aliquam expertus sumptis spem ponis in armis,

hanc primum tutare domum. Cui parvus Iulus,

cui pater, et coniunx quondam tua dicta relinquor?"

Talia vociferans gemitu tectum omne replebat:

cum subitum, dictuque oritur mirabile monstrum.

Namque manus inter, maestorumque ora parentum

ecce levis summo de vertice visus Iuli

fundere lumen apex, tactuque innoxia molli

lambere flamma comas, et circum tempora pasci.

Nos pavidi trepidare metu, crinemque flagrantem

excutere, et sanctos restinguere fontibus ignes.

At pater Anchises oculos ad sidera laetus

extulit, et caelo palmas cum voce tetendit:

"Iuppiter omnipotens, precibus si flecteris ullis,

aspice nos; hoc tantum: et, si pietate meremur,

da deinde auxilium pater, atque haec omnia firma."

Vix ea fatus erat senior; subitoque fragore

intonuit laevum, et de caelo lapsa per umbras

stella facem ducens multa cum luce cucurrit.

Illam summa super labentem culmina tecti

cernimus Idaea clarum se condere silva,

signantemque vias; tum longo limite sulcus

dat lucem, et late circum loca sulphure fumant.

Hic vero victus genitor se tollit ad auras,

affaturque deos, et sanctum sidus adorat:

"Iam iam nulla mora est: sequor, et, qua ducitis, adsum.

Di patrii servate domum, servate nepotem:

vestrum hoc augurium, vestroque in numine Troia est.

Cedo equidem; nec, nate, tibi comes ire recuso."

Dixerat ille: et iam per moenia clarior ignis

auditur, propiusque aestus incendia volvunt.

"Erga age, care pater, cervici imponere nostrae:

ipse subibo humeris, nec me labor iste gravabit.

Quo res cumque cadent, unum et commune periclum,

una salus ambobus erit; mihi parvus Iulus

sit comes, et longe servet vestigia coniunx.

Vos famuli, quae dicam, animis advertite vestris.

Est urbe egressis tumulus, templumque vetustum

desertae Cereris, iuxtaque antiqua cupressus

religione patrum multos servata per annos:

hanc ex diverso sedem veniemus in unam.

Tu, genitor, cape sacra manu, patriosque Penates;

me bello e tanto digressum, et caede recenti

attrectare nefas, donec me flumine vivo

abluero."

Haec fatus, latos humeros, subiectaque colla

veste super, fulvique insternor pelle leonis,

succedoque oneri: dextrae se parvus Iulus

implicuit, sequiturque patrem non passibus aequis:

pone subit coniunx, ferimur per opaca locorum:

et me, quem dudum non ulla iniecta movebant

tela, neque adverso glomerati ex agmine Grai,

nunc omnes terrent aurae, sonus excitat omnis

suspensum, et pariter comitique onerique timentem.

Iamque propinquabam portis, omnemque videbar

evasisse viam, subito cum creber ad aures

visus adesse pedum sonitus: genitorque per umbram

prospiciens: "Nate, - exclamat -, fuge nate, propinquant;

ardentes clypeos, atque aera micantia cerno."

Hic mihi nescio quod trepido male numen amicum

confusam eripuit mentem: namque avia cursu

dum sequor, et nota excedo regione viarum,

heu misero coniunx fatone erepta Creusa

substitit, erravitne via, seu lassa resedit,

incertum: nec post oculis est reddita nostris.

Nec prius amissam respexi, animumque reflexi,

quam tumulum antiquae Cereris, sedemque sacratam

venimus. Hic demum collectis omnibus, una

defuit, et comites natumque virumque fefellit.

Quem non incusavi amens hominumque deorumque?

Aut quid in eversa vidi crudelius urbe?

Ascanium, Anchisenque patrem, Teucrosque Penates

commendo sociis, et curva valle recondo.

Ipse urbem repeto, et cingor fulgentibus armis.

Stat casus renovare omnes, omnemque reverti

per Troiam, et rursus caput obiectare periclis.

Principio muros, obscuraque limina portae,

qua gressum extuleram, repeto; et vestigia retro

observata sequor per noctem, et lumine lustro.

Horror ubique animos, simul ipsa silentia terrent.

Inde domum si forte pedem, si forte tulisset,

me refero. Irruerant Danai, et tectum omne tenebant.

Ilicet ignis edax flamma ad fastigia vento

volvitur; exsuperant flammae; furit aestus ad auras.

Procedo ad Priami sedes, arcemque reviso.

Et iam porticibus vacuis, Iunonis asylo

custodes lecti Phoenix, et dirus Ulixes

praedam asservabant: huc undique Troia gaza

incensis erepta adytis, mensaeque deorum,

crateresque auro solidi, captivaque vestis

congeritur: pueri, et pavidae longo ordine matres

stant circum.

Ausus quin etiam voces iactare per umbram,

implevi clamore vias; maestusque Creusam

nequiquam ingeminans iterumque iterumque vocavi.

Quaerenti, et tectis urbis sine fine furenti

infelix simulacrum, atque ipsius umbra Creusae

visa mihi ante oculos, et nota maior imago.

Obstupui, steteruntque comae, et vox faucibus haesit.

Tum sic affari, et curas his demere dictis:

"Quid tantum insano iuvat indulgere labori,

o dulcis coniunx? Non haec sine numine divom

eveniunt: nec te hinc comitem asportare Creusam

fas: haud ille sinit superi regnator Olympi.

Longa tibi exsilia, et vastum maris aequor arandum.

Ad terram Hesperiam venies: ubi Lydius, arva

inter opima virum, leni fluit agmine Tibris.

Illic res laetae, regnumque et regia coniunx

parta tibi; lacrimas dilectae pelle Creusae.

Non ego Myrmidonum sedes, Dolopumve superbas

aspiciam, aut Grais servitum matribus ibo,

Dardanis et divae Veneris nurus.

Sed me magna deum genitrix his detinet oris.

Iamque vale, et nati serva communis amorem."

Haec ubi dicta dedit, lacrimantem et multa volentem

dicere deseruit, tenuesque recessit in auras.

Ter conatus ibi collo dare brachia circum;

ter frustra comprensa manus effugit imago,

par levibus ventis, volucrique simillima somno.

Sic demum socios consumpta nocte reviso.

Atque hic ingentem comitum affluxisse novorum

invenio admirans numerum, matresque, virosque,

collectam exsilio pubem, miserabile vulgus.

Undique convenere, animis opibusque parati,

in quascumque velim pelago deducere terras.

Iamque iugis summae surgebat Lucifer Idae,

ducebatque diem: Danaique obsessa tenebant

limina portarum: nec spes opis ulla dabatur.

Cessi, et sublato montem genitore petivi.

Cōntĭcŭēre ōmnēs, īntēntīque ōră tĕnēbānt.

Īndĕ tŏrō pătĕr Aēnēās sīc ōrsŭs ăb āltō:

"Īnfāndūm rēgīnă iŭbēs rĕnŏvārĕ dŏlōrēm,

Trōiānās ŭt ŏpēs, ēt lāmēntābĭlĕ rēgnūm

ērŭĕrīnt Dănăī, quaēque īpsĕ mĭsērrĭmă vīdī,

ēt quōrūm pārs māgnă fŭī. Quīs tālĭă fāndō

Mŷrmĭdŏnūm, Dŏlŏpūmve, aūt dūrī mīlĕs Ŭlīxī

tēmpĕrĕt ā lăcrĭmīs? Ēt iām nōx hūmĭdă caēlō

praēcĭpĭtāt; suādēntquĕ cădēntĭă sīdĕră sōmnōs.

Sēd sī tāntŭs ămōr cāsūs cōgnōscĕrĕ nōstrōs,

ēt brĕvĭtēr Troīaē sūprēmum aūdīrĕ lăbōrēm,

quāmquam ănĭmūs mĕmĭnīsse hōrrēt, lūctūquĕ rĕfūgīt,

īncĭpĭām. Frāctī bēllō, fātīsquĕ rĕpūlsī

dūctōrēs Dănăūm, tōt iām lābēntĭbŭs ānnīs,

īnstār mōntĭs ĕquūm, dīvīnā Pāllădĭs ārtĕ,

aēdĭfĭcānt; sēctāque īntēxūnt ābiĕtĕ cōstās.

Vōtūm prō rĕdĭtū sĭmŭlānt: ĕă fāmă văgātūr.

Hūc dēlēctă vĭrūm sōrtītī cōrpŏră, fūrtīm

īnclūdūnt caēcō lătĕrī: pĕnĭtūsquĕ căvērnās

īngēntēs, ŭtĕrūmque ārmātō mīlĭtĕ cōmplēnt.

Ēst īn cōnspēctū Tĕnĕdōs, nōtīssĭmă fāmā

īnsŭlă, dīvĕs ŏpūm, Prĭămī dūm rēgnă mănēbānt;

nūnc tāntūm sĭnŭs, ēt stătĭō mălĕ fīdă cărīnīs.

Hūc sē prōvēctī dēsērto īn lītŏrĕ cōndūnt.

Nōs ăbĭīssĕ răti, ēt vēntō pĕtĭīssĕ Mўcēnās.

Ērgo ōmnīs lōngō sōlvīt sē Teūcrĭă lūctū:

pāndūntūr pōrtaē: iŭvăt īre, ēt Dōrĭcă cāstră

dēsērtōsquĕ vĭdērĕ lŏcōs, lītūsquĕ rĕlīctūm.

Hīc Dŏlŏpūm mănŭs, hīc saēvūs tēndēbăt Ăchīllēs:

clāssĭbŭs hīc lŏcŭs, hīc ăcĭēs cērtārĕ sŏlēbānt.

Pārs stŭpĕt īnnūptaē dōnum ēxĭtĭālĕ Mĭnērvaē,

ēt mōlēm mīrāntŭr ĕquī: prīmūsquĕ Thўmoētēs

dūci īntrā mūrōs hōrtātŭr, ĕt ārcĕ lŏcārī;

sīvĕ dŏlō, seū iām Troīaē sīc fātă fĕrēbānt.

Āt Căpўs, ēt quōrūm mĕlĭōr sēntēntĭă mēntī,

aūt pĕlăgō Dănăum īnsĭdĭās, sūspēctăquĕ dōnă

praēcĭpĭtārĕ iŭbēnt, sūbiēctīsque ūrĕrĕ flāmmīs;

aūt tĕrĕbrārĕ căvās ŭtĕri, ēt tēntārĕ lătēbrās.

Scīndĭtŭr īncērtūm stŭdĭa īn cōntrārĭă vūlgūs.

Prīmŭs ĭbi ānte ōmnēs, māgnā cŏmĭtāntĕ cătērvā,

Lāŏcŏōn ārdēns sūmmā dēcūrrĭt ăb ārcĕ:

ēt prŏcŭl: "Ō mĭsĕrī, quaē tānta īnsānĭă, cīvēs?

Crēdĭtĭs āvēctōs hōstēs? Aūt ūllă pŭtātīs

dōnă cărērĕ dŏlīs Dănăūm? Sīc nōtŭs Ŭlīxēs?

Aūt hōc īnclūsī līgno ōccūltāntŭr Ăchīvī;

aūt haēc īn nōstrōs făbrĭcāta ēst māchĭnă mūrōs,

īnspēctūră dŏmōs, vēntūrăquĕ dēsŭpĕr ūrbī;

aūt ălĭquīs lătĕt ērrŏr. Ĕquō nē crēdĭtĕ Teūcrī.

Quīdquĭd ĭd ēst, tĭmĕō Dănăōs ēt dōnă fĕrēntēs."

Sīc fātūs, vălĭdīs īngēntēm vīrĭbŭs hāstām

īn lătŭs, īnquĕ fĕrī cūrvām cōmpāgĭbŭs ālvūm

cōntōrsīt. Stĕtĭt īllă trĕmēns: ŭtĕrōquĕ rĕcūssō,

īnsōnvērĕ căvaē, gĕmĭtūmquĕ dĕdērĕ căvērnaē.

Ēt, sī fātă dĕūm, sī mēns nōn laēvă fŭīssēt,

īmpŭlĕrāt fērro Ārgŏlĭcās foēdārĕ lătēbrās:

Troīăquĕ nūnc stārēs, Prĭămīque ārx āltă mănērēs.

Ēccĕ mănūs iŭvĕnem īntĕrĕā pōst tērgă rĕvīnctūm

pāstōrēs māgno ād rēgēm clāmōrĕ trăhēbānt

Dārdănĭdaē, quī se īgnōtūm vĕnĭēntĭbŭs ūltrō,

hōc īpsum ūt strŭĕrēt, Troīāmque ăpĕrīrĕt Ăchīvīs,

ōbtŭlĕrāt, fīdēns ănĭmi, ātque ĭn ŭtrūmquĕ părātūs,

seū vērsārĕ dŏlōs, seū cērtae ōccūmbĕrĕ mōrtī.

Ūndĭquĕ vīsēndī stŭdĭō Trōiānă iŭvēntūs

cīrcūmfūsă rŭīt, cērtātque īllūdĕrĕ cāptō.

Āccĭpĕ nūnc Dănăum īnsĭdĭās, ēt crīmĭne ăb ūnō

dīsce ōmnēs.

Nāmque ūt cōnspēctu īn mĕdĭō tūrbātŭs ĭnērmīs

cōnstĭtĭt, ātque ŏcŭlīs Phrўgĭa āgmĭnă cīrcūmspēxīt:

"Heū quaē nūnc tēllūs, īnquīt, quaē me aēquŏră pōssūnt

āccĭpĕre? Aūt quīd iām mĭsĕrō mĭhĭ dēnĭquĕ rēstāt?

Cuī nĕque ăpūd Dănăōs ūsquām lŏcŭs: īnsŭpĕr īpsī

Dārdănĭdae īnfēnsī poēnās cūm sānguĭnĕ pōscūnt."

Quō gĕmĭtū cōnvērsi ănĭmī, cōmprēssŭs ĕt ōmnīs

īmpĕtŭs: hōrtāmūr fārī; quō sānguĭnĕ crētūs,

quīdvĕ fĕrāt, mĕmŏrēt; quaē sīt fīdūcĭă cāptō.

Īlle haēc, dēpŏsĭtā tāndēm fōrmīdĭnĕ, fātūr.

"Cūncta ĕquĭdēm tĭbĭ, rēx, fŭĕrīnt quaēcūmquĕ, fătēbōr

vēra, īnquīt: nĕquĕ me Ārgŏlĭcā dē gēntĕ nĕgābō:

hōc prīmūm: nēc, sī mĭsĕrūm fōrtūnă Sĭnōnēm

fīnxīt, vānum ĕtĭām, mēndācēmque īmprŏbă fīngēt.

Fāndo ălĭquīd sī fōrtĕ tŭās pērvēnĭt ăd aūrēs

Bēlīdaē nōmēn Pălămēdĭs, ĕt īnclўtă fāmā

glōrĭă; (quēm fālsā sūb prōdĭtĭōnĕ Pĕlāsgī

īnsōntem, īnfāndo īndĭcĭō, quĭă bēllă vĕtābāt,

dēmīsērĕ nĕcī, nūnc cāssūm lūmĭnĕ lūgēnt)

īllī mē cŏmĭtem, ēt cōnsānguĭnĭtātĕ prŏpīnquūm

paūpĕr ĭn ārmă pătēr prīmīs hūc mīsĭt ăb ānnīs.

Dūm stābāt rēgno īncŏlŭmīs, rēgnūmquĕ vĭgēbāt

cōnsĭlĭīs, ēt nōs ălĭquōd nōmēnquĕ dĕcūsquĕ

gēssĭmŭs. Īnvĭdĭā pōstquām pēllācĭs Ŭlīxī

(haūd īgnōtă lŏquōr) sŭpĕrīs cōncēssĭt ăb ōrīs,

āfflīctūs vītam īn tĕnĕbrīs lūctūquĕ trăhēbām,

ēt cāsum īnsōntīs mēcum īndīgnābăr ămīcī.

Nēc tăcŭī dēmēns; ēt mē, sōrs sī quă tŭlīssēt,

sī pătrĭōs ūmquām rĕmĕāssēm vīctŏr ăd Ārgōs,

prōmīsi ūltōrem, ēt vērbīs ŏdĭa āspĕră mōvī.

Hīnc mĭhĭ prīmă mălī lābēs: hīnc sēmpĕr Ŭlīxēs

crīmĭnĭbūs tērrērĕ nŏvīs: hīnc spārgĕrĕ vōcēs

īn vūlgum āmbĭgŭās, ēt quaērĕrĕ cōnscĭŭs ārmă.

Nēc rĕquĭēvĭt ĕnīm, dōnēc Cālchāntĕ mĭnīstrō.

Sēd quĭd ĕgo haēc aūtēm nēquīquam īngrātă rĕvōlvō?

Quīdvĕ mŏrōr? Si ōmnēs ūno ōrdĭne hăbētĭs Ăchīvōs,

īdque aūdīrĕ săt ēst: iāmdūdūm sūmĭtĕ poēnās.

Hōc Ĭthăcūs vĕlĭt, ēt māgnō mērcēntŭr Ătrīdaē."

Tūm vēro ārdēmūs scītāri ēt quaērĕrĕ caūsās

īgnārī scĕlĕrūm tāntōrum ārtīsquĕ Pĕlāsgaē.

Prōsĕquĭtūr păvĭtāns, ēt scītō pēctŏrĕ fātūr.

"Saēpĕ fŭgām Dănăī Troīā cŭpĭērĕ rĕlīctā

mōlīri, ēt lōngō fēssī dīscēdĕrĕ bēllō:

fēcīssēntque ŭtĭnām! Saēpe īllōs āspĕră pōntī

īntērclūsĭt hĭēms, ēt tērrŭĭt Aūstĕr ĕūntēs.

Praēcĭpŭē cūm iam hīc trăbĭbūs cōntēxtŭs ăcērnīs

stārĕt ĕquūs, tōtō sŏnŭērūnt aēthĕrĕ nīmbī.

Sūspēnsi Eūrўpўlūm scītātum ōrācŭlă Phoēbī

mīttĭmŭs: īsque ădўtīs haēc trīstĭă dīctă rĕpōrtāt:

"Sānguĭnĕ plācāstīs vēntōs, ēt vīrgĭnĕ caēsā,

cūm prīmum Īlĭăcās Dănăī vēnīstĭs ăd ōrās:

sānguĭnĕ quaērēndī rĕdĭtūs, ănĭmāquĕ lĭtāndūm

Ārgŏlĭcā." Vūlgī quaē vōx ūt vēnĭt ăd aūrēs,

ōbstŭpŭēre ănĭmī, gĕlĭdūsquĕ pĕr īmă cŭcūrrīt

ōssă trĕmōr: cuī fātă părēnt, quēm pōscăt Ăpōllŏ.

Hīc Ĭthăcūs vātēm māgnō Cālchāntă tŭmūltū

prōtrăhĭt īn mĕdĭōs: quaē sīnt ĕă nūmĭnă dīvōm

flāgĭtăt: ēt mĭhĭ iām mūltī crūdēlĕ cănēbānt

ārtĭfĭcīs scĕlŭs, ēt tăcĭtī vēntūră vĭdēbānt.

Bīs quīnōs sĭlĕt īllĕ dĭēs, tēctūsquĕ rĕcūsāt

prōdĕrĕ vōcĕ sŭā quēmquam, aūt ōppōnĕrĕ mōrtī.

Vīx tāndēm māgnīs Ĭthăcī clāmōrĭbŭs āctūs

cōmpŏsĭtō rūmpīt vōcem, ēt mē dēstĭnăt āraē.

Āssēnsēre ōmnēs, ēt quaē sĭbĭ quīsquĕ tĭmēbāt,

ūnĭŭs īn mĭsĕri ēxĭtĭūm cōnvērsă tŭlērĕ.

Iāmquĕ dĭēs īnfānda ădĕrāt: mĭhĭ sācră părārī,

ēt fālsaē frūgēs, ēt cīrcūm tēmpŏră vīttaē.

Ērĭpŭī (fătĕōr) lētō me, ēt vīncŭlă rūpī:

līmōsōquĕ lăcū pēr nōctem ōbscūrŭs ĭn ūlvā

dēlĭtŭī, dūm vēlă dărēnt, sī fōrtĕ dĕdīssēnt.

Nēc mĭhĭ iām pătrĭam āntīquām spēs ūllă vĭdēndī,

nēc dūlcēs nātōs ēxōptātūmquĕ părēntēm:

quōs īllī fōrs ād poēnās ōb nōstră rĕpōscēnt

ēffŭgĭa, ēt cūlpam hānc mĭsĕrōrūm mōrtĕ pĭābūnt.

Quōd tē pēr sŭpĕrōs, ēt cōnscĭă nūmĭnă vērī,

pēr, sī qua ēst, quaē rēstăt ădhūc mōrtālĭbŭs ūsquām

īntĕmĕrātă fĭdēs, ōrō, mĭsĕrērĕ lăbōrūm

tāntōrūm, mĭsĕrēre ănĭmī nōn dīgnă fĕrēntīs."

Hīs lăcrĭmīs vītām dămŭs, ēt mĭsĕrēscĭmŭs ūltrō.

Īpsĕ vĭrō prīmūs mănĭcās, ātque ārtă lĕvārī

vīnclă iŭbēt Prĭămūs, dīctīsque ĭtă fātŭr ămīcīs:

"Quīsquĭs ĕs, āmīssōs hīnc iam ōblīvīscĕrĕ Grāiōs:

nōstĕr ĕrīs, mĭhĭque haēc ēdīssĕrĕ vēră rŏgāntī.

Quō mōlem hānc īmmānĭs ĕquī stătŭērĕ? Quĭs aūctōr?

Quīdvĕ pĕtūnt? Quaē rēlĭgĭo? Aūt quaē māchĭnă bēllī?"

Dīxĕrăt. Īllĕ dŏlīs īnstrūctŭs, ĕt ārtĕ Pĕlāsgā

sūstŭlĭt ēxūtās vīnclīs ād sīdĕră pālmās:

"Vōs aētērni īgnēs, ēt nōn vĭŏlābĭlĕ vēstrūm

tēstōr nūmĕn, - ăīt -: vōs ārae, ēnsēsquĕ nĕfāndī,

quōs fūgī, vīttaēquĕ dĕūm, quās hōstĭă gēssī:

fās mĭhĭ Grāiōrūm sācrātă rĕsōlvĕrĕ iūră:

fās ōdīssĕ vĭrōs, ātque ōmnĭă fērrĕ sŭb aūrās,

sī quă tĕgūnt: tĕnĕōr pătrĭā nēc lēgĭbŭs ūllīs.

Tū mŏdŏ prōmīssīs mănĕās, sērvātăquĕ sērvēs

Troīă fĭdēm, sī vēră fĕrām, sī māgnă rĕpēndām.

Ōmnīs spēs Dănăum, ēt coēptī fīdūcĭă bēllī

Pāllădĭs aūxĭlĭīs sēmpēr stĕtĭt: īmpĭŭs ēx quō

Tŷdīdēs sĕd ĕnīm, scĕlĕrūmque īnvēntŏr Ŭlīxēs,

fātāle āggrēssī sācrāto āvēllĕrĕ tēmplō

Pāllădĭūm, caēsīs sūmmaē cūstōdĭbŭs ārcīs,

cōrrĭpŭērĕ săcram ēffĭgĭēm, mănĭbūsquĕ crŭēntīs

vīrgĭnĕās aūsī Dīvaē cōntīngĕrĕ vīttās:

ēx īllō flŭĕre, āc rētrō sūblāpsă rĕfērrī

spēs Dănăūm: frāctaē vīrēs. ādvērsă dĕaē mēns.

Nēc dŭbĭīs ĕă sīgnă dĕdīt Trītōnĭă mōnstrīs.

Vīx pŏtĭtūm cāstrīs sĭmŭlācrum, ārsērĕ cŏrūscaē

lūmĭnĭbūs flāmmae ārrēctīs: sālsūsquĕ pĕr ārtūs

sūdŏr ĭīt: tērque īpsă sŏlō (mīrābĭlĕ dīctū)

ēmĭcŭīt, pārmāmquĕ fĕrēns hāstāmquĕ trĕmēntēm.

Ēxtēmplō tēmptāndă fŭgā cănĭt aēquŏră Cālchās;

nēc pōsse Ārgŏlĭcīs ēxscīndī Pērgămă tēlīs,

ōmnĭă nī rĕpĕtānt Ārgīs, nūmēnquĕ rĕdūcānt.

Quōd pĕlăgo, ēt cūrvīs sēcum ādvēxērĕ cărīnīs.

Ēt nūnc, quōd pătrĭās vēntō pĕtĭērĕ Mўcēnās,

ārmă dĕōsquĕ părānt cŏmĭtēs, pĕlăgōquĕ rĕmēnsō

īmprōvīsi ădĕrūnt. Ĭtă dīgĕrĭt ōmnĭă Cālchās.

Hānc prō Pāllădĭō mŏnĭtī, prō nūmĭnĕ laēsō

ēffĭgĭēm stătŭērĕ, nĕfās quaē trīstĕ pĭārēt.

Hānc tămĕn īmmēnsām Cālchās āttōllĕrĕ mōlēm

rōbŏrĭbūs tēxtīs, caēlōque ēdūcĕrĕ iūssīt,

nē rĕcĭpī pōrtīs, aūt dūci īn moēnĭă pōssīt,

neū pŏpŭlum āntīquā sūb rēlĭgĭōnĕ tŭērī.

Nām sī vēstră mănūs vĭŏlāssēt dōnă Mĭnērvaē,

tūm māgnum ēxĭtĭūm (quōd dī prĭŭs ōmĕn ĭn īpsūm

cōnvērtānt) Prĭămi īmpĕrĭō, Phrўgĭbūsquĕ fŭtūrūm:

sīn mănĭbūs vēstrīs vēstram āscēndīssĕt ĭn ūrbēm,

ūltro Ăsĭām māgnō Pĕlŏpēia ād moēnĭă bēllō

vēntūram, ēt nōstrōs ĕă fātă mănērĕ nĕpōtēs."

Tālĭbŭs īnsĭdĭīs, pēriūrīque ārtĕ Sĭnōnīs

crēdĭtă rēs; cāptīquĕ dŏlīs, lăcrĭmīsquĕ cŏāctī,

quōs nĕquĕ Tŷdīdēs, nēc Lārīssaēŭs Ăchīllēs,

nōn ānnī dŏmŭērĕ dĕcēm, nōn mīllĕ cărīnaē.

Hīc ălĭūd māiūs mĭsĕrīs, mūltōquĕ trĕmēndūm

ōbĭcĭtūr măgĭs, ātque īmprōvĭdă pēctŏră tūrbāt.

Lāŏcŏōn, dūctūs Nēptūnō fōrtĕ săcērdōs,

sōlēmnēs taūrum īngēntēm māctābăt ăd ārās.

Ēcce aūtēm gĕmĭni ā Tĕnĕdō trānquīllă pĕr āltă

(hōrrēscō rĕfĕrēns) īmmēnsīs ōrbĭbŭs ānguēs

īncūmbūnt pĕlăgō, părĭtērque ād lītŏră tēndūnt:

pēctŏră quōrum īntēr flūctūs ārrēctă, iŭbaēquĕ

sānguĭnĕae ēxsŭpĕrānt ūndās: pārs cētĕră pōntūm

pōnĕ lĕgīt, sīnvātque īmmēnsă vŏlūmĭnĕ tērgă.

Fīt sŏnĭtūs spūmāntĕ sălō: iāmque ārvă tĕnēbānt,

ārdēntēsque ŏcŭlōs sūffēctī sānguĭne, ĕt īgnī,

sībĭlă lāmbēbānt līnguīs vībrāntĭbŭs ōră.

Dīffŭgĭmūs vīsu ēxsānguēs: īlli āgmĭnĕ cērtō

Lāŏcŏōntă pĕtūnt, ēt prīmūm pārvă dŭōrūm

cōrpŏră nātōrūm sērpēns āmplēxŭs ŭtērquĕ

īmplĭcăt, ēt mĭsĕrōs mōrsū dēpāscĭtŭr ārtūs.

Pōst īpsum aūxĭlĭō sŭbĕūntem, āc tēlă fĕrēntēm

cōrrĭpĭūnt, spīrīsquĕ lĭgānt īngēntĭbŭs; ēt iām

bīs mĕdĭum āmplēxī, bīs cōllō squāmĕă cīrcūm

tērgă dătī, sŭpĕrānt căpĭte ēt cērvīcĭbŭs āltīs.

Īllĕ sĭmūl mănĭbūs tēndīt dīvēllĕrĕ nōdōs

pērfūsūs sănĭē vīttās, ātrōquĕ vĕnēnō:

clāmōrēs sĭmŭl hōrrēndōs ād sīdĕră tōllīt:

quālēs mūgītūs, fūgīt cūm saūcĭŭs ārās

taūrŭs, ĕt īncērtam ēxcūssīt cērvīcĕ sĕcūrīm.

Āt gĕmĭnī lāpsū dēlūbra ād sūmmă drăcōnēs

ēffŭgĭūnt, saēvaēquĕ pĕtūnt Trītōnĭdĭs ārcēm,

sūb pĕdĭbūsquĕ dĕaē, clўpĕīquĕ sŭb ōrbĕ tĕgūntūr.

Tūm vērō trĕmĕfāctă nŏvūs pēr pēctŏră cūnctīs

īnsīnvāt păvŏr, ēt scĕlŭs ēxpēndīssĕ mĕrēntēm

Lāŏcŏōntă fĕrūnt, sācrūm quī cūspĭdĕ rōbūr

laēsĕrĭt, ēt tērgō scĕlĕrātam īntōrsĕrĭt hāstām.

Dūcēndum ād sēdēs sĭmŭlācrum, ōrāndăquĕ dīvaē

nūmĭnă cōnclāmānt.

Dīvĭdĭmūs mūrōs, ēt moēnĭă pāndĭmŭs ūrbīs.

Āccīngūnt ōmnēs ŏpĕrī, pĕdĭbūsquĕ rŏtārūm

sūbĭcĭūnt lāpsūs, ēt stūpĕă vīncŭlă cōllō

īntēndūnt: scāndīt fātālīs māchĭnă mūrōs

fēta ārmīs: cīrcūm pŭĕri īnnūptaēquĕ pŭēllaē

sācră cănūnt, fūnēmquĕ mănū cōntīngĕrĕ gaūdēnt.

Īllă sŭbīt, mĕdĭaēquĕ mĭnāns īllābĭtŭr ūrbī.

Ō pătrĭa, ō dīvōm dŏmŭs Īlĭum, ĕt īnclĭtă bēllō

moēnĭă Dārdănĭdūm! Quătĕr īpso īn līmĭnĕ pōrtaē

sūbstĭtĭt, ātque ŭtĕrō sŏnĭtūm quătĕr ārmă dĕdērĕ.

Īnstāmūs tămĕn īmmĕmŏrēs, caēcīquĕ fŭrōrĕ,

ēt mōnstrum īnfēlīx sācrātā sīstĭmŭs ārcĕ.

Tūnc ĕtĭām fātīs ăpĕrīt Cāssāndră fŭtūrīs

ōră, dĕī iūssū, nōn ūmquām crēdĭtă Teūcrīs.

Nōs dēlūbră dĕūm mĭsĕrī, quĭbŭs ūltĭmŭs ēssēt

īllĕ dĭēs, fēstā vēlāmūs frōndĕ pĕr ūrbēm.

Vērtĭtŭr īntĕrĕā caēlum, ēt rŭĭt Ōcĕănō nōx

īnvōlvēns ūmbrā māgnā tērrāmquĕ pŏlūmquĕ

Mŷrmĭdŏnūmquĕ dŏlōs. Fūsī pēr moēnĭă Teūcrī

cōntĭcŭērĕ: sŏpōr fēssōs cōmplēctĭtŭr ārtūs.

Ēt iam Ārgīvă phălānx īnstrūctīs nāvĭbŭs ībāt

ēt Tĕnĕdō, tăcĭtaē pĕr ămīcă sĭlēntĭă Lūnaē,

lītŏră nōtă pĕtēns: flāmmās cūm rēgĭă pūppīs

ēxtŭlĕrāt; fātīsquĕ dĕūm dēfēnsŭs ĭnīquīs

īnclūsōs ŭtĕrō Dănăōs, ēt pīnĕă fūrtīm

lāxāt claūstră Sĭnōn. Īllōs pătĕfāctŭs ăd aūrās

rēddĭt ĕquūs: laētīquĕ căvō sē rōbŏrĕ prōmūnt

Tīsāndrūs, Sthĕnĕlūsquĕ dŭcēs, ēt dīrŭs Ŭlīxēs,

dēmīssūm lāpsī pēr fūnem, Ăthămāsquĕ Thŏāsquĕ,

Pēlīdēsquĕ Nĕōptŏlĕmūs, prīmūsquĕ Măchāōn,

ēt Mĕnĕlāŭs ĕt īpsĕ dŏlī făbrĭcātŏr Ĕpēūs.

Īnvādūnt ūrbēm sōmnō vīnōquĕ sĕpūltām.

Caēdūntūr vĭgĭlēs; pōrtīsquĕ pătēntĭbŭs ōmnēs

āccĭpĭūnt sŏcĭōs, ātque āgmĭnă cōnscĭă iūngūnt.

Tēmpŭs ĕrāt quō prīmă quĭēs mōrtālĭbŭs aēgrīs

īncĭpĭt, ēt dōnō dīvōm grātīssĭmă sērpīt.

Īn sōmnīs ēcce ānte ŏcŭlōs maēstīssĭmŭs Hēctōr

vīsŭs ădēssĕ mĭhī, lārgōsque ēffūndĕrĕ flētūs,

rāptātūs bīgīs, ūt quōndam, ātērquĕ crŭēntō

pūlvĕrĕ, pērquĕ pĕdēs trāiēctūs lōră tŭmēntēs.

Heī mĭhĭ, quālĭs ĕrāt! Quāntūm mūtātŭs ăb īllō

Hēctŏrĕ, quī rĕdĭt ēxŭvĭās īndūtŭs Ăchīllīs,

vēl Dănăūm Phrўgĭōs iăcŭlātūs pūppĭbŭs īgnēs!

Squālēntēm bārbam, ēt cōncrētōs sānguĭnĕ crīnēs,

vōlnĕrăque īllă gĕrēns, quaē cīrcūm plūrĭmă mūrōs

āccēpīt pătrĭōs. Ūltrō flēns īpsĕ vĭdēbār

cōmpēllārĕ vĭrum, ēt maēstās ēxprōmĕrĕ vōcēs:

"Ō lūx Dārdănĭaē, spēs ō fīdīssĭmă Teūcrūm,

quaē tāntaē tĕnŭērĕ mŏraē? Quĭbŭs Hēctŏr ăb ōrīs

ēxspēctārĕ vĕnīs? Ūt tē pōst mūltă tŭōrūm

fūnĕră, pōst vărĭōs hŏmĭnūmque ūrbīsquĕ lăbōrēs

dēfēssi āspĭcĭmūs? Quaē caūsa īndīgnă sĕrēnōs

foēdāvīt vōltūs? Aūt cūr haēc vōlnĕră cērnō?"

Īllĕ nĭhīl, nēc mē quaērēntēm vānă mŏrātūr:

sēd grăvĭtēr gĕmĭtūs īmō dē pēctŏrĕ dūcēns:

"Heū fŭgĕ, nātĕ dĕā, tēque hīs, ăĭt, ērĭpĕ flāmmīs.

Hōstĭs hăbēt mūrōs, rŭĭt ālto ā cūlmĭnĕ Troīă.

Sāt pătrĭaē Prĭămōquĕ dătūm: sī Pērgămă dēxtrā

dēfēndī pōssēnt, ĕtĭam hāc dēfēnsă fŭīssēnt.

Sācră sŭōsquĕ tĭbī cōmmēndāt Troīă Pĕnātēs.

Hōs căpĕ fātōrūm cŏmĭtēs, hīs moēnĭă quaērĕ;

māgnă pĕrērrātō stătŭēs quaē dēnĭquĕ pōntō."

Sīc ăĭt, ēt mănĭbūs vīttās, Vēstāmquĕ pŏtēntēm,

aētērnūmque ădўtīs ēffērt pĕnĕtrālĭbŭs īgnēm.

Dīvērso īntĕrĕā mīscēntūr moēnĭă lūctū:

ēt măgĭs ātquĕ măgīs (quāmquām sēcrētă părēntīs

Ānchīsaē dŏmŭs, ārbŏrĭbūsque ōbtēctă rĕcēssīt)

clārēscūnt sŏnĭtūs, ārmōrūmque īngrŭĭt hōrrōr.

Ēxcŭtĭōr sōmno, ēt sūmmī fāstīgĭă tēctī

āscēnsū sŭpĕro, ātque ārrēctīs aūrĭbŭs āstō.

Īn sĕgĕtēm vĕlŭtī cūm flāmmă fŭrēntĭbŭs Aūstrīs

īncĭdĭt, aūt răpĭdūs mōntānō flūmĭnĕ tōrrēns

stērnĭt ăgrōs, stērnīt sătă laētă bŏūmquĕ lăbōrēs,

praēcĭpĭtēsquĕ trăhīt sīlvās: stŭpĕt īnscĭŭs āltō

āccĭpĭēns sŏnĭtūm sāxī dē vērtĭcĕ pāstōr.

Tūm vērō mănĭfēstă fĭdēs, Dănăūmquĕ pătēscūnt

īnsĭdĭaē. Iām Dēĭphŏbī dĕdĭt āmplă rŭīnām

Vōlcānō sŭpĕrāntĕ dŏmūs: iām prōxĭmŭs ārdēt

Ūcălĕgōn: Sīgēa īgnī frĕtă lātă rĕlūcēnt.

Ēxŏrĭtūr clāmōrquĕ vĭrūm clāngōrquĕ tŭbārūm.

Ārma āmēns căpĭō, nēc sāt rătĭōnĭs ĭn ārmīs:

sēd glŏmĕrārĕ mănūm bēllo, ēt cōncūrrĕre ĭn ārcēm

cūm sŏcĭīs ārdēnt ănĭmī: fŭrŏr īrăquĕ mēntēm

praēcĭpĭtānt, pūlchrūmquĕ mŏrī sūccūrrĭt ĭn ārmīs.

Ēcce aūtēm tēlīs Pānthūs ēlāpsŭs Ăchīvūm,

Pānthūs Ōthrўădēs, ārcīs Phoēbīquĕ săcērdōs,

sācră mănū vīctōsquĕ dĕōs pārvūmquĕ nĕpōtēm

īpsĕ trăhīt, cūrsūque āmēns ād lītŏră tēndīt.

"Quō rēs sūmmă lŏcō, Pānthū? Quām prēndĭmŭs ārcēm?"

Vīx ĕă fātŭs ĕrām, gĕmĭtū cūm tālĭă rēddīt:

"Vēnīt sūmmă dĭēs ĕt ĭnēlūctābĭlĕ tēmpūs

Dārdănĭaē: fŭĭmūs Trōēs, fŭĭt Īlĭum ĕt īngēns

glōrĭă Teūcrōrūm: fĕrŭs ōmnĭă Iūppĭtĕr Ārgōs

trānstŭlĭt: īncēnsā Dănăī dŏmĭnāntŭr ĭn ūrbĕ.

Ārdŭŭs ārmātōs mĕdĭīs īn moēnĭbŭs ādstāns

fūndĭt ĕquūs; vīctōrquĕ Sĭnōn īncēndĭă mīscēt

īnsūltāns. Pōrtīs ălĭī bĭpătēntĭbŭs ādsūnt,

mīlĭă quōt māgnīs nūmquām vēnērĕ Mўcēnīs.

Ōbsēdēre ălĭī tēlīs āngūstă vĭārūm

ōppŏsĭtī: stāt fērri ăcĭēs mūcrōnĕ cŏrūscō

strīctă, părātă nĕcī: vīx prīmī proēlĭă tēmptānt

pōrtārūm vĭgĭlēs, ēt caēcō Mārtĕ rĕsīstūnt."

Tālĭbŭs Ōthrўădaē dīctīs ēt nūmĭnĕ dīvōm

īn flāmmās ĕt ĭn ārmă fĕrōr, quō trīstĭs Ĕrīnnŷs,

quō frĕmĭtūs vŏcăt ēt sūblātŭs ăd aēthĕră clāmōr.

Āddūnt sē sŏcĭōs Rīpheūs ēt māxĭmŭs ārmīs

Īphĭtŭs, ōblātī pēr lūnam, Hўpănīsquĕ, Dўmāsquĕ,

ēt lătĕri āgglŏmĕrānt nōstrō; iŭvĕnīsquĕ Chŏraēbūs

Mŷgdŏnĭdēs, īllīs qui ād Troīām fōrtĕ dĭēbūs

vēnĕrăt, īnsānō Cāssāndrae āccēnsŭs ămōrĕ:

ēt gĕnĕr aūxĭlĭūm Prĭămō Phrўgĭbūsquĕ fĕrēbāt.

Īnfēlīx, quī nōn spōntē praēcēptă fŭrēntīs

aūdĭĕrāt.

Quōs ŭbĭ cōnfērtōs aūdēre īn proēlĭă vīdī,

īncĭpĭō sŭpĕr hīs: "Iŭvĕnēs, fōrtīssĭmă frūstrā

pēctŏră (sī vōbīs aūdēntem ēxtrēmă cŭpīdo ēst

cērtă sĕquī, quaē sīt rēbūs fōrtūnă, vĭdētīs:

ēxcēssēre ōmnēs, ădўtīs ārīsquĕ rĕlīctīs,

dī, quĭbŭs īmpĕrĭum hōc stĕtĕrāt) sūccūrrĭtĭs ūrbī

īncēnsaē: mŏrĭāmŭr, ĕt īn mĕdĭa ārmă rŭāmūs:

ūnă sălūs vīctīs nūllām spērārĕ sălūtēm."

Sīc ănĭmīs iŭvĕnūm fŭrŏr āddĭtŭs. Īndĕ, lŭpī ceū

rāptōrēs ātra īn nĕbŭlā, quōs īmprŏbă vēntrīs

ēxēgīt caēcōs răbĭēs, cătŭlīquĕ rĕlīctī

faūcĭbŭs ēxspēctānt sīccīs; pēr tēlă, pĕr hōstēs

vādĭmŭs haūd dŭbĭam īn mōrtēm, mĕdĭaēquĕ tĕnēmūs

ūrbĭs ĭtēr. Nōx ātră căvā cīrcūmvŏlăt ūmbrā.

Quīs clādem īllīūs nōctīs, quīs fūnĕră fāndō

ēxplĭcĕt? Aūt pōssīt lăcrĭmīs aēquārĕ lăbōrēs?

Ūrbs āntīquă rŭīt mūltōs dŏmĭnātă pĕr ānnōs:

plūrĭmă pērquĕ vĭās stērnūntŭr ĭnērtĭă pāssīm

cōrpŏră, pērquĕ dŏmōs ēt rēlĭgĭōsă dĕōrūm

līmĭnă; nēc sōlī poēnās dānt sānguĭnĕ Teūcrī:

quōndam ĕtĭām vīctīs rĕdĭt īn praēcōrdĭă vīrtūs

vīctōrēsquĕ cădūnt Dănăī. Crūdēlĭs ŭbīquĕ

lūctŭs, ŭbīquĕ păvōr, ēt plūrĭmă mōrtĭs ĭmāgŏ.

Prīmūs sē Dănăūm, māgnā cŏmĭtāntĕ cătērvā,

Āndrŏgĕōs ōffērt nōbīs, sŏcĭa āgmĭnă crēdēns

īnscĭŭs, ātque ūltrō vērbīs cōmpēllăt ămīcīs:

"Fēstīnātĕ, vĭrī: nām quaē tām sēră mŏrātūr

sēgnĭtĭēs? ălĭī răpĭūnt īncēnsă, fĕrūntquĕ

Pērgămă: vōs cēlsīs nūnc prīmūm nāvĭbŭs ītīs?"

Dīxĭt, ĕt ēxtēmplō (nĕque ĕnīm rēspōnsă dăbāntūr

fīdă sătīs) sēnsīt mĕdĭōs dīlāpsŭs ĭn hōstēs.

Ōbstŭpŭīt, rētrōquĕ pĕdēm cūm vōcĕ rĕprēssīt.

Īmprōvīsum āsprīs vĕlŭtī quī sēntĭbŭs ānguēm

prēssĭt hŭmī nītēns, trĕpĭdūsquĕ rĕpēntĕ rĕfūgīt

āttōllēntem īrās, ēt caērŭlă cōllă tŭmēntēm:

haūd sĕcŭs Āndrŏgĕōs vīsū trĕmĕfāctŭs ăbībāt.

Īnrŭĭmūs, dēnsīs ēt cīrcūmfūndĭmŭr ārmīs:

īgnārōsquĕ lŏcī pāssim, ēt fōrmīdĭnĕ cāptōs

stērnĭmŭs. Āspīrāt prīmō fōrtūnă lăbōrī.

Ātque hīc ēxsūltāns sūccēssu ănĭmīsquĕ Chŏraēbūs,

"Ō sŏcĭī, quā prīma, - īnquīt, - fōrtūnă sălūtīs

mōnstrăt ĭtēr, quāque ōstēndīt sē dēxtră, sĕquāmūr.

Mūtēmūs clўpĕōs, Dănăūmque īnsīgnĭă nōbīs

āptēmūs: dŏlŭs, ān vīrtūs, quĭs ĭn hōstĕ rĕquīrāt?

Ārmă dăbūnt īpsī." Sīc fātūs, deīndĕ cŏmāntēm

Āndrŏgĕī gălĕām, clўpĕīque īnsīgnĕ dĕcōrūm

īndŭĭtūr, lătĕrīque Ārgīvum āccōmmŏdăt ēnsēm.

Hōc Rīpheūs, hōc īpsĕ Dўmās, ōmnīsquĕ iŭvēntūs

laētă făcīt: spŏlĭīs sē quīsquĕ rĕcēntĭbŭs ārmāt.

Vādĭmŭs īmmīxtī Dănăīs haūd nūmĭnĕ nōstrō,

mūltăquĕ pēr caēcām cōngrēssī proēlĭă nōctēm

cōnsĕrĭmūs; mūltōs Dănăūm dēmīttĭmŭs Ōrcō.

Dīffŭgĭūnt ălĭi ād nāvēs, ēt lītŏră cūrsū

fīdă pĕtūnt: pārs īngēntēm fōrmīdĭnĕ tūrpī

scāndūnt rūrsŭs ĕquum, ēt nōtā cōndūntŭr ĭn ālvō.

Heū nĭhĭl īnvītīs fās quēmquām fīdĕrĕ dīvīs!

Ēccĕ trăhēbātūr pāssīs Prĭămēĭă vīrgŏ

crīnĭbŭs ā tēmplō Cāssāndra, ădўtīsquĕ Mĭnērvaē,

ād caēlūm tēndēns ārdēntĭă lūmĭnă frūstrā:

lūmĭnă: nām tĕnĕrās ārcēbānt vīncŭlă pālmās.

Nōn tŭlĭt hānc spĕcĭēm fŭrĭātā mēntĕ Chŏraēbūs,

ēt sēsē mĕdĭum īniēcīt mŏrĭtūrŭs ĭn āgmēn.

Cōnsĕquĭmūr cūncti, ēt dēnsīs īncūrrĭmŭs ārmīs.

Hīc prīmum ēx āltō dēlūbrī cūlmĭnĕ tēlīs

nōstrōrum ōbrŭĭmūr, ŏrĭtūrquĕ mĭsērrĭmă caēdēs

ārmōrūm făcĭe, ēt Grāiārum ērrōrĕ iŭbārūm.

Tūm Dănăī gĕmĭtu, ātque ērēptaē vīrgĭnĭs īrā

ūndĭquĕ cōllēcti īnvādūnt: ācērrĭmŭs Āiāx,

ēt gĕmĭni Ātrīdaē, Dŏlŏpūmque ēxērcĭtŭs ōmnīs.

Āvērsī rūptō ceū quōndām tūrbĭnĕ vēntī

cōnflīgūnt Zĕphўrūsquĕ, Nŏtūsque ēt laētŭs Ĕōīs

Eūrŭs ĕquīs: strīdūnt sīlvaē, saēvītquĕ trĭdēntī

Spūmĕŭs, ātque īmō Nēreūs cĭĕt aēquŏră fūndō.

Īlli ĕtĭām, sīquōs ōbscūrā nōctĕ pĕr ūmbrām

fūdĭmŭs īnsĭdĭīs, tōtāque ăgĭtāvĭmŭs ūrbĕ,

āppārēnt: prīmī clўpĕōs, mēntītăquĕ tēlă

āgnōscūnt, ātque ōră sŏnō dīscōrdĭă sīgnānt.

Īlĭcĕt ōbrŭĭmūr nŭmĕrō: prīmūsquĕ Chŏraēbūs

Pēnĕlĕī dēxtrā, dīvae ārmĭpŏtēntĭs ăd ārām,

prōcūmbīt: cădĭt ēt Rīpheūs, iūstīssĭmŭs ūnūs

quī fŭĭt īn Teūcrīs, ēt sērvāntīssĭmŭs aēquī.

Dīs ălĭtēr vīsūm. Pĕrĕūnt Hўpănīsquĕ Dўmāsquĕ

cōnīxi ā sŏcĭīs: nēc tē tŭă plūrĭmă, Pānthū,

lābēntēm pĭĕtās, nĕc Ăpōllĭnĭs īnfŭlă tēxīt.

Īlĭăcī cĭnĕrēs, ēt flāmma ēxtrēmă mĕōrūm,

tēstŏr, ĭn ōccāsū vēstrō nēc tēlă, nĕc ūllās

vītāvīssĕ vĭcēs Dănăum: ēt sī fātă fŭīssēnt

ūt cădĕrēm, mĕrŭīssĕ mănū. Dīvēllĭmŭr īndĕ

Īphĭtŭs ēt Pĕlĭās mēcūm: quōrum Īphĭtŭs aēvō

iām grăvĭōr, Pĕlĭās ēt vōlnĕrĕ tārdŭs Ŭlīxī,

prōtĭnŭs ād sēdēs Prĭămī clāmōrĕ vŏcātī.

Hīc vēro īngēntēm pūgnām, ceū cētĕră nūsquām

bēllă fŏrēnt, nūllī tōtā mŏrĕrēntŭr ĭn ūrbĕ:

sīc Mārtem īndŏmĭtūm, Dănăōsque ād tēctă rŭēntēs

cērnĭmŭs, ōbsēssūmque āctā tēstūdĭnĕ līmēn.

Haerent parietibus scalae; postesque sub ipsos

nītūntūr grădĭbūs, clўpĕōsque ād tēlă sĭnīstrīs

prōtēcti ōbĭcĭūnt, prēnsānt fāstīgĭă dēxtrīs.

Dārdănĭdaē cōntrā tūrrēs, āc tēctă dŏmōrūm

cūlmĭnă cōnvēllūnt: hīs sē, quāndo ūltĭmă cērnūnt,

ēxtrēmām iam īn mōrtĕ părānt dēfēndĕrĕ tēlīs:

aūrātāsquĕ trăbēs, vĕtĕrūm dĕcŏra āltă părēntūm,

dēvōlvūnt. Ălĭī strīctīs mūcrōnĭbŭs īmās

ōbsēdērĕ fŏrēs: hās sērvānt āgmĭnĕ dēnsō.

Īnstaūrāti ănĭmī rēgīs sūccūrrĕrĕ tēctīs,

aūxĭlĭōquĕ lĕvārĕ vĭrōs, vīmque āddĕrĕ vīctīs.

Līmĕn ĕrāt, caēcaēquĕ fŏrēs, ēt pērvĭŭs ūsūs

tēctōrum īntēr sē Prĭămī, pōstēsquĕ rĕlīctī

ā tērgo; īnfēlīx quā sē, dūm rēgnă mănēbānt,

saēpĭŭs Āndrŏmăchē fērre īncŏmĭtātă sŏlēbāt

ād sŏcĕrōs, ĕt ăvō pŭĕrum Āstўănāctă trăhēbāt.

Ēvādo ād sūmmī fāstīgĭă cūlmĭnĭs, ūndĕ

tēlă mănū mĭsĕrī iāctābānt īrrĭtă Teūcrī.

Tūrrem īn praēcĭpĭtī stāntēm, sūmmīsquĕ sŭb āstră

ēdūctām tēctīs, ūnde ōmnīs Troīă vĭdērī,

ēt Dănăūm sŏlĭtaē nāvēs, ĕt Ăchāĭcă cāstră

āggrēssī fērrō cīrcūm, quā sūmmă lăbāntēs

iūnctūrās tăbŭlātă dăbānt, cōnvēllĭmŭs āltīs

sēdĭbŭs, īmpŭlĭmūsque: ĕă lāpsă rĕpēntĕ rŭīnām

cūm sŏnĭtū trăhĭt, ēt Dănăūm sŭpĕr āgmĭnă lātē

īncĭdĭt. Āst ălĭī sŭbĕūnt: nēc sāxă, nĕque ūllūm

tēlōrum īntĕrĕā cēssāt gĕnŭs.

Vēstĭbŭlum ānte īpsūm, prīmōque īn līmĭnĕ Pŷrrhūs

ēxūltāt tēlīs, ēt lūcĕ cŏrūscăt ăhēnā.

Quālĭs ŭbi īn lūcēm cŏlŭbēr mălă grāmĭnă pāstūs,

frīgĭdă sūb tērrā tŭmĭdūm quēm brūmă tĕgēbāt,

nūnc pŏsĭtīs nŏvŭs ēxŭvĭīs, nĭtĭdūsquĕ iŭvēntā,

lūbrĭcă cōnvōlvīt sūblātō pēctŏrĕ tērgă,

ārdŭŭs ād sōlem, ēt līnguīs mĭcăt ōrĕ trĭsūlcīs.

Ūna īngēns Pĕrĭphās, ĕt ĕquōrum ăgĭtātŏr Ăchīllīs

ārmĭgĕr Aūtŏmĕdōn: ūna ōmnīs Scŷthĭă pūbēs

sūccēdūnt rēcto, ēt flāmmās ād cūlmĭnă iāctānt.

Īpse īntēr prīmōs cōrrēptā dūră bĭpēnnī

līmĭnă pērrūmpīt, pōstēsque ā cārdĭnĕ vēllīt

aērātōs: iāmque ēxcīsā trăbĕ, fīrmă căvāvīt

rōbŏra, ĕt īngēntēm lātō dĕdĭt ōrĕ fĕnēstrām.

Āppārēt dŏmŭs īntŭs, ĕt ātrĭă lōngă pătēscūnt,

āppārēnt Prĭămi, ēt vĕtĕrūm pĕnĕtrālĭă rēgūm:

ārmātōsquĕ vĭdēnt stāntēs īn līmĭnĕ prīmō.

Āt dŏmŭs īntĕrĭōr gĕmĭtū mĭsĕrōquĕ tŭmūltū

mīscētūr: pĕnĭtūsquĕ căvaē plāngōrĭbŭs aēdēs

foēmĭnĕīs ŭlŭlānt: fĕrĭt aūrĕă sīdĕră clāmōr.

Tūm păvĭdaē tēctīs mātrēs īngēntĭbŭs ērrānt,

āmplēxaēquĕ tĕnēnt pōstēs, ātque ōscŭlă fīgūnt.

Īnstāt vī pătrĭā Pŷrrhūs: nēc claūstră, nĕc īpsī

cūstōdēs sūffērrĕ vălēnt: lăbăt āriĕtĕ crēbrō

iānŭa, ĕt ēmōtī prōcūmbūnt cārdĭnĕ pōstēs.

Fīt vĭă vī: rūmpūnt ădĭtūs, prīmōsquĕ trŭcīdānt

īmmīssī Dănăi; ēt lātē lŏcă mīlĭtĕ cōmplēnt.

Nōn sīc āggĕrĭbūs rūptīs cūm spūmĕŭs āmnīs

ēxĭĭt, ōppŏsĭtāsque ēvīcīt gūrgĭtĕ mōlēs,

fērtŭr ĭn ārvă fŭrēns cŭmŭlō, cāmpōsquĕ pĕr ōmnēs

cūm stăbŭlīs ārmēntă trăhīt. Vīdi īpsĕ fŭrēntēm

caēdĕ Nĕōptŏlĕmūm, gĕmĭnōsque īn līmĭne Ătrīdās.

Vīdi Hĕcŭbām cēntūmquĕ nŭrūs Prĭămūmquĕ pĕr ārās

sānguĭnĕ foēdāntēm, quōs īpsĕ săcrāvĕrăt, īgnēs.

Quīnquāgīnta īllī thălămī, spēs tāntă nĕpōtūm,

bārbărĭcō pōstēs aūrō, spŏlĭīsquĕ sŭpērbī

prōcŭbŭērĕ: tĕnēnt Dănăī quā dēsĭnĭt īgnīs.

Fōrsĭtăn ēt Prĭămī fŭĕrīnt quaē fātă rĕquīrās.

Ūrbĭs ŭbī cāptaē cāsūm, cōnvūlsăquĕ vīdīt

līmĭnă tēctōrum, ēt mĕdĭum īn pĕnĕtrālĭbŭs hōstēm,

ārmă dĭū sĕnĭōr dēsuētă trĕmēntĭbŭs aēvō

cīrcūmdāt nēquīquam hŭmĕrīs, ĕt ĭnūtĭlĕ fērrūm

cīngĭtŭr, āc dēnsōs fērtūr mŏrĭtūrŭs ĭn hōstēs.

Aēdĭbŭs īn mĕdĭīs, nūdōquĕ sŭb aēthĕrĭs āxĕ

īngēns āră fŭīt; iūxtāquĕ vĕtērrĭmă laūrūs

īncūmbēns ārae, ātque ūmbrā cōmplēxă Pĕnātēs.

Hīc Hĕcŭba, ēt nātaē nēquīquam āltārĭă cīrcūm,

praēcĭpĭtēs ātrā ceū tēmpēstātĕ cŏlūmbaē,

cōndēnsae, ēt dīvom āmplēxaē sĭmŭlācră tĕnēbānt.

Īpsum aūtēm sūmptīs Prĭămūm iŭvĕnīlĭbŭs ārmīs

ūt vīdīt: "Quaē mēns tām dīră, mĭsērrĭmĕ cōniūnx,

īmpŭlĭt hīs cīngī tēlīs? Aūt quō rŭĭs?", īnquīt.

"Nōn tāli aūxĭlĭō, nēc dēfēnsōrĭbŭs īstīs

tēmpŭs ĕgēt; nōn, si īpsĕ mĕūs nūnc āffŏrĕt Hēctōr.

Hūc tāmēn cōncēde: haēc āră tŭēbĭtŭr ōmnēs;

aūt mŏrĭērĕ sĭmūl." Sīc ōre ēffātă, rĕcēpīt

ād sēse, ēt sācrā lōngaēvum īn sēdĕ lŏcāvīt.

Ēcce aūtem ēlāpsūs Pŷrrhī dē caēdĕ Pŏlŷtēs,

ūnūs nātōrūm Prĭămī, pēr tēlă, pĕr hōstēs

pōrtĭcĭbūs lōngīs fŭgĭt, ēt văcŭa ātrĭă lūstrāt

saūcĭŭs: īllum ārdēns īnfēstō vōlnĕrĕ Pŷrrhūs

īnsĕquĭtūr: iām iāmquĕ mănū tĕnĕt, ēt prĕmĭt hāstā.

Ūt tāndem ānte ŏcŭlōs ēvāsĭt ĕt ōră părēntūm

cōncĭdĭt, āc mūltō vītām cūm sānguĭnĕ fūdīt.

Hīc Prĭămūs, quāmquam īn mĕdĭā iām mōrtĕ tĕnētūr,

nōn tămĕn ābstĭnŭīt, nēc vōci īraēquĕ pĕpērcīt:

"Āt tĭbĭ prō scĕlĕre, - ēxclāmāt -, prō tālĭbŭs aūsīs

dī (sī qua ēst caēlō pĭĕtās, quaē tālĭă cūrēt)

pērsōlvānt grātēs dīgnās, ēt praēmĭă rēddānt

dēbĭtă: quī nātī cōrām mē cērnĕrĕ lētūm

fēcīsti, ēt pătrĭōs foēdāstī fūnĕrĕ vōltūs.

Āt nōn īllĕ, sătūm quō tē mēntīrĭs, Ăchīllēs

tālĭs ĭn hōstĕ fŭīt Prĭămō: sēd iūră fĭdēmquĕ

sūpplĭcĭs ērŭbŭīt, cōrpūsque ēxsānguĕ sĕpūlcrō

rēddĭdĭt Hēctŏrĕūm, mēque īn mĕă rēgnă rĕmīsīt."

Sīc fātūs sĕnĭōr, tēlūmque īmbēllĕ sĭne īctū

cōnĭĕcīt, raūcō quōd prōtĭnŭs aērĕ rĕpūlsūm,

ēt sūmmō clўpĕī nēquīcquam ūmbōnĕ pĕpēndīt.

Cuī Pŷrrhūs: "Rĕfĕrēs ērgo haēc, ēt nūntĭŭs ībīs

Pēlīdaē gĕnĭtōri: īllī mĕă trīstĭă fāctă,

dēgĕnĕrēmquĕ Nĕōptŏlĕmūm nārrārĕ mĕmēntō.

Nūnc mŏrĕre." Haēc dīcēns āltārĭa ăd īpsă trĕmēntēm

trāxĭt, ĕt īn mūltō lāpsāntēm sānguĭnĕ nātī;

īmplĭcŭītquĕ cŏmām laēvā, dēxtrāquĕ cŏrūscūm

ēxtŭlĭt, āc lătĕrī căpŭlō tĕnŭs ābdĭdĭt ēnsēm.

Haēc fīnīs Prĭămī fātōrum: hīc ēxĭtŭs īllūm

sōrtĕ tŭlīt, Troīam īncēnsam, ēt prōlāpsă vĭdēntēm

Pērgămă, tōt quōndām pŏpŭlīs tērrīsquĕ sŭpērbūm

rēgnātōrem Ăsĭaē. Iăcĕt īngēns lītŏrĕ trūncūs,

āvūlsūmque hŭmĕrīs căpŭt, ēt sĭnĕ nōmĭnĕ cōrpūs.

Āt mē tūm prīmūm saēvūs cīrcūmstĕtĭt hōrrōr:

ōbstŭpŭī: sŭbĭīt cārī gĕnĭtōrĭs ĭmāgŏ,

ūt rēgem aēquaēvūm crūdēlī vōlnĕrĕ vīdī

vītam ēxhālāntēm: sŭbĭīt dēsērtă Crĕūsă,

ēt dīrēptă dŏmūs, ēt pārvī cāsŭs Ĭūlī.

Rēspĭcĭo, ēt, quaē sīt mē cīrcūm cōpĭă, lūstrō.

Dēsĕrŭēre ōmnēs dēfēssi, ēt cōrpŏră sāltū

ād tērrām mīsēre, aūt īgnĭbŭs aēgră dĕdērē.

Iāmque ădĕō sŭpĕr ūnŭs ĕrām; cūm līmĭnă Vēstaē

sērvāntem, ēt tăcĭtām sēcrēta īn sēdĕ lătēntēm

Tŷndărĭda āspĭcĭō: dānt clāra īncēndĭă lūcēm

ērrāntī, pāssīmque ŏcŭlōs pēr cūnctă fĕrēntī.

Īllă sĭbi īnfēstōs ēvērsa ōb Pērgămă Teūcrōs,

ēt poēnās Dănăum, ēt dēsērtī cōniŭgĭs īrās

praēmĕtŭēns, Troīae, ēt pătrĭaē cōmmūnĭs Ĕrīnnŷs,

ābdĭdĕrāt sēse, ātque ārīs īnvīsă sĕdēbāt.

Ēxārsēre īgnēs ănĭmō: sŭbĭt īră, cădēntēm

ūlcīscī pătrĭam, ēt scĕlĕrātās sūmĕrĕ poēnās.

"Scīlĭcĕt haēc Spārtam īncŏlŭmīs, pătrĭāsquĕ Mўcēnās

āspĭcĭēt; pārtōque ībīt rēgīnă trĭūmphō?

Coniugiumque domumque, patres natosque videbit

Īlĭădūm tūrba, ēt Phrўgĭīs cŏmĭtātă mĭnīstrīs?

Ōccĭdĕrīt fērrō Prĭămūs? Troīa ārsĕrĭt īgnī?

Dārdănĭūm tŏtĭēns fūdārīt sānguĭnĕ lītūs?

Nōn ĭtă: nāmque ētsī nūllūm mĕmŏrābĭlĕ nōmēn

foēmĭnĕa īn poēna ēst, nĕc hăbēt vīctōrĭă laūdēm:

ēxtīnxīssĕ nĕfās tămĕn, ēt sūmpsīssĕ mĕrēntīs

laūdābōr poēnās; ănĭmūmque ēxplēssĕ iŭvābīt

ūltrīcīs flāmmae, ēt cĭnĕrēs sătĭāssĕ mĕōrūm."

Tālĭă iāctābam, ēt fŭrĭātā mēntĕ fĕrēbār:

cūm mĭhĭ sē, nōn ānte ŏcŭlīs tām clāră, vĭdēndām

ōbtŭlĭt, ēt pūrā pēr nōctem īn lūcĕ rĕfūlsīt

ālmă părēns, cōnfēssă dĕām, quālīsquĕ vĭdērī

caēlĭcŏlīs, ēt quāntă sŏlēt: dēxtrāquĕ prĕhēnsūm

cōntĭnŭīt; rŏsĕōque haēc īnsŭpĕr āddĭdĭt ōrĕ:

"Nātĕ, quĭs īndŏmĭtās tāntūs dŏlŏr ēxcĭtăt īrās?

Quīd fŭrĭs? Aūt quōnām nōstrī tĭbĭ cūră rĕcēssīt?

Nōn prĭŭs āspĭcĭēs, ŭbĭ fēssum aētātĕ părēntēm

līquĕrĭs Ānchīsēn? Sŭpĕrēt cōniūnxnĕ Crĕūsă,

Ascaniusque puer? Quos omnes undique Graiae

cīrcum ērrānt ăcĭēs, ēt, nī mĕă cūră rĕsīstāt,

iām flāmmaē tŭlĕrīnt, ĭnĭmīcŭs ĕt haūsĕrĭt ēnsīs.

Nōn tĭbĭ Tŷndărĭdīs făcĭēs īnvīsă Lăcaēnaē,

cūlpātūsvĕ Părīs, vērum īnclēmēntĭă dīvōm

hās ēvērtĭt ŏpēs, stērnītque ā cūlmĭnĕ Troīām.

Āspĭcĕ (nāmque ōmnēm, quaē nūnc ōbdūctă tŭēntī

mōrtālēs hĕbĕtāt vīsūs tĭbi, ĕt hūmĭdă cīrcūm

cālīgāt, nūbem ērĭpĭām: tū nē quă părēntīs

iūssă tĭmē, neū praēcēptīs pārērĕ rĕcūsā)

hīc, ŭbĭ dīsiēctās mōlēs, āvūlsăquĕ sāxīs

sāxă vĭdēs, mīstōque ūndāntēm pūlvĕrĕ fūmūm,

Nēptūnūs mūrōs, māgnōque ēmōtă trĭdēntī

fūndāmēntă quătīt, tōtāmque ā sēdĭbŭs ūrbēm

ērŭĭt: hīc Iūnō Scaēās saēvīssĭmă pōrtās

prīmă tĕnēt, sŏcĭūmquĕ fŭrēns ā nāvĭbŭs āgmēn

fērro āccīnctă vŏcāt.

Iām sūmmās ārcēs Trītōnĭă (rēspĭcĕ) Pāllās

īnsēdīt, nīmbo ēffūlgēns, ēt Gōrgŏnĕ saēvā.

Īpsĕ pătēr Dănăīs ănĭmōs, vīrēsquĕ sĕcūndās

sūffĭcĭt: īpsĕ dĕōs īn Dārdănă sūscĭtăt ārmă.

Ērĭpĕ, nātĕ, fŭgām, fīnēmque īmpōnĕ lăbōrī.

Nūsquam ăbĕro, ēt tūtūm pătrĭō tē līmĭnĕ sīstām."

Dīxĕrăt, ēt spīssīs nōctīs sē cōndĭdĭt ūmbrīs.

Āppārēnt dīraē făcĭēs, ĭnĭmīcăquĕ Troīaē

nūmĭnă māgnă dĕūm.

Tūm vēro ōmnĕ mĭhī vīsūm cōnsīdĕre ĭn īgnēs

Īlĭum, ĕt ēx īmō vērtī Nēptūnĭă Troīă.

Āc vĕlŭtī sūmmīs āntīquam īn mōntĭbŭs ōrnūm

cūm fērro āccīsām, crēbrīsquĕ bĭpēnnĭbŭs īnstānt

ērŭĕre āgrĭcŏlaē cērtātim; īlla ūsquĕ mĭnātūr,

ēt trĕmĕfāctă cŏmām cōncūssō vērtĭcĕ nūtāt:

vōlnĕrĭbūs dōnēc paūlātim ēvīctă sŭprēmūm

cōngĕmŭīt, trāxītquĕ iŭgīs āvūlsă rŭīnām.

Dēscēndo, āc, dūcēntĕ dĕō, flāmmam īntĕr ĕt hōstēs

ēxpĕdĭōr: dānt tēlă lŏcūm, flāmmaēquĕ rĕcēdūnt.

Āst ŭbĭ iām pătrĭaē pērvēntum ād līmĭnă sēdīs,

āntīquāsquĕ dŏmōs, gĕnĭtōr, quēm tōllĕre ĭn āltōs

ōptābām prīmūm mōntēs, prīmūmquĕ pĕtēbām,

ābnēgāt ēxcīsă vĭtām prōdūcĕrĕ Troīă,

ēxsĭlĭūmquĕ pătī. "Vōs ō, quĭbŭs īntĕgĕr aēvī

sānguĭs, - ăīt -, sŏlĭdaēquĕ sŭō stānt rōbŏrĕ vīrēs,

vōs ăgĭtātĕ fŭgām.

Mē sī caēlĭcŏlaē vŏlŭīssēnt dūcĕrĕ vītām,

hās mĭhĭ sērvāssēnt sēdēs: sătĭs ūnă sŭpērquĕ

vīdĭmŭs ēxcĭdĭa, ēt cāptaē sŭpĕrāvĭmŭs ūrbī.

Sīc ō, sīc pŏsĭtum āffātī dīscēdĭtĕ cōrpūs.

Īpsĕ mănū mōrtem īnvĕnĭām: mĭsĕrēbĭtŭr hōstīs,

ēxŭvĭāsquĕ pĕtēt: făcĭlīs iāctūră sĕpūlcri ēst.

Iām prīdem īnvīsūs dīvīs, ĕt ĭnūtĭlĭs ānnōs

dēmŏrŏr, ēx quō mē dīvōm pătĕr, ātque hŏmĭnūm rēx

fūlmĭnĭs āfflāvīt vēntīs, ēt cōntĭgĭt īgnī."

Tālĭă pērstābāt mĕmŏrāns, fīxūsquĕ mănēbāt.

Nōs cōntra ēffūsī lăcrĭmīs, cōniūnxquĕ Crĕūsă,

Āscănĭūsque, ōmnīsquĕ dŏmūs, nē vērtĕrĕ sēcūm

cūnctă pătēr, fātōque ūrgēnti īncūmbĕrĕ vēllēt.

Ābnĕgăt, īncoēptōque ēt sēdĭbŭs haērĕt ĭn īsdēm.

Rūrsŭs ĭn ārmă fĕrōr, mōrtēmquĕ mĭsērrĭmŭs ōptō.

Nām quōd cōnsĭlĭum, aūt quaē iām fōrtūnă dăbātūr?

"Mēne ēffērrĕ pĕdēm, gĕnĭtōr, tē pōssĕ rĕlīctō

spērāstī? Tāntūmquĕ nĕfās pătrĭo ēxcĭdĭt ōrĕ?

Sī nĭhĭl ēx tāntā sŭpĕrīs plăcĕt ūrbĕ rĕlīnquī,

ēt sĕdĕt hōc ănĭmō, pĕrĭtūraēque āddĕrĕ Troīaē

tēquĕ tŭōsquĕ iŭvāt, pāte īstī iānŭă lētō.

Iāmque ădĕrīt mūltō Prĭămī dē sānguĭnĕ Pŷrrhūs,

nātum ānte ōră pătrīs, pātrēm qui ōbtrūncăt ăd ārās.

Hōc ĕrăt, ālmă părēns, quōd mē pēr tēlă, pĕr īgnēs

ērĭpĭs? Ūt mĕdĭīs hōstem īn pĕnĕtrālĭbŭs, ūtquĕ

Āscănĭūmquĕ pătrēmquĕ mĕūm, iūxtāquĕ Crĕūsām

āltĕrum ĭn āltĕrĭūs māctātōs sānguĭnĕ cērnām?

Ārmă vĭrī, fērte ārmă, vŏcāt lūx ūltĭmă vīctōs:

rēddĭtĕ mē Dănăīs, sĭnĭte īnstaūrātă rĕvīsām

proēlĭă: nūmquam ōmnēs hŏdĭē mŏrĭēmŭr ĭnūltī."

Hīc fērro āccīngōr rūrsūs, clўpĕōquĕ sĭnīstrām

īnsērtābam āptāns, mēque ēxtrā tēctă fĕrēbām.

Ēcce aūtēm cōmplēxă pĕdēs īn līmĭnĕ cōniūnx

haērēbāt, pārvūmquĕ pătrī tēndēbăt Ĭūlūm.

"Sī pĕrĭtūrŭs ăbīs, ēt nōs răpe ĭn ōmnĭă tēcūm:

sīn ălĭquam ēxpērtūs sūmptīs spēm pōnĭs ĭn ārmīs,

hānc prīmūm tūtārĕ dŏmūm. Cŭĭ pārvŭs Ĭūlūs,

cuī pătĕr, ēt cōniūnx quōndām tŭă dīctă rĕlīnquōr?"

Tālĭă vōcĭfĕrāns gĕmĭtū tēctum ōmnĕ rĕplēbāt:

cūm sŭbĭtūm, dīctūque ŏrĭtūr mīrābĭlĕ mōnstrūm.

Nāmquĕ mănūs īntēr, maēstōrūmque ōră părēntūm

ēccĕ lĕvīs sūmmō dē vērtĭcĕ vīsŭs Ĭūlī

fūndĕrĕ lūmĕn ăpēx, tāctūque īnnōxĭă mōllī

lāmbĕrĕ flāmmă cŏmās, ēt cīrcūm tēmpŏră pāscī.

Nōs păvĭdī trĕpĭdārĕ mĕtū, crīnēmquĕ flăgrāntēm

ēxcŭtĕre, ēt sānctōs rēstīnguĕrĕ fōntĭbŭs īgnēs.

Āt pătĕr Ānchīsēs ŏcŭlōs ād sīdĕră laētūs

ēxtŭlĭt, ēt caēlō pālmās cūm vōcĕ tĕtēndīt:

"Iūppĭtĕr ōmnĭpŏtēns, prĕcĭbūs sī flēctĕrĭs ūllīs,

āspĭcĕ nōs; hōc tāntum: ēt, sī pĭĕtātĕ mĕrēmūr,

dā deīnde aūxĭlĭūm pătĕr, ātque haēc ōmnĭă fīrmā."

Vīx ĕă fātŭs ĕrāt sĕnĭōr; sŭbĭtōquĕ frăgōrĕ

īntōnvīt laēvum, ēt dē caēlō lāpsă pĕr ūmbrās

stēllă făcēm dūcēns mūltā cūm lūcĕ cŭcūrrīt.

Īllām sūmmă sŭpēr lābēntēm cūlmĭnă tēctī

cērnĭmŭs Īdaēā clārūm sē cōndĕrĕ sīlvā,

sīgnāntēmquĕ vĭās; tūm lōngō līmĭtĕ sūlcūs

dāt lūcem, ēt lātē cīrcūm lŏcă sūlphŭrĕ fūmānt.

Hīc vērō vīctūs gĕnĭtōr sē tōllĭt ăd aūrās,

āffātūrquĕ dĕōs, ēt sānctūm sīdŭs ădōrāt:

"Iām iām nūllă mŏra ēst: sĕquŏr, ēt, quā dūcĭtĭs, ādsūm.

Dī pătrĭī sērvātĕ dŏmūm, sērvātĕ nĕpōtēm:

vēstrum hōc aūgŭrĭūm, vēstrōque īn nūmĭnĕ Troīa ēst.

Cēdo ĕquĭdēm; nēc, nātĕ, tĭbī cŏmĕs īrĕ rĕcūsō."

Dīxĕrăt īlle: ēt iām pēr moēnĭă clārĭŏr īgnīs

aūdītūr, prŏpĭūsque aēstūs īncēndĭă vōlvūnt.

"Ērga ăgĕ, cārĕ pătēr, cērvīci īmpōnĕrĕ nōstraē:

īpsĕ sŭbībo hŭmĕrīs, nēc mē lăbŏr īstĕ grăvābīt.

Quō rēs cūmquĕ cădēnt, ūnum ēt cōmmūnĕ pĕrīclūm,

ūnă sălūs āmbōbŭs ĕrīt; mĭhĭ pārvŭs Ĭūlūs

sīt cŏmĕs, ēt lōngē sērvēt vēstīgĭă cōniūnx.

Vōs fămŭlī, quaē dīcam, ănĭmīs ādvērtĭtĕ vēstrīs.

Ēst ūrbe ēgrēssīs tŭmŭlūs, tēmplūmquĕ vĕtūstūm

dēsērtaē Cĕrĕrīs, iūxtāque āntīquă cŭprēssūs

rēlĭgĭōnĕ pătrūm mūltōs sērvātă pĕr ānnōs:

hānc ēx dīvērsō sēdēm vĕnĭēmŭs ĭn ūnām.

Tū, gĕnĭtōr, căpĕ sācră mănū, pătrĭōsquĕ Pĕnātēs;

mē bēllo ē tāntō dīgrēssum, ēt caēdĕ rĕcēntī

āttrēctārĕ nĕfās, dōnēc mē flūmĭnĕ vīvō

āblŭĕrō."

Haēc fātūs, lātōs hŭmĕrōs, sūbiēctăquĕ cōllă

vēstĕ sŭpēr, fūlvīque īnstērnōr pēllĕ lĕōnīs,

sūccēdōque ŏnĕrī: dēxtraē sē pārvŭs Ĭūlūs

īmplĭcŭīt, sĕquĭtūrquĕ pătrēm nōn pāssĭbŭs aēquīs:

pōnĕ sŭbīt cōniūnx, fĕrĭmūr pĕr ŏpācă lŏcōrūm:

ēt mē, quēm dūdūm nōn ūlla īniēctă mŏvēbānt

tēlă, nĕque ādvērsō glŏmĕrāti ēx āgmĭnĕ Grāī,

nūnc ōmnēs tērrēnt aūraē, sŏnŭs ēxcĭtăt ōmnīs

sūspēnsum, ēt părĭtēr cŏmĭtīque ŏnĕrīquĕ tĭmēntēm.

Iāmquĕ prŏpīnquābām pōrtīs, ōmnēmquĕ vĭdēbār

ēvāsīssĕ vĭām, sŭbĭtō cūm crēbĕr ăd aūrēs

vīsŭs ădēssĕ pĕdūm sŏnĭtūs: gĕnĭtōrquĕ pĕr ūmbrām

prōspĭcĭēns: "Nāte, - ēxclāmāt -, fŭgĕ nātĕ, prŏpīnquānt;

ārdēntēs clўpĕōs, ātque aēră mĭcāntĭă cērnō."

Hīc mĭhĭ nēscĭŏ quōd trĕpĭdō mălĕ nūmĕn ămīcūm

cōnfūsam ērĭpŭīt mēntēm: nāmque āvĭă cūrsū

dūm sĕquŏr, ēt nōta ēxcēdō rĕgĭōnĕ vĭārūm,

heū mĭsĕrō cōniūnx fātōne ērēptă Crĕūsă

sūbstĭtĭt, ērrāvītnĕ vĭā, seū lāssă rĕsēdīt,

īncērtūm: nēc pōst ŏcŭlīs ēst rēddĭtă nōstrīs.

Nēc prĭŭs āmīssām rēspēxi, ănĭmūmquĕ rĕflēxī,

quām tŭmŭlum āntīquaē Cĕrĕrīs, sēdēmquĕ săcrātām

vēnĭmŭs. Hīc dēmūm cōllēctīs ōmnĭbŭs, ūnă

dēfŭĭt, ēt cŏmĭtēs nātūmquĕ vĭrūmquĕ fĕfēllīt.

Quēm nōn īncūsāvi āmēns hŏmĭnūmquĕ dĕōrūmque?

Aūt quĭd ĭn ēvērsā vīdī crūdēlĭŭs ūrbĕ?

Āscănĭum, Ānchīsēnquĕ pătrēm, Teūcrōsquĕ Pĕnātēs

cōmmēndō sŏcĭīs, ēt cūrvā vāllĕ rĕcōndō.

Īpse ūrbēm rĕpĕto, ēt cīngōr fūlgēntĭbŭs ārmīs.

Stāt cāsūs rĕnŏvāre ōmnēs, ōmnēmquĕ rĕvērtī

pēr Troīam, ēt rūrsūs căpŭt ōbiēctārĕ pĕrīclīs.

Prīncĭpĭō mūrōs, ōbscūrăquĕ līmĭnă pōrtaē,

quā grēssum ēxtŭlĕrām, rĕpĕto; ēt vēstīgĭă rētrō

ōbsērvātă sĕquōr pēr nōctem, ēt lūmĭnĕ lūstrō.

Hōrrŏr ŭbīque ănĭmōs, sĭmŭl īpsă sĭlēntĭă tērrēnt.

Īndĕ dŏmūm sī fōrtĕ pĕdēm, sī fōrtĕ tŭlīssēt,

mē rĕfĕro. Īrrŭĕrānt Dănăi, ēt tēctum ōmnĕ tĕnēbānt.

Īlĭcĕt īgnĭs ĕdāx flāmma ād fāstīgĭă vēntō

volvitur; exsuperant flammae; furit aestus ad auras.

Prōcēdo ād Prĭămī sēdēs, ārcēmquĕ rĕvīsō.

Ēt iām pōrtĭcĭbūs văcŭīs, Iūnōnĭs ăsŷlō

cūstōdēs lēctī Phoēnīx, ēt dīrŭs Ŭlīxēs

praēdam āssērvābānt: hūc ūndĭquĕ Trōĭă gāză

īncēnsīs ērēpta ădўtīs, mēnsaēquĕ dĕōrūm,

crātērēsque aūrō sŏlĭdī, cāptīvăquĕ vēstīs

cōngĕrĭtūr: pŭĕri, ēt păvĭdaē lōngo ōrdĭnĕ mātrēs

stānt cīrcūm.

Aūsūs quīn ĕtĭām vōcēs iāctārĕ pĕr ūmbrām,

īmplēvī clāmōrĕ vĭās; maēstūsquĕ Crĕūsām

nēquīquam īngĕmĭnāns ĭtĕrūmque ĭtĕrūmquĕ vŏcāvī.

Quaērēnti, ēt tēctīs ūrbīs sĭnĕ fīnĕ fŭrēntī

īnfēlīx sĭmŭlācrum, ātque īpsĭŭs ūmbră Crĕūsaē

vīsă mĭhi ānte ŏcŭlōs, ēt nōtā māiŏr ĭmāgŏ.

Ōbstŭpŭī, stĕtĕrūntquĕ cŏmae, ēt vōx faūcĭbŭs haēsīt.

Tūm sīc āffāri, ēt cūrās hīs dēmĕrĕ dīctīs:

"Quīd tāntum īnsānō iŭvăt īndūlgērĕ lăbōrī,

ō dūlcīs cōniūnx? Nōn haēc sĭnĕ nūmĭnĕ dīvōm

ēvĕnĭūnt: nēc te hīnc cŏmĭtem āspōrtārĕ Crĕūsām

fās: haūd īllĕ sĭnīt sŭpĕrī rēgnātŏr Ŏlŷmpī.

Lōngă tĭbi ēxsĭlĭa, ēt vāstūm mărĭs aēquŏr ărāndūm.

Ād tērram Hēspĕrĭām vĕnĭēs: ŭbĭ Lŷdĭŭs, ārvă

īntĕr ŏpīmă vĭrūm, lēnī flŭĭt āgmĭnĕ Tībrīs.

Īllīc rēs laētaē, rēgnūmque ēt rēgĭă cōniūnx

pārtă tĭbī; lăcrĭmās dīlēctaē pēllĕ Crĕūsaē.

Nōn ĕgŏ Mŷrmĭdŏnūm sēdēs, Dŏlŏpūmvĕ sŭpērbās

āspĭcĭam, aūt Grāīs sērvītūm mātrĭbŭs ībō,

Dārdănĭs ēt dīvaē Vĕnĕrīs nŭrŭs.

Sēd mē māgnă dĕūm gĕnĭtrīx hīs dētĭnĕt ōrīs.

Iāmquĕ văle, ēt nātī sērvā cōmmūnĭs ămōrēm."

Haēc ŭbĭ dīctă dĕdīt, lăcrĭmāntem ēt mūltă vŏlēntēm

dīcĕrĕ dēsērvīt, tĕnŭēsquĕ rĕcēssĭt ĭn aūrās.

Tēr cōnātŭs ĭbī cōllō dărĕ brāchĭă cīrcūm;

tēr frūstrā cōmprēnsă mănūs ēffūgĭt ĭmāgō,

pār lĕvĭbūs vēntīs, vŏlŭcrīquĕ sĭmīllĭmă sōmnō.

Sīc dēmūm sŏcĭōs cōnsūmptā nōctĕ rĕvīsō.

Ātque hīc īngēntēm cŏmĭtum āfflūxīssĕ nŏvōrūm

īnvĕnĭo ādmīrāns nŭmĕrūm, mātrēsquĕ, vĭrōsquĕ,

cōllēctam ēxsĭlĭō pūbēm, mĭsĕrābĭlĕ vūlgūs.

Ūndĭquĕ cōnvēnēre, ănĭmīs ŏpĭbūsquĕ părātī,

īn quāscūmquĕ vĕlīm pĕlăgō dēdūcĕrĕ tērrās.

Iāmquĕ iŭgīs sūmmaē sūrgēbāt Lūcĭfĕr Īdaē,

dūcēbātquĕ dĭēm: Dănăīque ōbsēssă tĕnēbānt

līmĭnă pōrtārūm: nēc spēs ŏpĭs ūllă dăbātūr.

Cēssi, ēt sūblātō mōntēm gĕnĭtōrĕ pĕtīvī.