Nunc uos potentes omnes herbas deprecor.
Exoro maiestatem uestram, quas parens
tellus generauit et cunctis dono dedit:
medicinam sanitatis in uos contulit
maiestatemque, ut omni generi identidem
humano sitis auxilium utilissimum.
Hoc supplex exposco et precor: uelocius
huc huc adeste cum uestris uirtutibus,
quia, quae creauit, ipsa permisit mihi,
ut colligam uos; fauit hic etiam, cui
medicina tradita est. Quantumque uestra nunc
uirtus potest, praestate medicinam bonam
causa salutis. Gratiam, precor, mihi
praestetis per uirtutem uestram, ut omnibus
in rebus, quicquid ex uobis ego fecero,
cuiue homini dedero, habeatis euentus bonos
et effectum celerrimum. Vt semper mihi
liceat fauente maiestate uestra uos
colligere, ...
ponamque uobis fruges et grates agam
per nomen Matris, quae uos iussit nascier.