Phoebe silvarumque potens Diana,
lucidum caeli decus, o colendi
semper et culti, date quae precamur
tempore sacro,
quo Sibyllini monuere versus
virgines lectas puerosque castos
dis, quibus septem placuere colles,
dicere carmen.
Alme Sol, curru nitido diem qui
promis et celas aliusque et idem
nasceris, possis nihil urbe Roma
visere maius!
Rite maturos aperire partus
lenis, Ilithyia, tuere matres,
sive tu Lucina probas vocari
seu Genitalis:
diva, producas subolem patrumque
prosperes decreta super iugandis
feminis prolisque novae feraci
lege marita,
certus undenos deciens per annos
orbis ut cantus referatque ludos
ter die claro totiensque grata
nocte frequentes.
Vosque veraces cecinisse, Parcae,
quod semel dictum est stabilisque rerum
terminus servet, bona iam peractis
iungite fata.
Fertilis frugum pecorisque Tellus
spicea donet Cererem corona;
nutriant fetus et aquae salubres
et Iovis aurae.
Condito mitis placidusque telo
supplices audi pueros, Apollo;
siderum regina bicornis, audi,
Luna, puellas.
Roma si vestrum est opus Iliaeque
litus Etruscum tenuere turmae,
iussa pars mutare Lares et urbem
sospite cursu,
cui per ardentem sine fraude Troiam
castus Aeneas patriae superstes
liberum munivit iter, daturus
plura relictis:
di, probos mores docili iuventae,
di, senectuti placidae quietem,
Romulae genti date remque prolemque
et decus omne.
Quaeque vos bobus veneratur albis
clarus Anchisae Venerisque sanguis,
impetret, bellante prior, iacentem
lenis in hostem.
Iam mari terraque manus potentes
Medus Albanasque timet secures,
iam Scythae responsa petunt, superbi
nuper, et Indi.
Iam Fides et Pax et Honor Pudorque
priscus et neglecta redire Virtus
audet, apparetque beata pleno
Copia cornu.
Augur et fulgente decorus arcu
Phoebus acceptusque novem Camenis,
qui salutari levat arte fessos
corporis artus,
si Palatinas videt aequus arces,
remque Romanam Latiumque felix
alterum in lustrum meliusque semper
prorogat aevum,
quaeque Aventinum tenet Algidumque,
quindecim Diana preces virorum
curat et votis puerorum amicas
applicat auris.
Haec Iovem sentire deosque cunctos
spem bonam certamque domum reporto,
doctus et Phoebi chorus et Dianae
dicere laudes.
Phoēbĕ sīlvārūmquĕ pŏtēns Dĭānă,
lūcĭdūm caēlī dĕcŭs, ō cŏlēndī
sēmpĕr ēt cūltī, dătĕ quaē prĕcāmūr
tēmpŏrĕ sācrō,
quō Sĭbŷllīnī mŏnŭērĕ vērsūs
vīrgĭnēs lēctās pŭĕrōsquĕ cāstōs
dīs, quĭbūs sēptēm plăcŭērĕ cōllēs,
dīcĕrĕ cārmēn.
Ālmĕ Sōl, cūrrū nĭtĭdō dĭēm quī
prōmĭs ēt cēlās ălĭūsque ĕt īdēm
nāscĕrīs, pōssīs nĭhĭl ūrbĕ Rōmā
vīsĕrĕ māiūs!
Rītĕ mātūrōs ăpĕrīrĕ pārtūs
lēnĭs, Īlīthyīă, tŭērĕ mātrēs,
sīvĕ tū Lūcīnă prŏbās vŏcārī
seū Gĕnĭtālīs:
dīvă, prōdūcās sŭbŏlēm pătrūmquĕ
prōspĕrēs dēcrētă sŭpēr iŭgāndīs
fēmĭnīs prōlīsquĕ nŏvaē fĕrācī
lēgĕ mărītā,
cērtŭs ūndēnōs dĕcĭēns pĕr ānnōs
ōrbĭs ūt cāntūs rĕfĕrātquĕ lūdōs
tēr dĭē clārō tŏtĭēnsquĕ grātā
nōctĕ frĕquēntēs.
Vōsquĕ vērācēs cĕcĭnīssĕ, Pārcaē,
quōd sĕmēl dīctum ēst stăbĭlīsquĕ rērūm
tērmĭnūs sērvēt, bŏnă iām pĕrāctīs
iūngĭtĕ fātă.
Fērtĭlīs frūgūm pĕcŏrīsquĕ Tēllūs
spīcĕā dōnēt Cĕrĕrēm cŏrōnā;
nūtrĭānt fētūs ĕt ăquaē sălūbrēs
ēt Iŏvĭs aūraē.
Cōndĭtō mītīs plăcĭdūsquĕ tēlō
sūpplĭcēs aūdī pŭĕrōs, Ăpōllō;
sīdĕrūm rēgīnă bĭcōrnĭs, aūdī,
Lūnă, pŭēllās.
Rōmă sī vēstrum ēst ŏpŭs Īlĭaēquĕ
lītŭs Ētrūscūm tĕnŭērĕ tūrmaē,
iūssă pārs mūtārĕ Lărēs ĕt ūrbēm
sōspĭtĕ cūrsū,
cuī pĕr ārdēntēm sĭnĕ fraūdĕ Troīām
cāstŭs Aēnēās pătrĭaē sŭpērstēs
lībĕrūm mūnīvĭt ĭtēr, dătūrūs
plūră rĕlīctīs:
dī, prŏbōs mōrēs dŏcĭlī iŭvēntaē,
dī, sĕnēctūtī plăcĭdaē quĭētēm,
Rōmŭlaē gēntī dătĕ rēmquĕ prōlēmque
ēt dĕcŭs ōmnē.
Quaēquĕ vōs bōbūs vĕnĕrātŭr ālbīs
clārŭs Ānchīsaē Vĕnĕrīsquĕ sānguīs,
īmpĕtrēt, bēllāntĕ prĭōr, iăcēntēm
lēnĭs ĭn hōstēm.
Iām mărī tērrāquĕ mănūs pŏtēntēs
Mēdŭs Ālbānāsquĕ tĭmēt sĕcūrēs,
iām Scўthaē rēspōnsă pĕtūnt, sŭpērbī
nūpĕr, ĕt Īndī.
Iām Fĭdēs ēt Pāx ĕt Hŏnōr Pŭdōrquĕ
prīscŭs ēt nēglēctă rĕdīrĕ Vīrtūs
aūdĕt, āppārētquĕ bĕātă plēnō
Cōpĭă cōrnū.
Aūgŭr ēt fūlgēntĕ dĕcōrŭs ārcū
Phoēbŭs āccēptūsquĕ nŏvēm Cămēnīs,
quī sălūtārī lĕvăt ārtĕ fēssōs
cōrpŏrĭs ārtūs,
sī Pălātīnās vĭdĕt aēquŭs ārcēs,
rēmquĕ Rōmānām Lătĭūmquĕ fēlīx
āltĕrum īn lūstrūm mĕlĭūsquĕ sēmpēr
prōrŏgăt aēvūm,
quaēque Ăvēntīnūm tĕnĕt Ālgĭdūmquĕ,
quīndĕcīm Dīānă prĕcēs vĭrōrūm
cūrăt ēt vōtīs pŭĕrōrum ămīcās
āpplĭcăt aūrīs.
Haēc Iŏvēm sēntīrĕ dĕōsquĕ cūnctōs
spēm bŏnām cērtāmquĕ dŏmūm rĕpōrtō,
dōctŭs ēt Phoēbī chŏrŭs ēt Dĭānaē
dīcĕrĕ laūdēs.