I.
Cārmĭnă prīmă tĭbī cūm iām pŭĕrīlĭbŭs ānnīs
trādĕrĕt ādsĭdŭī pērmūlcēns cūră măgīstrī
īnbŭĕrētquĕ nŏvās aūrēs sēnsūsquĕ sĕquācēs,
ūt rēspōndēndās dŏcĭlī quŏquĕ mūrmŭrĕ vōcēs
ēmēndātă rŭdī prōfērrēt līnguă pălātō,
āddĭdĭmūs nīl trīstĕ sĕnēs, nē cūră mŏnēndī
laēdĕrĕt aūt dūlcēs gūstūs vĭtĭārĕt ămārīs.
Āt mŏdŏ, cūm mōtū vĭgĕās iām pūbĕrĭs aēvī,
fōrtĭăque ā tĕnĕrīs pōssīs sēcērnĕre ĕt īpsĕ
ādmŏnĭtōr mōrūmquĕ tĭbī fāndīquĕ vĭdērī,
āccĭpĕ nōn praēcēpta ĕquĭdēm, sēt vōtă prĕcāntīs
ēt grātāntĭs ăvī fēstum ād sōllēmnĕ nĕpōtīs.
. . . . . . . . . . . . . . . . . . . . . . . .
Ādnŭĭt, ūt rĕdŭcēm fātōrum āb fīnĕ sĕnēctām
sōspĕs ăgām fēstūmquĕ dĭēm dŭbĭtātăquĕ cērnām
sīdĕră, dēpŏsĭtō prŏpĕ cōnclāmātŭs ĭn aēvō.
Hōc, mēllītĕ nĕpōs, dŭplĭcātō faēnŏrĕ pārtūm
nātāli āccēdēntĕ tŭō, mūnūsquĕ sălūtīs
plēnĭŭs hōc nōstraē, quōd iām tĭbĭ pūbĕrĭs aēvī
crēscĭt hŏnōs iŭvĕnēmquĕ sĕnēx iām cērnŏ nĕpōtēm.
Sēxtă tĭbi haēc prīmō rĕmĕāt trĭĕtērĭs ăb ānnō,
Sēptēmbrēs nōtīs rĕfĕrēns nātālĭbŭs īdūs.
Īdūs ālmă dĭēs, gĕnĭīs quŏquĕ cūltă dĕōrūm.
Sēxtīlēs Hĕcătē Lātōnĭă vīndĭcăt īdūs,
Mērcŭrĭūs Māiās, sŭpĕrōrum ādiūnctŭs hŏnōrī,
Ōctōbrēs ōlīm gĕnĭtūs Mărŏ dēdĭcăt īdūs:
īdūs saēpĕ cŏlās bīs sēnīs mēnsĭbŭs ōmnēs,
Aūsŏnĭī quīcūmquĕ mĕī cĕlĕbrāvĕrĭs īdūs.
Vālĕ nĕpōs dūlcīssĭmĕ.
I.
Carmina prima tibi cum iam puerilibus annis
traderet adsidui permulcens cura magistri
inbueretque novas aures sensusque sequaces,
ut respondendas docili quoque murmure voces
emendata rudi proferret lingua palato,
addidimus nil triste senes, ne cura monendi
laederet aut dulces gustus vitiaret amaris.
At modo, cum motu vigeas iam puberis aevi,
fortiaque a teneris possis secernere et ipse
admonitor morumque tibi fandique videri,
accipe non praecepta equidem, set vota precantis
et gratantis avi festum ad sollemne nepotis.
. . . . . . . . . . . . . . . . . . . . . . . .
Adnuit, ut reducem fatorum ab fine senectam
sospes agam festumque diem dubitataque cernam
sidera, deposito prope conclamatus in aevo.
Hoc, mellite nepos, duplicato faenore partum
natali accedente tuo, munusque salutis
plenius hoc nostrae, quod iam tibi puberis aevi
crescit honos iuvenemque senex iam cerno nepotem.
Sexta tibi haec primo remeat trieteris ab anno,
Septembres notis referens natalibus idus.
Idus alma dies, geniis quoque culta deorum.
Sextiles Hecate Latonia vindicat idus,
Mercurius Maias, superorum adiunctus honori,
Octobres olim genitus Maro dedicat idus:
idus saepe colas bis senis mensibus omnes,
Ausonii quicumque mei celebraveris idus.
Vale nepos dulcissime.